މިޝްކާގެ މަރާ ގުޅިގެން ނަސީމަށް މެންބަރުންގެ ސުވާލެއް ނެތް؛ ވަގުތު ދިނުމަށް ފަހު ކޮމިޓީ ނިންމާލައިފި
ހެލްތު މިނިސްޓަރު އަހުމަދު ނަސީމް: މިޝްކާގެ މައްސަލައިގައި ޖަވާބުދާރީވެވަޑައިގަތުމަށް އިތުރު ވަގުތު ބޭނުންވާ ކަމަށް ވިދާޅުވި-- ފޮޓޯ/މަޖިލިސް
07 ޖޫން 2021 - 17:18
14 comments
ފަރުވާ ލިބުން ލަސްވެ، އުމުރުން 10 އަހަރުގެ މިޝްކާ މުހައްމަދު ކޮވިޑު-19 ގައި ނިއާވި މައްސަލައިގައި ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީއަށް ހެލްތު މިނިސްޓަރު އަހުމަދު ނަސީމް ހާޒިރުކުރުމުން ޖަވާބުދާރީވާން އިތުރު ވަގުތު ދީ، މެންބަރުން އެއްވެސް ސުވާލެއް ނުކޮށް ކޮމިޓީ ނިންމާލައިފި އެވެ.
މިޝްކާގެ މަރުގެ މައްސަލަ އާއި ކޮވިޑް-19 އާ ގުޅިގެން ސިއްހީ ދާއިރާގެ ހުރި މައްސަލަތަކާ ގުޅޭ ގޮތުން މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީއަށް ނަސީމް ހާޒިރުކުރުމުން ވިދާޅުވީ މިޝްކާ މަރުގެ މައްސަލަ ބެލުމަށް ފަހު ހެލްތު މިނިސްޓްރީން ނެރުނު ރިޕޯޓްގައި ތަފްސީލް މައުލޫމާތުތައް ހިމެނޭނެ ކަމަށާއި އެއިން ވަރަށް ގިނަ ކަންކަން ސާފުވާނެ ކަމަށެވެ.
ނަމަވެސް މުޅި ތަހުގީގު ނުނިމޭ ކަމަށާއި ބަލަން ޖެހޭ ކަންކަމާއި އިތުރަށް އަޅަން ޖެހޭ ފިޔަވަޅުތައް އަދިވެސް ހުރި ކަމަށް ނަސީމް ވިދާޅުވި އެވެ. އެހެންކަމުން މައުލޫމާތުތައް ފުރިހަމަ ކުރުމަށް ފަހު ރަނގަޅަށް ޖަވާބުދާރީ ވެވަޑައިގަތުމަށް ހަފްތާއެއްހާ ދުވަސް ބޭނުންވާ ކަމަށް ނަސީމް ވިދާޅުވި އެވެ.
"އަޅުގަނޑު ބޭނުން ވަނީ ގާތްގަނޑަކަށް ހަފްތާއެއްގެ ފުރުސަތެއް އަޅުގަނޑަށް ދެއްވަން. އެހާތަނަށް އަޅުގަނޑަށް އިރާދަކުރެއްވިއްޔާ ހުރިހާ މަސައްކަތްތަކެއް ނިންމާލެވޭނެ. އެ ހިސާބުން އަޅުގަނޑު ތިބޭފުޅުންނާ ބައްދަލުކޮށްފަ މިކަންތައް ކުރުން ރަނގަޅުވާނީ،" ނަސީމް ވިދާޅުވި އެވެ.
މިޝްކާގެ މަރުގެ މައްސަލާގައި ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ވެސް ސިޓީއެއް ފޮނުވާފައިވާ ކަމަށާއި އިތުރު ވަގުތު ބޭނުންވާ ކަމަށް އެ ކޮމިޝަނަށް ވެސް ދަންނަވާފައިވާނެ ކަމަށް ނަސީމް ވިދާޅުވި އެވެ.
