ރާއްޖޭގެ ފުރަތަމަ އަމާޒަކީ ސެމީ ފައިނަލް: ފަދުވާ

ނޭޕާލުގައި އިއްޔެ ފެށި އަންހެން ސާފް ޗެމްޕިއަންޝިޕް ފުޓްބޯޅަ މުބާރާތުގެ ފުރަތަމަ މެޗުގައި މިއަދު އިންޑިއާއާ ދެކޮޅަށް ނުކުންނައިރު ރާއްޖޭގެ ފުރަތަމަ އަމާޒަކީ މި މުބާރާތުގެ ސެމީ ފައިނަލުގެ ޖާގައެއް ހޯދުން ކަމަށް ގައުމީ އަންހެން ފުޓްބޯޅަ ޓީމުގެ ކެޕްޓަން ފަދުވާ ޒާހިރު ބުނެފި އެވެ.

މި ފަހަރުގެ ސާފްގައި ރާއްޖެ ހިމެނެނީ އިންޑިއާ އާއި ސްރީލަންކާއާ އެކު ގްރޫޕް ބީގަ އެވެ. ފުރަތަމަ މެޗުގައި އިންޑިއާއާ ދެކޮޅަށް ރާއްޖެ މިއަދު ނުކުންނާނީ ރާއްޖެ ގަޑިން 14:15 ގަ އެވެ.

ގައުމީ ކެޕްޓަން ފަދުވާ ބުނީ އިންޑިއާ އަކީ މުބާރާތުގައި ކުޅޭ އެންމެ ވަރުގަދަ އެއް ޓީމު ކަމަށެވެ.

"އިންޑިއާ އަކީ މި މުބާރާތުގައި ވާދަކުރާ އެންމެ މޮޅު އެއް ޓީމު. މިއީ އަހަރެމެންނަށް ރަނގަޅު މެޗަކަށްވާނެ. މީގެ ކުރިން ވެސް އިންޑިއާއާ ދެކޮޅަށް ކުޅެފިން. މި މެޗުގައި ރަނގަޅު ނަތީޖާއެއް ނެރެވިއްޖެނަމަ ސްރީލަންކާ މެޗަށް ދާއިރު ވެސް ރަނގަޅު ކުޅުމެއް ދެއްކޭނެ،" ނޫސްވެރިންގެ ބައްދަލުވުމުގައި ފަދުވާ ބުންޏެވެ. "ފުރަތަމަ ޓާގެޓަކަށްވާނީ ސެމީ ފައިނަލަށް ދިއުން. އެ އަށް ފަހު އަހަރެމެން ދެން އޮތް ހަރުފަތަށް ދިއުމަށް މަސައްކަތްކުރާނީ."

ގައުމީ އަންހެން ޓީމުގެ ކޯޗު މުހައްމަދު އާތިފް (އާތީ) ބުނީ ސާފަށް ތައްޔާރުވަމުން އަންނަތާ ދެ އަހަރު ވެއްޖެ ކަމަށާއި މިވީ މުއްދަތުގެ ތެރޭގައި ގިނަ މުބާރާތްތަކެއްގެ އިތުރުން އެކުވެރިކަމުގެ މެޗުތަކެއް ވެސް ކުޅެފައިވާ ކަމަށާއި ތައްޔާރީތަކާ މެދު ހިތްހަމަ ޖެހޭ ކަމަށެވެ.

"އެންމެ ފަހު މުބާރާތުގައި އަހަރެމެން ސެމީ ފައިނަލުގައި ކުޅުނިން. މި ފަހަރު ބޭނުމީ އެ އަށް ވުރެން މައްޗަށް ދާން،" އާތީ ބުންޏެވެ.

މުބާރާތުގެ ކުރިން "މިހާރަ"ށް ދިން އިންޓަވިއުއެއްގައި އާތީ ބުނީ އޭނާގެ ޓާގެޓަކީ މި ފަހަރު ފައިނަލުގައި ކުޅުން ކަމަށާއި ކުޅުންތެރިންގެ ފަރާތުން އެ ހިތްވަރު ފެންނަ ކަމަށެވެ.

ސާފަށް ތައްޔާރުވުމުގެ ގޮތުން ޔޫއޭއީގައި ރާއްޖޭން ކޭމްޕް ޖެހިއިރު އެ ގައުމުގެ އަންހެން ޓީމާ ދެކޮޅަށް ދެ މެޗެއް ކުޅުނެވެ. ފުރަތަމަ މެޗުން 2-0 އިން ބަލިވި ނަމަވެސް ދެ ވަނަ މެޗުން ވަނީ 1-1 އިން އެއްވަރުކޮށްފަ އެވެ.

