ބޮލީވުޑް އެކްޓަރު ރައްޒާގު ޚާން މަރުވެއްޖެ

ބޮލީވުޑްގެ 90 އަށް ވުރެ ގިނަ ފިލްމުގައި ބައިވެރިވެފައިވާ އެކްޓަރެއް ކަމަށްވާ ރައްޒާގް ޚާން މަރުވެއްޖެ އެވެ. ހެއްވާ ބައިތައް ކުޅުމުގައި މަޝްހޫރު ރައްޒާގު ކުއްލިއަކަށް ހިތް ހުއްޓިގެން މަރުވީ ބުދަ ދުވަހުގެ މެންދުރުފަހުގެ ވަގުތެއްގަ އެވެ.

ރައްޒާގް ކުއްލިއަކަށް މެޔަށް ތަދުވާތީ ހޮސްޕިޓަލަށް ގެންދިޔައިރުވެސް މަރުވެފައިވާ ކަމަށް އޭނާ ބެލި ޑޮކްޓަރުން ބުނެފައިވެ އެވެ.

ޓައިމްސް އޮފް އިންޑިއާ އިން ބުނި ގޮތުގައި ރައްޒާގުގެ ދަރިފުޅު އަސަދު މިވަގުތު ހުރީ ކްރޮއޭޝިޔާގަ އެވެ. ނަމަވެސް މި ޚަބަރު ލިބުމާއެކު އިންޑިޔާއަށް އައުމަށް އޭނާ ވަނީ ދަތުރު ފަށާފަ އެވެ.

ރައްޒާގު ވަޅުލުމަށް ހަމަޖެހިފައި ވަނީ ނަރިއަލްވާދީ ގަބުރުސްތާނުގައި މާދަމާ ހަވީރުގެ ވަގުތެއްގަ އެވެ. ރައްޒާގުގެ އެންމެ ފަހު ފިލްމަކީ "ކިޔާ ކޫލް ހޭ ހަމް 3" އެވެ. އެ ފިލްމުގައި އޭނާ ކުޅެފައިވަނީ ޕޯޕަޓް ކިޔާ ކެރެކްޓާ އެކެވެ.