އިނގިރޭސި ސްކޮޑުން ސްޓާލިން ބޭރުކޮށްފި

ލަންޑަން (ނޮވެމްބަރު 12) – އިންގްލެންޑުގެ ކޭމްޕް ތެރެއިން ލިވަޕޫލުގެ ޖޯ ގޯމޭޒާ ތަޅާފޮޅުމުން، މެންޗެސްޓާ ސިޓީގެ ރަހީމް ސްޓާލިން ޔޫރޯ ކޮލިފައިންގެ އިންގްލެންޑް ސްކޮޑުން ބާކީކޮށްފި އެވެ.

ޕްރިމިއާ ލީގުގައި މި ހަފުތާގައި ގޯމޭޒްގެ ލިވަޕޫލް އަތުން ސްޓާލިންގެ ސިޓީ 3-1 އިން ބަލިވި މެޗުގައި ދެ ކުޅުންތެރިންގެ މެދުގައި ހިތްހަމަނުޖެހުންތަކެއް އުޅުނެވެ. އިނގިރޭސި މީޑިއާ ރިޕޯޓްތައް ބުނާ ގޮތުގައި ކޭމްޕުގެ ތެރެއިން ދެކުޅުންތެރިން ގަޔަށްއަތްލައި ޒުވާބުކުރި ކަމަށެވެ.

އިންގްލެންޑުގެ ކޯޗު ގަރެތު ސައުތުގޭޓް ބުނީ ބުރާސްފަތި ދުވަހުގެރޭ މޮންޓެނީގްރޯއާ ދެކޮޅަށް ކުޅޭ މެޗަށް ސްޓާލިން ބޭނުންނުކުރަން ނިންމާފައިވާ ކަމަށެވެ. އޭނާ ބުނީ ކުރިމަތިވާ އެންމެ ބޮޑު ޗެލެންޖަކީ ވެސް އަދި އެންމެ ރަނގަޅަށް ކުރެވޭ އެއް ކަމަކީ ވެސް ކްލަބް ވާދަވެރިކަން ގައުމީ ޓީމުގެ ތެރޭގައި ނުބޭއްވުން ކަމަށާއި އެކަމަކު ސިޓީ އާއި ލިވަޕޫލް މެޗުގެ ވާދަވެރިކަން ގައުމީ ޓީމުގެ ކޭމްޕުގެ ތެރެއިން ފެނުނު ކަމަށެވެ.

އެއްވަރުކޮށްލައިގެން ވެސް ޔޫރޯ އަށް ކޮލިފައިވެވެން އޮތް މެޗުގެ ސްކޮޑުން ބާކީކުރި ސްޓާލިން އަކީ ކޮލިފައިންގައި އިންގްލެންޑުގެ އެންމެ މުހިއްމު އެއް ކުޅުންތެރިޔާ އެވެ. އޭނާ ވަނީ ހަ މެޗުން އަށް ގޯލް ޖަހައިފަ އެވެ.