ކޮންމެ އަހަރަކު ރޯދަ މަހު ބާއްވާ ވެޓެރަންސް ލީގުގެ މިދިޔަ އަހަރުގެ ޗެމްޕިއަން ހުޅުމާލޭ ވެޓެރަންސް ކްލަބުން މި އަހަރު މުބާރާތުގައި ކުޅުނު ފުރަތަމަ މެޗު، ދިވެހި ސިފައިންގެ ކްލަބާ ވާދަކޮށް 1-1 އިން އެއްވަރު ވެއްޖެ އެވެ.
އެފްއޭއެމް އެއް ނަމްބަރު ޓާފުގައި ކުޅުނު މެޗުގެ ފުރަތަމަ ހާފު ނިމެނިކޮށް ލިބުނު ކޯނަރަކުން ސިފައިންނަށް ލީޑު ނަގައިދިނީ އިބްރާހިމް މުހައްމަދެވެ. ދެ ވަނަ ހާފުގައި ހުޅުމާލޭ ވެޓެރަންސް އަށް ނަތީޖާ އެއްވަރު ކޮށްދިނީ އަހުމަދު ގިތުރީސް އެވެ.
މެޗުގެ މޮޅު ކުޅުންތެރިއަކަށް ވެސް ހޮވުނީ ގިތުރީސް އެވެ. އޭނާ އަކީ ކުރިން އެއް ވަނަ ޑިވިޝަނުގައި ކްލަބް ވިޔަންސާގެ މެދުތެރޭން މޮޅަށް ކުޅުނު ކުޅުންތެރިއެކެވެ.
މި އަހަރުގެ މުބާރާތުގައި 11 ޓީމެއް ވާދަ ކުރާއިރު، ޓީމުތައް ވަނީ ތިން ގުރޫޕަކަށް ބަހާލައިފަ އެވެ. ހުޅުމާލެ ވެޓެރަންސް ހިމެނެނީ ގުރޫޕް ބީގަ އެވެ. މި ގުރޫޕުގައި ދެން ހިމެނެނީ ސްޓެލްކޯ އަދި ނިއު ރޭޑިއަންޓް ސްޕޯޓްސް ކްލަބެވެ. މި މެޗު އޮންނާނީ ހޯމަ ދުވަހުގެ ހަވީރެވެ.
މުބާރާތުގައި މިއަދު ހަވީރު ކުޅުމަށް ހަމަޖެހިފައި ވަނީ ގުރޫޕް ސީ ގެ މޯލްޑިވްސް ސޮކަ މޭޓްސް (އެމްއެސްއެމް) އާއި ހުއްރިއްޔާ ބައްދަލުކުރާ މެޗެވެ.