ބާ ކައުންސިލްގެ އަންނަ އަހަރުގެ ބަޖެޓް އެކުލަވައިލުމަށް ވަކީލުންގެ ޚިޔާލު ހުށަހެޅުމުގެ ފުރުސަތު ހުޅުވާލައިފި އެވެ.
ގާނޫނީ ފަންނުގެ ގާނޫނާ އެކު، ވަކީލުން ރެގިއުލޭޓް ކުރުމަށް އުފައްދާފައިވާ ބާ ކައުންސިލުން ކުރި ޓްވީޓެއްގައި ވަނީ އެ ކައުންސިލްގެ އަންނަ އަހަރުގެ ބަޖެޓް އެކުލަވައިލުމުގެ މަސައްކަތް އެގްޒެކެޓިވް ކޮމިޓީން ކުރަމުން އަންނަ ކަމަށެވެ. އެހެންވެ، އަންނަ އަހަރު ހިންގުން މުހިންމު ޕްރޮގްރާމެއް ނުވަތަ ހަރަކާތެއް އޮތް ކަމަށް ދެކޭ ނަމަ އެކަން އެ ކައުންސިލާ ހިއްސާ ކުރަން އެދޭ ކަމަށް އިއުލާނުގައި ވެ އެވެ.
އެކަމަށް ހުށަހަޅާ ޚިޔާލުތައް އޮންލައިންކޮށް ހުށަހެޅުމުގެ ފުރުސަތު މި މަހުގެ 25 ވަނަ ދުވަހާ ހަމައަށް އޮންނާނެ ކަމަށް ބާ ކައުންސިލުން ބުންޏެވެ.
ބަޖެޓް ތައްޔާރު ކުރުމުގައި ވަކީލުންގެ ޚިޔާލު ހުށަހަޅަން ބާ ކައުންސިލުން ހުޅުވާލިއިރު، ދާދި ފަހުން ވަނީ އެ ކައުންސިލްގެ ދާއިމީ ސަބް ކޮމެޓީތައް އެކުލަވާލުމުގައި ވަކީލުންގެ އެހީ ހޯދަން ވެސް އިއުލާންކޮށްފަ އެވެ. އެ ކޮމިޓީތައް އެކުލަވާލުމުގެ ކުރިން ކުރަންޖެހޭ މަސައްކަތްތައް ކުރުމަށް ވަކީލުންގެ މައްޗަށް އެކުލެވޭ ވާކިން ގްރޫޕްތަކެއް އެކުލަވާލަން އެ ކައުންސިލުން އޮތީ ނިންމައިފަ އެވެ.