މި ފަހަރުގެ މުބާރާތަށް އިންޑިއާ އިން ދިޔައީ 23 އަހަރުން ދަށުގެ ގިނަ ކުޅުންތެރިންތަކެއް ޓީމުގައި ހިމަނައިގެންމެވެ. މި މުބާރާތް މީގެ ކުރިން ބޭއްވި ހަތަރު ފަހަރު ވެސް ތަށި އުފުފާލީ އިންޑިއާ އިންނެވެ. ފަސް ވަނަ ފަހަރަށް މުބާރާތް ކާމިޔާބުކުރަން އަމާޒުހިފާފައިވާއިރު، އިންޑިއާ އިން ބަރޯސާވަނީ ޒުވާން ކުޅުންތެރިންނަށް ކަމަށް އެ ޓީމުގެ ކޯޗު މައިމޯލް ވަނީ ބުނެފަ އެވެ.

"ޒުވާން ކުޅުންތެރިންގެ ޖާދޫ އަބަދުވެސް ފުރަތަމަ ފެންނަން ޖެހޭނީ ދަނޑުމަތީގައި އޭގެ ވާހަކަ ކުރިން ދެއްކުން ރަނގަޅެއް ނުވާނެ،" މައިމޯލް ބުންޏެވެ.

އޭނާ ބުނީ ރާއްޖެ އާއި ލަންކާ ވަނީ މުބާރާތަށް ރަނގަޅަށް ތައްޔާރުވެފައި ކަމަށާއި އެހެންވެ މެޗުތައް ފަސޭހަވާނެ ކަމަށް ނުދެކޭ ކަމަށެވެ.

"އެއްވެސް މެޗެއް ފަސޭހައެއް ނުވާނެ. ފުޓްބޯޅައިގައި ތަފާތު ދައްކަން ޖެހޭނީ ދަނޑުމަތީގައި. މޮޅުވުމުގެ ފުރުސަތު ކޮންމެ ޓީމަކަށް ވެސް އޮންނާނެ. ރާއްޖެ އާއި ސްރީލަންކާ އަށް ފުރިހަމަ އަށް އިހުތިރާމް ކުރާނަން. އެ ދެ ޓީމުން ވެސް އޮތީ ވަރަށް ރަނގަޅަށް ތައްޔާރުވެފައި،" ކުރިން އިންޑިއާގެ ޒުވާން އަންހެން ގައުމީ ޓީމުތަކަށް ކޯޗުކޮށްދިން މައިމޯލް ބުންޏެވެ.

ސްރީލަންކާގެ ކޯޗު އަލްފޮންސޯ ބުނީ އެންމެ ފަހުން ކުޅުނު ސާފް މުބާރާތުގައި ނަތީޖާތައް ދިޔައީ ވަރަށް ގޯސްކޮށް ކަމަށާއި އޭގެއިން އިބުރަތް ހާސިލްކޮށް މިދިޔަ އަހަރުތަކުގައި ސްރީލަންކާ އިން އަންހެން ފުޓްބޯޅަ ކުރިއަރުވަން ގިނަ މަސައްކަތްތަކެއް ކޮށްފައިވާ ކަމަށެވެ.

"ވިސްނުމަކީ މެޗަކަށް ފަހު މެޗެއް ނެގުން. އިންޑިއާ އާއި ރާއްޖޭގެ ޓީމު ވަރުގަދަ. އަހަރެމެން އަންޑަ އެސްޓިމޭޓެއް އަދި އޯވަ އެސްޓިމޭޓެއް ވެސް ނުކުރާނަން. އަހަރެމެންގެ ނަޒަރުގައި އެ ދެ ޓީމު ވެސް އޮތީ އެއް ހަމައެއްގައި. އަހަރެމެން ރަނގަޅު ފައިޓެއް ދޭނަން،" އަލްފޮންސޯ ބުންޏެވެ.

މީގެ ކުރިން ތަފާތު ބޮޑު ނަތީޖާތަކުން އިންޑިއާ އަތުން ރާއްޖެ ބަލިވި ނަމަވެސް 2016 ވަނަ އަހަރުގެ ސައުތު އޭޝިއަން ގޭމްސްގައި ވަނީ އިންޑިއާގެ ގުވަހާޓީގައި އެ ޓީމާ 0-0 އިން އެއްވަރުކޮށްފަ އެވެ. އެ ފަހަރު ރާއްޖެ ވަނީ 2-1 އިން ސްރީ ލަންކާގެ މައްޗަށް ވެސް ކުރިހޯދައިފަ އެވެ.

ފަހަކަށް އައިސް ބައިނަލްއަގްވާމީ މުބާރާތްތަކުގައި ރާއްޖޭގެ އަންހެން ޓީމުން ވަނީ ރަނގަޅު ނަތީޖާތަކެއް ނެރެފަ އެވެ. އެގޮތުން މިދިޔަ އަހަރު އޮތް އޭޝިއަން ގޭމްސް އާއި އޮލިމްޕިކް ކޮލިފައިންގެ އިތުރުން ސިންގަޕޫރު އިންވިޓޭޝަނަލް މުބާރާތުގައި ވަނީ ރަނގަޅު ކުޅުމެއް ދައްކައިފަ އެވެ. އަދި ސިންގަޕޫރު މުބާރާތުގެ ތިން ވަނަ ހޯދި އެވެ.