އަފްގާނު ރައްޔިތުން ގޮތް ހުސްވެ، ހަރުމުދާ ވިއްކަނީ

އެމެރިކާ އާއި ނޭޓޯ ސިފައިން ކުއްލި ގޮތަކަށް އަފްގާނިސްތާނުން ފައިބައިގެން ދިޔުމާއި، އެ ގައުމުގައި އޮތް ސަރުކާރު ވައްޓާލައި، ތާލިބާން ޖަމާއަތުގެ ހަނގުރާމަވެރިން ގައުމު ހިފުމާ ގުޅިގެން، ކުރިމަތިވެފައިވާ އިގްތިސާދީ ދަތިކަމުގެ ތެރޭގައި، އެ ގައުމުގެ އާންމު ރައްޔިތުން ގޮތް ހުސްވެ، އެންމެ ފަހުން ހަރުމުދާތައް ވިއްކަން ފަށައިފި އެވެ.

ވެރިރަށް ކާބުލްގެ ޗަމަންއޭ ހޮޒޯރީ ކިޔާ އަވަށް މިހާރު ބަދަލުވަމުން އަންނަނީ، އާންމު ރައްޔިތުންގެ އަތުގައި ހުރި ހަރުމުދަލާއި ގެވެހި ސާމާނު ނުއަގުގައި ވިއްކާ ބާޒާރަކަށެވެ. ގޭގައި ހިފައި ގެންގުޅޭ ސާމާނާއި ފަރުނީޗަރާއި އަންނައުނު ހިފައިގެން ކޮންމެ ދުވަހަކު ވެސް އެކި ސަރަހައްދުތަކުން މީހުން އެއަވަށަށް ޖަމާވަމުން ދެ އެވެ.

އެ ތަނުގައި މިހާރު އާންމުކޮށް ފެންނަން ހުރި ތަކެތީގެ ތެރޭގައި އައިސް އަލަމާރި، ދޮންނަ މެޝިން، ފަންކާ، ބާލީސް، ގޮދަނޑި، ކަންނެޔޮ، ދޮރުފޮތި، ރަޖާ، އެނދު، ތެލިތައްޓާއި ސަމުސާ، އެނޫން ގެވެހި ކިތަންމެ ސާމާނަކާއި ފަރުނީޗަރުގެ ބާވަތްތައް ހިމެނެ އެވެ.

ތަކެތި ވިއްކައިގެން ފައިސާކޮޅެއް ހޯދުމުގެ އުންމީދުގައި އެ ތަނަށް އައިސް ތިބި ބައެއް މީހުން، އަލް ޖަޒީރާ ޓީވީ އަށް ކިޔައިދިން ގޮތުގައި، އެމީހުން އެތަނަށް އައިސް ތިބީ ވޭތުވެ ދިޔަ 20 އަހަރުގެ ތެރޭގައި ދިރިއުޅުމެއް ބިނާކުރުމަށްޓަކައި ކުރި މަސައްކަތުން ގަނެފައި ހުރި ހުރިހާ ތަކެއްޗެއް ހިފައިގެންނެވެ.

ސަރުކާރު ވެސް ރަނގަޅަށް ހިނގައިނުގަންނާތީ އާއި، ތާލިބާނުން ގައުމު ހިފުމާ ގުޅިގެން، ބަންދުކުރި ކާރުޚާނާތަކާއި ވިޔަފާރި ކުންފުނިތައް އަދިވެސް ނުހުޅުވާތީ، އާމްދަނީ ލިބޭނެ ގޮތެއް ނެތުމުން، ހަރުމުދާކޮޅު ވިއްކުން ނޫން ގޮތެއް ނެތް ކަމަށް އެމީހުން ބުނެ އެވެ.

ބައެއް މީހުން ބުނި ގޮތުގައި އެމީހުންގެ އަތުގައި ހުރި ހަރުމުދާކޮޅު ވިއްކައިލަނީ ގޭގައި ތިބި މުސްކުޅި މައިންބަފައިންނާއި އަނބިދަރީންގެ ބަނޑުފުރާނަ މުއްތިކޮށްދެވޭނެ ގޮތެއް ނެތުމުންނެވެ. އަނެއް ބަޔަކު ބުނި ގޮތުގައި، އެމީހުންގެ މުދާކޮޅު ވިއްކައިލަނީ، އަފްގާނިސްތާނު ދޫކޮށް ކޮންމެވެސް އެހެން ގައުމަކަށް ދިރިއުޅުން ބަދަލުކުރުމުގެ އުންމީދުގަ އެވެ.

