ސެންޓްރަލް ލީގު/ ދެ ވަނަ ޑިވިޝަން: އާލިމްގެ ދެ ވަނަ ހެޓްރިކާ އެކު މޮޅުވެ، ގުރައިދޫ ޗެމްޕިއަންކަން ހޯދައިފި

އެފްއޭއެމް ސެންޓްރަލް ލީގު ދެ ވަނަ ޑިވިޝަނުގެ ގުރޫޕް ބީ ގެ އެއް ވަނަ ކ. ގުރައިދޫ ސްޕޯޓްސް ރެކްރިއޭޝަން ކްލަބް ހޯދައިފި އެވެ.

ގުރައިދޫ އިން އެއްވަނަ ޔަގީން ކުރީ ބާކީ އެއް މެޗު އޮއްވައި، އިއްޔެ ހަވީރު ގަލޮޅު ދަނޑުގައި ގުޅީ ފުޓުބޯޅަ ކުލަބާ ވާދަކޮށް 4-0 އިން މޮޅުވެގެންނެވެ.

މެޗުގެ 33 ވަނަ މިނިޓުގައި އަހުމަދު ޝުއޫން ތިރިތިރިން ގޯލު ކުރިމައްޗަށް ހުރަސްކޮށްލި ބޯޅައެއް ގޯލަށް ފޮނުވާލައިގެން ގުރައިދޫ އަށް މެޗުގައި ލީޑު ނަގައިދިނީ، ފުރަތަމަ މެޗުގައި ވެސް ގުޅީ ކޮޅަށް ހެޓްރިކް ހެދި އާލިމް އަބްދުލް ގައްޔޫމް އެވެ.

ދެ ވަނަ ހާފު ފެށިގެން ހަތަރު ވަނަ މިނިޓުގައި ގުޅީ ޓީމަށް ރަނގަޅަށް ކްލިއާކޮށް ނުލެވުނު ބޯޅައެއްގެ ފައިދާ ނަގައި ލީޑު ފުޅާކޮށްދިން ލަނޑު ވެސް ޖަހައިދިނީ އާލިމް އެވެ. އަދި އޭގެ ހަތް މިނިޓު ފަހުން ޝުއޫން ނަގައިދިން ހިލޭޖެހުމެއް ބޮލުން ޖަހައި އެޓީމުގެ ތިން ވަނަ ލަނޑު ކާމިޔާބު ކޮށްދިނީ އަހުމަދު ނަބީލް އެވެ.

އާލިމް އޭނާގެ ހެޓްރިކް ފުރިހަމަ ކުރީ މެޗުގެ އިތުރު ވަގުތުގައި، އެއް ފަހަރުން ގުޅީ ޓީމުގެ ޑިފެންޑަރަކާއި ކީޕަރު ކައިރިން ނައްޓާފައި ބޯޅަ ގޯލަށް ފޮނުވާލައިގެންނެވެ.

މި ނަތީޖާއާ އެކު ގުރައިދޫ ވަނީ ގްރޭޓާ މާލޭ ސަރަހައްދު (މާލެ، ހުޅުމާލެ، ވިލިމާލެ) ނުހިމެނޭ ހެން ކ. އަތޮޅުގެ ރަށްތަކުން ވާދަކުރާ މި ގުރޫޕުގައި މިހާތަނަށް ކުޅުނު ތިން މެޗު ވެސް ކާމިޔާބުކޮށް، ނުވަ ޕޮއިންޓް ހޯދައިފަ އެވެ. ގުޅީ ޓީމަށް ތިން މެޗުން ތިން ޕޮއިންޓް ލިބިފައި ވާއިރު، މާފުށީ ނިއު ސްޓާ ސްޕޯޓްސް ކްލަބް ވަނީ މިހާތަނަށް ކުޅުނު ދެ މެޗުން ވެސް ބަލިވެފަ އެވެ.

ގުރޫޕުގެ އެއް ވަނަ ޔަގީންކޮށް ގުރައިދޫ އިން އެއް ވަނަ ޑިވިޝަނުގެ ޖާގަ ޔަގީން ކުރި އިރު، ގުޅި އާއި މާފުށީ ނިއު ސްޓާ އަށް ވެސް ގުރޫޕުގެ ދެ ވަނަ ހޯދުމުގެ ފުރުސަތު އެބަ އޮތެވެ. ސެންޓްރަލް ޒޯނުގައި ކުޅޭ ފަސް ގުރޫޕުގެ ދެ ވަނައަށްދާ ޓީމުތަކުގެ ތެރެއިން އެންމެ ނަތީޖާ ރަނގަޅު ތިން ޓީމަކަށް އެއް ވަނަ ޑިވިޝަނުން ޖާގަ ލިބޭނެ އެވެ.

ގުރައިދޫން އެ ޓީމުގެ ފަހު މެޗުގައި ހޯމަ ދުވަހުގެ ހަވީރު ނިއު ސްޓާއާ ދެކޮޅަށް ނުކުންނަ އިރު، ބުދަ ދުވަހު ގުރޫޕުގެ ފަހު މެޗުގައި ބައްދަލުކުރާނީ ގުޅި އަދި ނިއު ސްޓާ އެވެ.