ދަރުމަވަންތަ ސްކޫލުގެ އާ އިމާރާތް އަޅަން އެސްޖޭ ކޮންސްޓްރަކްޝަން ކުންފުންޏާ ހަވާލުކުރި މުއްދަތަށް، އެ މަސަައްކަތް ނިންމައި ނުލެވުމުން އެއްބަސްވުމުގެ މުއްދަތު ސަރުކާރުން އިތުރުކޮށްދީފި އެވެ.
ވިލާ ކޮލެޖު ކުރިމަތީގައި އޮތް ހުސް ބިމުގައި އެ އިމާރާތް އަޅަން ހަވާލުކުރީ ފެބްރުއަރީ 4، 2020 ގަ އެވެ. އެއް އަހަރު ދުވަހުގެ ތެރޭގައި ނިންމަން ހަވާލުކުރިއަސް، ސޮއިކުރިތާ އަހަރެއް ވާއިރު އަދިވެސް މަސައްކަތެއް ނުނިމެ އެވެ.
އެކަމާ ގުޅިގެން އެޑިއުކޭޝަން މިނިސްޓްރީގެ މީޑިއާ އޮފިޝަލަކު މިއަދު ވިދާޅުވީ، ފުރަތަމަ ދިން މުއްދަތަށް އިމާރާތް ނުނިމުމުން އަންނަ ޑިސެމްބަރު މަހާ ހަމައަށް އެއްބަސްވުން ދަންމާލާފައިވާ ކަމަށެވެ. މަސައްކަތް ނުފެށުނީ ވެސް ސަރުކާރުން އެސްޖޭ ކޮންސްޓްރަކްޝަނާ ބިން ހަވާލުކުރުން ލަސްވުމުން ކަމަށް އޭނާ ވިދާޅުވި އެވެ.
އެ ކުންފުންޏަށް 74.9 މިލިއަން ރުފިޔާ އަށް ސްކޫލު އިމާރާތްކުރަން ހަވާލުކުރީ ސެލެކްޓިވް ބިޑިންއަކުންނެވެ.
މަސައްކަތް ހަވާލުކުރުމުގެ އެއްބަސްވުމުގައި ސޮއިކުރެއްވުމަށް ފަހު، އެޑިއުކޭޝަން މިނިސްޓަރު ޑރ. އައިޝަތު އަލީ އޭރު ވިދާޅުވީ، ދަރުމަވަންތައިގެ އާ އިމާރާތުގެ މަސައްކަތް މި މަހަށް ނިންމައި މިހާރު ވެސް އެ ސްކޫލުގެ ވަގުތީ އިމާރާތުގައި ކިޔަވާ ދަރިވަރުންނާއެކު ކިޔެވުން ފެށޭނެ ކަމަށެވެ.
ދަރުމަވަންތައިގެ އާ އިމާރާތް ޑިޒައިން ކޮށްފައި ވަނީ 1،000 ދަރިވަރުންނަށް ކިޔަވައިދެވޭ ގޮތަށް 41 ކްލާސް ރޫމް ހިމެނޭ ގޮތަށެވެ. ކޮންމެ ކްލާހެއްގައި ގިނަވެގެން 25 ކުދިން ކިޔަވާނެ އެވެ. ސްކޫލުގައި ދެ ފްލޯގެ ލައިބްރަރީއަކާއި އިތުރު ހަރަކާތްތައް ހިންގާނެ ރޫމުތައް ވެސް ހިމެނެ އެވެ.
މިހާރު ދަރުމަވަންތަ ހިންގަނީ، މެދު ޒިޔާރަތް ކައިރީގައި ވަގުތީ ގޮތުން ހެދި ތަނެއްގަ އެވެ.