ސާފް ފުޓްސަލް ޗެމްޕިއަންޝިޕް 2026 ގެ ހުރިހާ މެޗަކުން މޮޅުވެގެން ދިވެހިރާއްޖެ މުބާރާތް ނިންމާލައިފި އެވެ.
ތާރީހުގައި ވެސް ބޭއްވި ފުރަތަމަ ސަރަހައްދީ ފުޓްސަލް މުބާރާތުގައި ރާއްޖޭގެ ފަހު މެޗުގައި މިއަދު ސްރީ ލަންކާއާ ބައްދަލުކޮށް ކާމިޔާބު ކުރީ 5-2 އިންނެވެ.
ރާއްޖެ ވަނީ އެއް މެޗު ބާކީ އޮއްވައި ފުރަތަމަ ފަސް މެޗުން 15 ޕޮއިންޓާ އެކު މުބާރާތުގެ ޗެމްޕިއަންކަން ކަށަވަރު ކޮށްފަ އެވެ. މިއަދުގެ މެޗާ އެކު ރާއްޖެ މިވަނީ މުބާރާތުގެ ހުރިހާ މެޗެއް ވެސް ކާމިޔާބު ކޮށް، ހަ މެޗުން 18 ޕޮއިންޓް ހޯދައިފަ އެވެ.
އެންމެ ފުރަތަމަ މެޗުގައި 7-1 އިން ޕާކިސްތާން ބަލި ކުރި އިރު ދެވަނަ މެޗުގައި ބަންގްލަދޭޝް ބަލި ކުރީ 6-1 އިންނެވެ. ޖެހިގެން އައި މެޗުގައި އިންޑިއާއާ ވާދަކޮށް 5-0 އިން މޮޅުވެ، އެއަށް ފަހު ވަނީ ނޭޕާލާ ވަރުގަދަ ވާދައެއް ކޮށް 2-1 އިން މޮޅުވެފަ އެވެ. އަދި ޗެމްޕިއަންކަން ކަށަވަރު ކުރީ ފަހަތުން އަރައި 3-1 އިން ބޫޓާން ބަލިކޮށްގެންނެވެ.
ރާއްޖޭން މުބާރާތުގައި ނެރޭ ފުރަތަމަ 5 ގައި ހިމެނޭ އަބްދުﷲ ޝާފިއު (ޝާއްޕެ) އަށް ދެ ރީނދޫ ކާޑު ހަމަވެފައި ވުމާ އެކު ފުރަތަމަ ފަހެއްގައި މިއަދު ކެޕްޓަން މުހައްމަދު އިމްރާން (އިންމި) އާއި އިޝާން އިބްރާޙިމް (ސައްޓު) އަދި އަހުމަދު ހަމީދު (އަންމަޑޭ) އާއެކު މެޗު ފެށީ އަބްދުﷲ ޖުނެއިދު (ޖޭންނޭ) އެވެ. އަދި ގޯލްކީޕަރު ޒައިދާން އަހުމަދު (އަސޫ) ގެ ބަދަލުގައި ކުޅުނީ އަލީ ނާޖިހު (ހޭޓް) އެވެ.
މިއަދުގެ މެޗުގެ 13 ވަނަ މިނިޓުގައި އިޝާން ބޮލުން ދިން ބޯޅަ ކޮންޓްރޯލް ކޮށްލާފައި ރާއްޖެއަށް ލީޑު ނަގައިދިނީ އިމްރާން އެވެ.
އެއަށް ފަހު ފުރަތަމަ ހާފު ނިމެން ތިން މިނިޓަށް ވެފައި ވަނިކޮށް މުހައްމަދު ތިލަމް ލަންކާ އަށް އެއްވަރު ކޮށްދިން ނަމަވެސް، ހާފު ނިމެން 14 ސިކުންތަށް ވެފައި ވަނިކޮށް އަންމަޑޭ ގޯލު ކުރިމައްޗަށް ހުސްކޮށްލި ބޯޅަ ގޯލަށް ފޮނުވާލައިގެން ރާއްޖެއަށް އަލުން ލީޑު ހޯދައިދިނީ ހުޒެއިފަތު ރަޝީދު (ހުޒޭ) އެވެ.
ދެވަނަ ހާފުގެ ހަވަނަ މިނިޓުގައި ލަންކާގެ ކެޕްޓަން މުހައްމަދު އަމަން ފައިޒާ ވަނީ ދެވަނަ ފަހަރަށް އެ ޓީމަށް މަތީޖާ އެއްވަރު ކޮށްދީފަ އެވެ. ރާއްޖެ އަލުން ލީޑު ނެގީ އަންމަޑޭ ފޮނުވާލި ބޯޅައެއް ލަންކާ ކުޅުންތެރިއެއް އަތުން ބައިކޮޅަށް ވަން ގޯލަކުންނެވެ.
ރާއްޖޭގެ ހަތަރުވަނަ ލަނޑު މެޗު ނިމެން ހަ މިނިޓަށް ވެފައި ވަނިކޮށް އަހުމަދު ރާހިލް ރަޝީދު (ރާއްކޮ) ދިން ބޯލައަކުން ޖެހީ ހުސެއިން ސުހެއިލް (ސޮކޭ) އެވެ. އަދި ފަސްވަނަ ލަނޑު އަލީ ޝިޔާހު (ޝިޔާ) ޖައްސާލި ކިކިން އަކުން ޖެހީ އިމްރާން އެވެ.
މިއީ އިމްރާން މުބާރާތުގައި ޖެހި ނުވަވަނަ ލަނޑެވެ. އޭނާ ވަނީ މުބާރާތުގެ ހުރިހާ މެޗެއްގައި ވެސް ގޯލު ޖަހައިފަ އެވެ. މުބާރާތުގެ ލަނޑު ލިސްޓުގެ ކުރީގައި ވެސް އޮތީ އޭނާ އެވެ.
މިއަދު ކުޅުނު ފުރަތަމަ މެޗުގައި ނޭޕާލް ވަނީ 4-1 އިން ބޫޓާން ބަލި ކޮށްފަ އެވެ. އަދި މުބާރާތުގެ ފަހު މެޗުގައި މިއަދު ބައްދަލުކުރާނީ އިންޑިއާ އާއި ޕާކިސްތާނެވެ.