ކިތަންމެ ވަރަކަށް ޕަބްލިކް ޕްރެޝާ އޮތަސް އިންސާފުވެރި ގޮތަކަށް މިކަން ގެންދަން ޖެހޭނީ: ނަސީމް
އެ މައްސަލާގައި ނަސީމާ ސުވާލުކުރަން ފުރުސަތު ހުޅުވާލުމުން ކޮމިޓީ މެންބަރުންގެ ތެރެއިން ފުރުސަތަކަށް އެދިވަޑައިގަތީ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް އެކަންޏެވެ. އޭނާ ވެސް ވިދާޅުވީ މި މައްސަލައާ ގުޅިގެން ސައްހަ ނޫން ގިނަ ވާހަކަތަކެއް ދައުރުވެ، ނުބައި ބަޔަކު ކުށްވެރި ކުރުން ފަދަ ކަންކަން ހިންގަމުންދާ ކަމަށާއި އެހެންވެ ރަނގަޅު ގޮތަކީ ފުރިހަމަ މައުލޫމާތާއެކީ ކޮމިޓީގެ މަސައްކަތް ކުރިޔަށް ގެންދިޔުން ކަމަށެވެ.
"އަޅުގަނޑަށް ފެންނަނީ އެ މައުލޫމާތުތައް އެ ވިދާޅުވާ ޓައިމް ދީގެން މި މައްސަލަ ކުރިޔަށް ގެންދަން،" ރޮޒެއިނާ ވިދާޅުވި އެވެ.
އިތުރު މެންބަރަކު ފުރުސަތަކަށް އެދިވަޑައި ނުގަތުމުން ކޮމިޓީގެ މުގައްރިރު އަދި ހިންނަވަރު ދާއިރާގެ މެމްބަރު ޖީހާން މަހްމޫދު ވަނީ ތަހުގީގު ފުރިހަމަ ކުރުމަށް ހަފްތާއެއް ދިނުމަށް ނިންމަވައިފަ އެވެ.
މިދިޔަ މަހުގެ 28 ގައި ނެގި ސާމްޕަލްއިން ކޮވިޑަށް ޕޮޒިޓިވްކަން އެނގުނު މިޝްކާގެ ހާލު ސީރިއަސްވީ މިދިޔަ ހަފުތާގެ އަންގާރަ ދުވަހުގެ ރެ އެވެ. ހާލު ބޮޑުވާން ފެށުމުން އެމްބިއުލާންސް ފޮނުވައިދޭން އެތައް ފަހަރަކު އެދުމުން ވެސް އެކަން ކޮށްދީފައިވަނީ ދެ ގަޑިއިރާއި 25 މިނެޓު ފަހުންނެވެ.
އެ މައްސަލަ ތަހުގީގު ކުރުމަށް ފަހު ނެރުނު ރިވިއުގައި ފާހަގަކޮށްފައިވާ ބައެއް ކަންކަން މިޝްކާގެ އާއިލާއިން ދޮގު ކުރެ އެވެ. އަދި އެއިން ގިނަ މައުލޫމާތުތަކެއް އުނިކޮށްފައިވާ ކަމުގެ ތުހުމަތު ވެސް ބައެއް ފަރާތްތަކުން ކުރެ އެވެ.
މިޝްކާ މަރުގެ މައްސަލާގައި އިހުމާލުވާ ފަރާތްތަކާ މެދު ފިޔަވަޅު އަޅާނެ ކަމަށް މިނިސްޓަރު ތަކުރާރުކޮށް ވިދާޅުވި ނަމަވެސް މިއަދާ ހަމަޔަށް ވެސް އެކަމާ ގުޅިގެން އެއްވެސް ފަރާތަކަށް ފިޔަވަޅެއް އެޅިކަމެއް ހާމަކޮށްފައެއް ނުވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޙަބީބު.
