ދުނިޔޭގެ ޓޫރިޒަމް ދުވަސް ފާހަގަކުރުމުގެ ގޮތުން ރާއްޖޭގެ އެންމެ އުތުރު ތުރާކުނުން ރާއްޖޭގެ އެންމެ ދެކުނަށް ކުރާ ޖެޓްސްކީ ދަތުރުގައި ބައިވެރިވި މީހުން މިއަދު މާލެ އަތުވެއްޖެ އެވެ.
މާލެ އަށް މިއަދު ހަވީރު ކުރި ބޯ ވިއްސާރައިގެ ތެރޭގައި އެ ޓީމު އައުމުން އިއްޒުއްދީނު ފާލަން ސަރަހައްދުން މަރުހަބާ ވިދާޅުވީ ޓޫރިޒަމް މިނިސްޓަރު ޑރ. އަބްދުﷲ މައުސޫމާއި މާލޭގެ މޭޔަރު ޑރ. މުހައްމަދު މުއިއްޒެވެ.
އައްޑޫގައި މި އަހަރުގެ ޓޫރިޒަމް ދުވަސް ފާހަގަކުރުމަށް ފެށި މި ހަރަކާތުގައި ހުރިހާ އަތޮޅަކަށް ދިއުމަށް ފަހު ޖެޓްސްކީގެ ބުރު ނިންމައިލާނީ އައްޑުއަށެވެ.
ޖެޓްސްކީގައި ހުރިހާ އަތޮޅަކަށް ދިއުމަކީ އައްޑޫގައި ޓޫރިޒަމް ދުވަސް ފާހަގަކުރަން ރޭވި އެންމެ ބޮޑު ހަރަކާތް ކަމަށް ވިޔަސް އެ ސިޓީގައި ކޮވިޑްގެ ހާލަތު ގޯސްވުމުން ވަނީ އެ ދުވަސް ފާހަގަ ނުކުރަން ޓޫރިޒަމް މިނިސްޓްރީން ވަނީ ނިންމައިފަ އެވެ. އެކަމަކު، މި ހަރަކާތް ރޭވި ގޮތަށް ކުރިއަށް ގެންދަން އެ މިނިސްޓްރީން ނިންމީ އެވެ.
މިދިޔަ ބުދަ ދުވަހު ފެށި މި ދަތުރު އަންނަ ހޯމަ ދުވަހަށް ނިންމައިލާއިރު، ރާއްޖޭގެ 20 ރަށަކަށް މަޑުކުރާނެ އެވެ. ބައެއް ރަށްރަށުގައި ރޭގަނޑު މަޑުކުރަން ވެސް ހަމަޖެހިފައިވެ އެވެ. މި ޓީމުން ތުރާކުނުން މާލެއަށް އައިސްފައިވާ އިރު މާދަން ހެނދުނު މާލެ އިން ފުރައިގެން އެންމެ ފުރަތަމަ ދާނީ އއ. ރަސްދުއަށެވެ.