ބޮޑުމޮހޮރާއަށް 42.3 މިލިއަން ރުފިޔާ ދޭންޖެހޭ، އަދި ދެއްކީ 8.4 މިލިއަން

ކާށިދޫ ދާއިރާގެ މެންބަރު އަބްދުﷲ ޖާބިރަށް ސަރުކާރުން ބޮޑުމޮހޮރާ ދިނީ 42.3 މިލިއަން ރުފިޔާ (2.7 މިލިއަން ޑޮލަރު) ގެ އިކުއިޒިޝަން ފީއަކަށް ކަމަށާއި މިހާތަނަށް ސަރުކާރަށް ދެއްކީ 8.4 މިލިއަން ރުފިޔާ ކަމަށް ޓޫރިޒަމް މިނިސްޓްރީން ބުނެފި އެވެ.

ޓޫރިޒަމް މިނިސްޓްރީން ބުނީ ޖާބިރަށް ބޮޑުމޮހޮރާ ދިނީ 2013 ވަނަ އަހަރު ހަދާފައިވާ އެގްރީމެންޓާ އެއްގޮތަށް ކަމަށެވެ. މިހާތަނަށް އިކިއުޒިޝަން ކޮސްޓުގެ ގޮތުގައި ދެއްކެވި އަދަދަކީ ޖުމްލަ އަދަދުގެ 20 ޕަސެންޓެވެ. ބާކީ 33.9 މިލިއަން ރުފިޔާ ދައްކަން ޖެހޭނީ ރިސޯޓު ހުޅުވާތާ ފަސް އަހަރުގެ ތެރޭގަ އެވެ.

މި އެގްރީމެންޓްގެ ދަށުން ސީއެސްއާރު ޕްރޮޖެކްޓެއް ހިމަނާފައި ނުވިޔަސް އިކުއިޒިޝަން ކޮސްޓްގައި ސީއެސްއާރުގެ ފައިސާ ވެސް ވަނީ ހިމަނައިފަ އެވެ.

ޖާބިރަށް ބޮޑުމޮހޮރާ ދިނީ 50 އަހަރަށެވެ. ރިސޯޓު އެޅުމަށް 36 މަސް ދުވަހުގެ މުއްދަތެއް ދީފައިވާ އިރު ފުރަތަމަ ފިޔަވަހީގެ މަސައްކަތް ހަ މަސް ތެރޭ ނިމޭނެ ކަމަށް އެގްރީމެންޓްގައި ސޮއިކުރެއްވުމަށް ފަހު ޖާބިރު ވިދާޅުވި އެވެ.

ބޮޑުމޮހޮރާ މައްސަލަ

ވ. އަތޮޅުގެ އެންމެ ބޮޑު އެއް ރަށް ކަމަށްވާ ބޮޑުމޮހޮރާ ވަނީ 1999 ވަނަ އަހަރުން 2009 ވަނަ އަހަރަށް މެރިން ރީސާޗު ސެންޓަރުގެ ތަހުލީލުތަކަށް ބޭނުންކޮށްފަ އެވެ. ގާތްގަނޑަކަށް 8 މިލިއަން ރުފިޔާ ހަރަދުކޮށްގެން ހެދި ރީސާޗު ސެންޓަރުގައި ފާނަ އާލާކުރުމާއި އިތާ މުއި އާލާ ކުރުމުގެ މަސައްކަތްތައް ކުރި އެވެ.

ހިތްގައިމު ބޮޑު ފަޅެއް އޮންނަ އެ ރަށުގައި 2010 ވަނަ އަހަރު މެރިން ކަލްޗާގެ ދާއިރާ އިން އިންވެސްޓްކުރަން ދިގު މުއްދަތަކަށް ދޭން ބީލަމަށް ހުޅުވާލި އެވެ. ނަމަވެސް އެ ސިޔާސަތު ބަދަލުވެ 2011 ވަނަ އަހަރު ރިސޯޓު ހަދަން ދޭ ހަ ރަށެއްގެ ތެރޭގައި ބޮޑުމޮހޮރާ ހިމަނައި އިއުލާނު ކުރި އެވެ.

އޭރު ބޮޑޮމޮހޮރާ ދޭން އުޅުނީ މެރިން ޓެކްނޮލޮޖީޒް އަށެވެ. އެކަމަކު ޖާބިރު ފަހުން ވަނީ އެ ކުންފުނި ބައްލަވައިގެންފަ އެވެ. މިހާރު އެއީ ޖާބިރުގެ 90 ޕަސެންޓް ހިއްސާ އޮންނަ ކުންފުންޏެކެވެ. ނަމަވެސް އެންޓި ކޮރަޕްޝަން ކޮމިޝަނާއި ކޯޓަށް މައްސަލަ ހުށަހަޅައި މައްސަލަ ނުނިމި ދިގުލައިގެން ދިޔަ އެވެ. އަދި ކޯޓުން ހުކުމް ކުރުމުން މެރިން ޓެކްނޮލޮޖީސްއާ ރަށް ހަވާލު ނުކޮށް ހިފެހެއްޓި އެވެ. އެންމެފަހުން، އެ ހުކުމް ތަންފީޒުކުރަން ސިވިލް ކޯޓުގެ ގާޒީ މަރިޔަމް ވަހީދު އަމުރު ކުރެއްވުމުން ކުރީގެ ސަރުކާރުގައި ސުޕްރީމް ކޯޓުން އެ އަމުރު ބާތިލްކޮށް، ގާޒީ ވެސް ސަސްޕެންޑްކުރި އެވެ.

މިދިޔަ ހަފުތާގައި އެގްރީމެންޓްގައި ސޮއިކުރެއްވުމަށް ފަހު ޖާބިރު ވިދާޅުވީ، ބޮޑުމޮހޮރާގައި "ޖާބިރު ހެޕީ ކްލަބް" ގެ ނަމުގައި ކުރިއަށްގެންދާނީ ބިލިއަން ޑޮލަރުގެ ޕްރޮޖެކްޓެއް ކަމަށާއި ރާއްޖޭގެ ޓޫރިޒަމަށް އިންގިލާބީ ބޮޑު ބަދަލެއް ގެންނާނެ ފަދަ ރިސޯޓެއް ތަރައްގީ ކުރާނެ އެވެ.

Jaabir Bodumohora dheythee atholhu rayyithun hiy hama nujehifai

The most trusted news source in the Maldives

Mihaaru

ޖާބިރަށް ރިސޯޓު ދިނުމާ ހިތްހަމަ ނުޖެހި އެ އަތޮޅުގެ ރައްޔިތުން އަންނަނީ ޕެޓިޝަނެއް ތައްޔާރު ކުރަމުންނެވެ.