ވެން ޕާސީގެ ކޯޗިން ކެރިއަރުގެ ކުރީކޮޅު ބޮޑު ނާކާމިޔާބީއެއް

ހީރެންވީން (ސެޕްޓެމްބަރު 15) - އާސެނަލް އާއި މެންޗެސްޓާ ޔުނައިޓެޑަށް ކުޅުނު ނެދަލެންޑްސް ފޯވާޑް ރޮބިން ވެން ޕާސީ ކޯޗު ކޮށްދޭ ނެދަލެންޑްސް ލީގުގެ އެސްސީ ހީރެންވީން، އޭޒެޑް އަލްކަމާ އާ ވާދަކޮށް 9-1 އިން ބަލިވެއްޖެ އެވެ.

ކުޅުން ހުއްޓާލުމަށް ފަހު ފާއިތުވި ހަތަރު އަހަރު ވެން ޕާސީ ވަނީ ފެއިނޫޑްގެ ޔޫތު ޓީމުތަކުގައި އެސިސްޓެންޓް ކޯޗެއްގެ ގޮތުގައި މަސައްކަތް ކޮށްފަ އެވެ. މިއީ އޭނާ ހެޑް ކޯޗެއްގެ ގޮތުގައި މަސައްކަތް ކުރާ ފުރަތަމަ ސީޒަނެވެ.

ވެން ޕާސީގެ އިރުޝާދުގެ ދަށުން މިހާތަނަށް ލީގުގައި އެޓީމު ކުޅުނު ހަތަރު މެޗުން ވަނީ ބަލިވެފަ އެވެ. ފުރަތަމަ މެޗުގައި ގޯލެއްގެ ތަފާތުން އަޔެކްސް އަތުން ބަލިވި އިރު ދެ ވަނަ މެޗުގައި ވަނީ ޔޫޓްރެކްޓާ ވާދަކޮށް ޕޮއިންޓެއް ހޯދައިފަ އެވެ. އަދި އިންޓަނޭޝަނަލް ބްރޭކަށް ދިޔައީ އެންއޭސީއާ ވާދަކޮށް 4-0 ގެ ބޮޑު މޮޅެއް ހޯދައިގެންނެވެ.

ނަމަވެސް އިންޓަނޭޝަނަލް ބްރޭކަށް ފަހު ކުޅުނު ފުރަތަމަ މެޗު މި ނިމުނީ ބޮޑު ތަފާތަކުން ބަލިވެގެންނެވެ. މި ބައްޔާ އެކު ވެސް އޭނާ އާއި ޓީމުގެ ކުޅުންތެރިން ވެސް މާޔޫސް ނުވާ ކަމަށް މެޗަށް ފަހު ވެން ޕާސީ ވަނީ ބުނެފަ އެވެ.

"މި ބަލި ގަބޫލު ކުރަން ޖެހޭނެ. މިއީ ފުޓްބޯޅައިގެ ބައެއް. އަހަރެން މާޔޫސެއް ނުވޭ މި މެޗުން ބަލިވެގެން، އަހަރެންގެ ކުޅުންތެރިން ވެސް،" ވެން ޕާސީ ބުންޏެވެ.

"ޓީމާ އިދިކޮޅަށް ނަތީޖާ ދާ ކަމުގައި ވިއަސް ދަނޑުމަތީގައި އެ ކުޅުންތެރިއަކަށް ހަވާލު ކުރެވޭ މަސައްކަތް ކުރުން މަތީ ދެމިހުރުން އެއީ މުހިއްމު ކަމެއް. އަހަރެމެން އަހަރެމެންގެ އަމިއްލަ ގޭމް ކުޅޭނަން. އެއީ އަހަރެމެން ގަބޫލު ކުރާ ގޮތް، އެ ގޮތުގައި ކުރިއަށް ދާނީ."