ގިނަ އަދަދެއްގެ ދޫލަތަކެއް ހިފައިގެން އެތަނަށް ގޮސް ހުރި މީހަކު ބުނި ގޮތުގައި، މީގެ އަހަރުތަކެއް ކުރިން އޭނާ އެ ދޫލަތައް ގަތީ 48،000 އަފްޣާނީ (556 ޑޮލަރު) އަށެވެ. ނަމަވެސް މިއަދު އެ ހުރިހާ ދޫލައެއް ވިއްކައިލިޔަސް 5،000 އަފްޣާނީ (58 ޑޮލަރު) ވެސް ނުލިބޭނެ ކަމަށް އޭނާ ބުންޏެވެ.

އޮގަސްޓް 15، 2021 ގައި ތާލިބާނުން އަފްގާނިސްތާނު ހިފުމާ ގުޅިގެން، ބައިނަލްއަގުވާމީ މާލީ އިދާރާތަކުން ވަނީ އަފްގާނިސްތާނާ އެކުގައި ކުރަމުން އައި ހުރިހާ މުއާމަލާތެއް ހުއްޓާލައިފަ އެވެ. ވޯލްޑް ބޭންކާއި އިންޓަނޭޝަނަލް މަނިޓަރީ ފަންޑު އަދި އެމެރިކާގެ މަރުކަޒީ ބޭންކު މެދުވެރިކޮށް އެ ގައުމަށް ލިބެމުން އައި ބައިނަލްއަގުވާމީ އެހީތައް، އެ މުއައްސަސާތަކުން ވަނީ ހިފަހައްޓައިފަ އެވެ.

ބޭރުގެ މާލީ އެހީތެރިކަން ލިބުން ހުއްޓުމާ ގުޅިގެން، އަފްގާނިސްތާނުގެ ހުރިހާ ބޭންކެއް ހެން މިހާރު ހުރީ ބަންދުކޮށްފަ އެވެ. އަދި އާންމު ތަންތަނުގައި ހުރި އޭޓީއެމްތަކުން ވެސް މިހާރު ފައިސާއެއް ނުލިބެ އެވެ. މީގެ ދުވަސްކޮޅެއް ކުރިން ވަރަށް މަދު ބޭންކެއް ހުޅުވައިގެން މަސައްކަތް ކުރަމުން އަޔަސް، ހަފުތާއަކު މީހަކަށް ދޫކުރާ ފައިސާގެ އަދަދު ވަނީ 20،000 އަފްޣާނީ (232 ޑޮލަރު) އަށް ދަށްކޮށްފަ އެވެ. އަދި ކޮންމެ ދުވަހަކު ބޭންކުން ދޫކުރާނެ މިންވަރު ވެސް ވަނީ ވަރަށް ބޮޑަށް ކުޑަކޮށްފަ އެވެ.

އެހެންކަމުން އެތައް ގަޑިއިރަކު ބޭންކުގެ ބޭރުގައި ކިޔޫ ޖެހިގެން ތިބުމަށް ފަހު، އެދުވަހަކަށް ކަނޑައަޅާފައިވާ އަދަދަށް ފައިސާ ދޫކޮށް ނިމުނުކަން އިއުލާން ކުރުމުން، ގިނަ މީހުން އެނބުރި ގެއަށް ދާން ޖެހެނީ ހުސްއަތާ އެވެ.

ތާލިބާނުން ގައުމު ހިފައި، ރައީސް އަޝްރަފް ޣަނީ ގައުމު ދޫކުރައްވައި ވަޑައިގަތުމުގެ ކުރިން ވެސް، އެ ގައުމުގެ އިގްތިސާދު އައީ މަޑުމަޑުން ހީނަރު ވަމުންނެވެ. ކޮވިޑް-19ގެ ސަބަބުން ގިނަ ދުވަސްތަކެއް ވަންދެން ބައެއް ސަރަހައްދުތައް ފުރަބަންދުކުރަން ޖެހުމުގެ އިތުރުން، ހަނަފަސްކަން އިތުރުވެ ދަނޑުވެރިކަމަށް ބުރޫ އެރުމުން، އިގްތިސާދަށް ވަނީ ވަރަށް ބޮޑު ލޮޅުމެއް އަރައިފަ އެވެ.

އެ އަޑިގަނޑުން އަރައިނުގަނެވިގެން އުޅެނިކޮށް، ތާލިބާނުން ގައުމު ހިފުމާ ގުޅިގެން، އިގްތިސާދީ ހާލަތު ގޯހުން ގޯހަށް ދިޔައީ އެވެ.

އދ.ގެ ކާނާއާ ބެހޭ އިދާރާ އިން އިންޒާރުކޮށްފައިވާ ގޮތުގައި، އަވަސް މުއްދަތެއްގެ ތެރޭގައި އަފްގާނިސްތާނަށް އިންސާނީ އެހީތެރިކަމުގެ ސާމާނު ނުފޮނުވައިފި ނަމަ، އެ ގައުމުގެ ތިން ބައިކުޅަ ދެބައި މީހުން ހައިހޫނުކަމާ ކުރިމަތިލާން ޖެހޭނެ އެވެ.