މުވައްޒަފަކު ކޮވިޑަށް ޕޮޒިޓިވްވެގެން މަރަަދޫ ސިއްހީ މަރުކަޒު ބަންދުކޮށްފި

އަހުމަދު އަދްޝަން، މިހާރު

30 ޖުލައި 2021 - 16:57

އައްޑޫ މަރަދޫ ސިއްހީ މަރުކަޒުގެ މުވައްޒަފަކު ކޮވިޑް-19 އަށް ޕޮޒިޓިވުމާ ގުޅިގެން އެ ތަނުގެ ހިދުމަތް ވަގުތީ ގޮތުން މިއަދު މެދުކަނޑާލައިފި އެވެ.

މިކަމާ ގުޅިގެން އެ ސެންޓަރުން ނެރުނު ބަޔާނެއްގައި ބުނީ ޕޮޒިޓިވްވި މީހާ މަރުކަޒުގެ ގިނަ އަދަދެއްގެ މުވައްޒަފުންނާ ކޮންޓެކްޓްވެފައިވާތީ މިއަދުން ފެށިގެން އަންނަ އާދީއްތަ ދުވަހާ ހަމައަށް ސިއްހީ މަރުކަޒު ބަންދުވާނެ ކަމަށެވެ. އެ ތަނުން ބުނި ގޮތުގައި މުވައްޒަފުންގެ ސާމްޕަލްތައް ނަގައި، ނަތީޖާ ލިބުމާ އެކު ކުރިއެކޭ އެއްގޮތަށް ހިދުމަތް އަލުން ދޭން ފަށާނެ އެވެ.

މިގޮތަށް ނިންމުމާ ގުޅިގެން މަރަދޫ ސިއްހީ މަރުކަޒުން ހިދުމަތް ހޯދާ މީހުން އެތަން ހުޅުވަންދެން ފޭދޫ ސިއްހީ މަރުކަޒުން ހިދުމަތް ހޯދަން އެދިފައިވެ އެވެ. އެ ތަނުން ބުނީ މިކަމާ ގުޅިގެން ރައްޔިތުންގެ އެއްބާރުލުން ވެސް ބޭނުންވާ ކަމަށާއި ރައްޔިތުންނަށް ދިމާވާނެ ދަތިތަކަށްޓަކައި މާފަށް ވެސް އެދޭ ކަމަށެވެ.

މަރަދޫން މިއަދު ކޮވިޑްގެ ޕޮޒިޓިވް ކޭހެއް ފެނިފައި މި ވަނީ އައްޑޫގެ އެއްވެސް އަވަށަކުން ކޭހެއް ނުފެންނަތާ ހަތަރު ވަރަކަށް ދުވަސް ފަހުންނެވެ.