ސައުދީ އަރަބިއާގެ ގްރޭންޑް މުފްތީ ޝެއިޚް އަބްދުލް އަޒީޒް އަލް އާލް ޝެއިޚް. --ފޮޓޯ:އަލްހަރަމައިން
17 އެޕްރީލް 2020 - 21:33
މައްކާ (އެޕްރީލް 17) - ކޮރޯނާވައިރަސް ފެތުރޭ ނަމަ ރޯދަ މަހު ވެސް މުސްލިމުން ފަރްޟު ނަމާދުތަކާއި ތަރާވީހް ނަމާދު އަދި އީދު ނަމާދު ވެސް ކުރާނީ ގޭގައި ކަމަށް ސައުދީ އަރަބިއާގެ ގްރޭންޑް މުފްތީ ޝެއިޚް އަބްދުލް އަޒީޒް އާލް ޝެއިޚް ވިދާޅުވެއްޖެ އެވެ.
"ކޮރޯނާވައިރަސް ކޮންޓްރޯލް ކުރަން އަޅާ ފިޔަވަޅެއްގެ ގޮތުން މިސްކިތުގައި ނަމާދު ނުކުރެވޭ ހާލަތެއް ދިމާވެއްޖެ ނަމަ ތަރާވީހް ނަމާދު ކުރަން ޖެހޭނީ ގޭގައި. ރޯދަ މަހުގެ ފަހުން އަންނަ އީދު ނަމާދު ވެސް ކުރާނީ މިފަދައިން،" އޮކާޒް ނޫހުން ކުރި ސުވާލަކަށް ސައުދީގެ ދީނީ އެންމެ މަތީ ފަރާތްކަމަށްވާ އާލް ޝެއިޚް ވިދާޅުވި އެވެ.
ކޮރޯނާވައިރަސް މުޅި ދުނިޔޭން ކޮންޓްރޯލް ނުވާ ނަމަ ރޯދަ މަހު ސައުދީގެ މިސްކިތްތަކުގައި ވެސް ޖަމާއަތުގައި ފަރުޟް ނަމާދު ކުރުމެއް އަދި ތަރާވީހު ނަމާދު ކުރުމެއް ނޯންނާނެ ކަމަށް އެ ގައުމުގެ އިސްލާމިކް އެފެއާޒް މިނިސްޓަރު ޑރ. އަބްދުއްލަތީފް ބިން އަބްދުލް އަޒީޒް އާލް ޝެއިޚް ވެސް ވަނީ ވިދާޅުވެފަ އެވެ.
ކޮރޯނާވައިރަސް ފެތުރުން ހުއްޓުވުމަށް ސައުދީގައި މިހާރު ވަނީ މިސްކިތްތަކުގައި ޖަމާއަތުގައި ނަމާދު ކުރުން މެދުކަނޑާލައިފަ އެވެ. އަދި ދެ ހަރަމްފުޅަށް ވެސް އާއްމުކޮށް ވަނުން ވަނީ މަނާކޮށްފަ އެވެ. ކޮރޯނާވައިރަސް ކޮންޓްރޯލްވުމުގެ އުއްމީދު ލިބެންދެން މި އަހަރުގެ ހައްޖުގެ ތައްޔާރީތައް ނުވެ މަޑުކޮށްލުމަށް ސައުދީގެ ހައްޖާއި އުމްރާއާ ބެހޭ މިނިސްޓަރު ޑރ. މުހައްމަދު ސޯލިހު ތޯހިރު ވެސް ވަނީ އެދިވަޑައިގެންފަ އެވެ.
ސައުދީން މިހާތަނަށް ވަނީ ކޮރޯނާވައިރަހަށް 7,142 މީހުން ޕޮޒިޓިވްވެ 87 މީހުން މަރުވެފަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
އުތުރުފުށީ މީހެއް
18 April 2020
ސަރުކާރުން ބުނާ ކަހަލަ ރާޖެތެރޭ ރައްރަށުގައި ހުންނަނީ ސައުދީ އަށް ވުރެވެވެސް މާލެއަށް ވުރެވެސް މާތް މިސްކިތްތަކެކޭ ، މާލެ ކައިރި ރިސޯޓަކުން ކޮވިޑް19 ފެނުނީ މިސްކިތްތަށް ބަންދުކުރީ
ނަޖު މުއްދީން.
18 April 2020
ހާދަ ހިތުގެ އުދާސް ބޮޑޭ ދޯ؟ ބަލަ ސައުދީގަ ކުރާހާ ކަމެއް ރާއްޖޭގަ ކުރަންޖެހޭތަ؟ ސައުދީގެ ހުރިހާ މިސްކިތެއް އެއީ އެހެނިހެން މިސްކިތްތަކަށްވުރެ މާތް ތަންތަނެއްނޫން. މަސްޖިދުލް ހަރަ މާއި. މަސްޖިދުއް ނަބަވީއާ ގުބާ މިސްކިތްފަދަ ތަންތަންފިއަވާ ދެން ހުންނާނީ އާންމު މިސްކިތްތަކެއް.