ރިލްވާން ގެއްލުވާލި މައްސަލާގައި ޔާމީން ކޮމިޝަން ހާޒިރުކުރަނީ

ނޫސްވެރިޔާ، އަހްމަދު ރިލްވާން ގެއްލުވައިލި މައްސަލައިގެ ތަހުގީގަށް ކުރީގެ ރައީސް އަބްދުﷲ ޔާމީން މަރު ކޮމިޝަނަށް ހާޒިރުވާން އަންގައިފި އެވެ.

ގޮތް ނޭނގޭ މަރުތަކާއި ގެއްލިފައިވާ މީހުންގެ މައްސަލަތައް ބެލުމަށް އުފަައްދާފައިވާ ކޮމިޝަނަށް ޔާމީން ހާޒިރުވާން އަންގާފައި ވަނީ އަންގާރަ ދުވަހު އެވެ.

ކޮމިޝަނުން ބުނީ ރިލްވާން ގެއްލުވާލާފައިވާ މައްސަލައިގެ ތަހުގީގަށް ޔާމީނާ ސުވާލުކުރަން ބޭނުންވާތީ ހާޒިރުވާން އަންގާފައި ވާނެ ކަމަށެވެ. ނަމަވެސް އެކަމާ ބެހޭ ތަފްސީލެއް ނުދެ އެވެ.

ޔާމީންގެ ވަކީލުން ވިދާޅުވީ ޔާމީން ހާޒިރުވާން އަންގާފައި ވަނީ ރިލްވާން ގެއްލުނު މައްސަލައިގެ ތަހުގީގަށް ޔާމީން ހުރަސް އެޅުއްވި ކަމުގެ ތުހުމަތުކޮށްފައި ކަމަށެވެ.

ކުރީގެ ނައިބު ރައީސް އަހްމަދު އަދީބުގެ ފޯނުގައި ހުރި ޓެކްސްޓް މެސެޖުތަކެއް މީގެ ކުރިން ހާމަވެފައި ވާއިރު، ރިލްވާން ގެއްލުނު މައްސަލާގައި އޭރުގެ ހޯމް މިނިސްޓަރު އުމަރު ނަސީރު ކުރެއްވި މެސެޖެއްގެ ޖަވާބުގައި، އެކަމާ އެހާ ބޮޑަށް އުޅުމުގެ ބޭނުމެއް ނެތް ކަމަށް ދޭހަވާ ގޮތަށް ޖަވާބު ދެއްވާފައިވާ ކަމުގެ ތުހުމަތެއް މީގެ ކުރިން ކޮށްފައިވެ އެވެ. ނަމަވެސް އުމަރު ވަނީ ޔާމީން ތަހުގީގަށް ހުރަސް އެޅުއްވި ކަމަށް ބުނާ ވާހަކަ ދޮގުކުރައްވައިފަ އެވެ.

ކުރީގެ ރައީސް ޔާމީން އުމަރަށް ކުރެއްވި މެސެޖް ކަމަށް ބުނެ އަލް ޖަޒީރާ އިން އާއްމުކުރި މެސެޖެއް

ކޮމިޝަނުން މީގެ ކުރިން ވަނީ މީގެ ހަތް އަހަރު ކުރިން ރިލްވާން ގެއްލުމާ ބެހޭ ގޮތުން ބައެއް ކަންކަން ހޯދައި ހާމަކޮށްފަ އެވެ. ތަހުގީގު ފުރިހަމަނުކޮށް ނެރުނު އެ ރިޕޯޓްގައި ބުނާ ގޮތުން ރިލްވާން ވަނީ ވަގަށް ނެގުމަށް ފަހު ބޯ ކަނޑާލައި މަރާލައިފަ އެވެ. އަދި އެކަން ކޮށްފައިވަނީ ހަރުކަށި ފިކުރުގެ ބައެއް ކަމަށް ވެސް އެ ރިޕޯޓްގައިވެ އެވެ.

ކޮމިޝަނުން މިހާރު ތަހުގީގު ކުރިއަށް ގެންދަނީ ބޭރުގެ ތަޖުރިބާކާރެއްގެ ވެސް އެހީއާ އެކުގަ އެވެ. އޭނާ މަސައްކަތް ފެއްޓެވި ފަހުން ކޮމިޝަނުން ވަނީ ރިލްވާނާ ގުޅޭ ގޮތުން ބައެއް ކަންކަން އިތުރަށް ބަލައި ހޯދައި އާންމުންގެ އެހީތެރިކަމަށް ވެސް އެދިފަ އެވެ. ރިލްވާން ވަގަށް ނަގައި ކާރަކަށް އަރުވައިގެން ގެންދިޔަ މީހުން ބޭނުންކުރި ކަމަށް ބެލެވޭ ވަޅިއެއްގެ ވެސް ފޮރެންސިލް ތަހުލީލުތައް ކޮށް ހެކިތަކެއް ވަނީ ހޯދައިފަ އެވެ.

ރިލްވާނަށް ވީނުވީއެއް ނޭނގިފައި ވަނިކޮށް، ޔާމީންގެ ވެރިކަމުގައި 2018 ވަނަ އަހަރު އެ މަނިކުފާނު ވަނީ ރިލްވާން މަރުވެފައިވާ ކަމަށް ވިދާޅުވެފަ އެވެ. ނަމަވެސް ޔާމީންގެ ތަރުޖަމާނު ވަނީ ޔާމީން އެހެން ވިދާޅުވީ ރިލްވާންގެ މަރު ސާބިތުކުރުމަށް ނޫން ކަމަށް ވިދާޅުވެފަ އެވެ. ރިލްވާން ގެއްލުނުކަން އެނގުތާ ކުރީކޮޅު، ރިލްވާނާ ބެހޭ ގޮތުން ޔާމީނާ ނޫސްވެރިން ސުވާލުކުރުން "ގެއްލިއްޖެ ނަމަ ހޯދާނީ" ކަމަށް ވިދާޅުވެ ވާހަކަ ދެއްކެވި ގޮތުން ވެސް ފާޑުކިޔުން އަމާޒުވި އެވެ.