ފަލަސްތީނާއި އިޒްރޭލާ ދެމެދު މިއަދު ބަދަލުކުރަން ފެށި ހަމަލާތަކުގައި މިހާތަނަށް 300 އަށް ވުރެ ގިނަ މީހުން މަރުވެ އަދި އެތައް ސަތޭކަ ބަޔަކު ޒަހަމްވެއްޖެ އެވެ.
ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތުން އިޒްރޭލަށް މިއަދު ހެނދުނު އެއްގަމާއި ވައިގެމަގުން ހަމަލާދޭން ފެށުމާ އެކު، އިޒްރޭލް ސިފައިން ވަނީ ރައްދުގައި ފަލަސްތީނުގެ ގާޒާއަށް ރޮކެޓް ހަމަލާދޭން ފަށައިފަ އެވެ.
ބޭރުގެ މީޑިއާ ރިޕޯޓްތައް ބުނާގޮތުން މިހާތަނަށް ގާޒާއިން 200 އަށް ވުރެ ގިނަ މީހުން މަރުވެފައި ވާއިރު، ހަމާސްގެ ރޮކެޓް ހަމަލާތަކުގައި އިޒްރޭލްގެ 100 އަށް ވުރެ ގިނަ މީހުން ވަނީ މަރުވެފަ އެވެ. އަދި 1،000 އާ ގާތްކުރާ އަދަދެއްގެ މީހުން ވަނީ ޒަހަމްވެފަ އެވެ.
އިޒްރޭލްގެ ސިފައިންގެ ބައެއް މީހުން ހަމާސްއިން ވަނީ އަތުލައިގެންފަ އެވެ. އެހެންވެ، މީހުން ސަލާމަތް ކުރުމާއި ހަމާސް ޖަމާއަތުގެ ހަނގުރާމަވެރިންނާ ދެކޮޅަށް ވަރުގަދަ ހަމަލާތަކެއް ދޭނެ ކަމުގެ އިންޒާރު އިޒްރޭލުން ވަނީ ދީފަ އެވެ.
މިއީ ފަހުގެ ތާރީހެއްގައި އިޒްރޭލަށް ހަމާސްގެ މިހާ ވަރުގަދަ ހަމަލާތަކެއް އަމާޒުވި ފުރަތަމަ ފަހަރެވެ. ހަމާސްއިން ވަނީ އިޒްރޭލުން ހިފާފައިވާ ބައެއް ބިންތަކަށް ވެސް ވަދެގަނެ، އެތަންތަނުގެ ކޮންޓްރޯލް އަތުލައިފަ އެވެ.