08 June 2021
2023 ގަ ހަރާންވާނެ މަގޭވޯޓު އެމްޑީޕީޔައް އިންސާފުގެ ކުނޑިފަށެއްނެތް
ބޫމާރު
08 June 2021
އެމްޑީޕީ މިނިސްޓަރެއް ވީމާ ދޫކޮށްލީ! އެހެން ޕާޓީއެއްގެ މިނިސްޓަރެއް ނަމަ މަގާމުމް ވަކިކުރާނެ ވަގުތުން. ޑަބަލް ސްޓޭންޑާސް އެއްވެސް އިހުލާސްތެރި ކަމެއް ހުންނަ ބައެއް ނޫން.
ބޮޑުމީހާ
07 June 2021
ރޯޔަލް މިނިސްޓަރުންނާއި ސުވާލެއް ނުކުރާނެ!
އަބޫޖަހުލު
07 June 2021
އެލީޓް ވީމަ އޮޕަރޭޝަން ކުރަން ބޮޑު ސިންގާ ޑަކްޓަރުންގެ ޓީމެއް. އާދައިގެ ރައްޔިތުމީހާ އެންބިއުލާންސަށް ގުޅީމަ ކަހާތަން ހިރުވާވެސް ނުލާ، ފައިބުޑަށް ވެއްޓި އާދޭސް ކުރީމަ ކަމެކޭ މިހީވީ. ކުރިއަރާފައިވާ ޤައުމުތަކުގަ މިވަރުކަމެއްވީމަ މިނިސްޓަރު ދޭނީ އިސްތިއުފާ.
ހށނ
07 June 2021
މުއައްސަސާތައް އިހުމާލުވެގެން، މަސްތުވާތަކެތީގެ ވަބާއިން، ގޭންގު މާރާމާރީން، ހަރުކަށިފިކުރުން، ބައެއްކަހަލަ އެކްސިޑެނޓްތަކުން، ގެއްލޭ ފުރާނަތަކަށް، ސަރުކާރު ބޮޑުތަނުން ޒިންމާވާންޖެހޭ. ޒިންމާދާރު ވުމަކީ އެފަދަކަންކަން ތަކުރާރު ނުވާނޭހެނެން ގަވާއިދުތައް ހަރުދަނާކޮށް ހިދުމަތްދޭފަރާތްތަކަށް ފުރިހަމަތަމުރީނުދީ، ކުށްވެރިވާ ފަރާތްތަކަށްއަދަބުދީ،ގެއްލުންވާފަރާތްތަކަށް ހައްގުބަދަލުދިނުން. މިކަންކަން ނުކުރެވެނީ ނޭގޭތީއެއްނޫން. މުޅި ގައުމު ކޮރަޕްޓްވީމަ.
ރާޒުވާ
07 June 2021
ތިކަން ދެން ތިނިމުނީ. ތިމައްސަލައެއްވެސް ނުބެލޭނެ. ޒިންމާވާނެ މީހަކުވެސް ނުހުންނާނެ. 80،000 މުސާރަ ނަގައިގެން ކަމެއް ކުރާކަން ދައްކާލީ.
އުމޭއްތަ
07 June 2021
އައްޗީޑި. ރޫހާނީ ލީޑަރު ފެކްޝަން ކުދިން ހަމަ ހަނު ތިބީ ދޯ. ފެކްޝަނުގެ މިނިސްޓަރެއް ވީމަ ސުވާލު ކޮށްލަންވެސް ނުކެރުނު. ނަޝީދު ބޮޑުބެ ކިޔާ ބޭފުޅެއްވީމަ ހަމައެކަނި ކުރުނީސް ކުރަން ޖެހެނީ؟ މި ދެން ފުކެއް ބޮޑުވަރު ދޯ. ސަރުކާރު ވައްޓައެއް ނުލެވޭނެ. ޝުކުރިއްޔާ
ކޯދުލާ އޮހެނީ
07 June 2021
މިއަދު އަމީން މިނިސްޓަރު ކަމުގަ ހުރިނަމަ ވަގުތުދޭން ކޮމިޓީ ނިންމާލާނެބާ.!؟ ދެފުއްކެހެހރިކަން އިންތިހާ. ދެން މި "އިއްޒަތްތެރި" މެމްބަ...ން ހީކުރަނީ ރައްޔިތުންނަކީ މި މީހުން މި ޖަހާ ސަކަރާތް ނުވިސްނޭ ވަެުގެ ގަމާރުން ކަމަށް. މީ މި މީހުން ރައްޔިތުންނާ ދޭތެރޭ ގަބޫލްކުރާ ދަށު ދަރަޖަ. ލަދުހަޔާތް ކޮބާ؟! އެޖެންޑާ 19 މޮ އޮތީ މާ ބޮޑަށްވެސް ތަފާތުވެފަ. އިންސާފާއި ހަމަހަމަކަން ކޯދުލާ އޮހެނީ ހަމަ. ގޮތްކުޑަކަން..
ނިރު
07 June 2021
ތިދެމީހުންގެ ނާގާބިލްކަމުން މީގެ އެއްހަރެއްހާދުވަސް ކުރިންވެސް އެމްބިއުލަންސް ލަސްވެގެން މީހަކު ނިޔާވެއްޖެ ** ކޮވިޝީލްޑް ފުރަފަމަޑޯސް ޖަހާ ދެވަނަ ޑޯސް ޖަހަން ނުބަހައްޓާ ހުސްކޮއްލުމަކީވެސް ފަރުވާކުޑަކަން އެކަމުން އެތަށްބަޔަކަށް ގެއްލުންލިބި 12 ހަފްތާ ފާއިތުވަނީ ** ޑަބްލިއުއެޗްއޯ އިން ހުއްދަ ނުދޭ ވެކްސިންއެއް ޖަހަން ޖެހުނު ސަބަބުވެސް ބަޔާންކޮއްދޭން އެބަޖެހޭ ** ދެން އެންމެ ބޮޑު އިހްމާލަކީ ފަރުވާކުޑަކަމުން މި މައުސޫމް ކުއްޖާގެ ފުރާނަ ދިއުން އަދިވެސް
ނިރު
07 June 2021
ނަޝީމް ހީނުކުރާތި ހަފްތާ ދެހަފްތާ އަހަރު ދެއަހަރު ވީމަ މިކަން ދިވެހިންގެ ހިތުން ފިލާގެންދާނެކަމަށް. އެމައުސޫމް ކުއްޖާއަށް އަދުލު އިންސާފް ލިބެންދެން ހުއްޓުމެއްނެތި މަސައްކުރާނަން. ކަންކަން ފޮރުވޭ ޒަމާން ބަދަލްވެ ހިގައްޖެ ނަސީމް އަށާ މައިމޫނާއަށް ބުނެލަން އޮތީ މިހާރު ތިއޮތީ އެޗްޕީއޭގެ އިތުބާރު ގެއްލިފައޭ. ރީތި ގޮތުގަ އިސްތިއުފާދީ އާބަޔަކުގެނެސް ތަން ހިންގުމާ ހަވާލްވީމަ ރައްޔެތުންގެ އިތުބާރު ދެންލިބޭނީ.
އޮހް ކީކޭ ކިޔާކަށް
07 June 2021
ކެރަފާ ނަސީމަކީ ކާކުކަންވެސް 2023 ވަނަ އަހަރު އިންތިހާބުގައި ހަދާންނެތި އެމްޑީޕީއަށް ވޯޓު އަޅަން ތައްޔާރަށް ރާއްޖޭގެ ގިނަ ރައްޔިތުން - ހާއްސަކޮށް މި ނޫހަށް ކޮމެންޓްކުރާ ރައްޔިތުން އެތިބީ.