މޮޑާނާގެ ވެކްސިންގެ ހުއްދަ އަށް އެދިއްޖެ

ވޮޝިންޓަން (ޑިސެމްބަރު 1) - އެމެރިކާގެ މޮޑާނާ ކުންފުނިން ކޮރޯނާވައިރަހަށް އުފެއްދި ވެކްސިންގެ ހުއްދަ އަށް އެދިއްޖެ އެވެ.

މޮޑާނާގެ ވެކްސިން އަށް ހުއްދަ ދޭނީ އެމްއާރްއެންއޭ ވެކްސިންގެ ޓްރަޔަލް ޑޭޓާ އަށް ބެލުމަށް ފަހު އެއީ ބޭނުންކުރަން ރައްކާތެރި އެއްޗެއްތޯ ރެގިއުލޭޓަރުން ބެލުމަށް ފަހު އެވެ. ކްލިނިކަލް ޓްރަޔަލްތަކުން ދައްކާފައިވާ ގޮތުގައި މޮޑާނާގެ ވެކްސިން އިން ކޮރޯނާވައިރަހުން 94 ޕަސެންޓް ރައްކާތެރިކަން ލިބެ އެވެ.

މޮޑާނާގެ ވެކްސިންއާ ދާދި އެއްގޮތަކަށް އުފެއްދި އެމެރިކާގެ ފައިޒާ ކުންފުނިން ވެސް ވަނީ އެ މީހުންގެ ވެކްސިންގެ ހުއްދަ އަށް އެދިފަ އެވެ. ފައިޒާގެ ވެކްސިންގެ ޑޭޓާ ސްޓަޑީ ކުރަން އެފްޑީއޭ އިން ނަގާނީ ކިހާ މުއްދަތެއް ކަމެއް އަދި ނޭނގެ އެވެ. ނަމަވެސް ލަފާ ކުރެވޭ ގޮތުން ޑިސެމްބަރު މަހުގެ ފުރަތަމަ ދެ ހަފުތާ ތެރޭ ވެކްސިން އަށް އެމެރިކާ ސަރުކާރުން ހުއްދަ ދޭނެ ކަމަށް ބެލެވެ އެވެ. ފައިޒާ އާއި ބަޔޯއެންޓެކުން ބުނީ ވެކްސިން އަށް މި މަހު ހުއްދަ ދިނުމާ އެކު "މަދު ގަޑިތަކެއްގެ ތެރޭގައި" ވެކްސިން ފޯރުކޮށްދޭން ފަށާނެ ކަމަށެވެ.

މޮޑާނާ އިން އުއްމީދު ކުރަނީ ހުއްދަ ލިބުމާ އެކު އެމެރިކާ އަށް 20 މިލިއަން ޑޯޒް ފޯރުކޮށްދިނުމަށެވެ. އަދި އެ ކުންފުނިން ބުނެފައި ވަނީ އަމާޒަކީ އަންނަ އަހަރު މުޅި ދުނިޔޭގައި ބޭނުން ކުރުމަށް އެއް ބިލިއަން ޑޯޒް އުފެއްދުން ކަމަށެވެ.

މޮޑާނާގެ ވެކްސިންގެ އެންމެ ފަހުގެ ޓްރަޔަލްގައި ވަނީ 30،000 މީހުން ބޭނުންކޮށްފަ އެވެ. އޭގެ ތެރޭގައި ހައި ރިސްކް މީހުން ވެސް ހިމެނެ އެވެ. ޓްރަޔަލްގައި ވަނީ 15،000 މީހުންނަށް އަސްލު ވެކްސިން އަދި ބާކީ ތިބި މީހުންނަށް އަސްލު ނޫން ވެކްސިން ދީފަ އެވެ. ޓްރަޔަލްގައި ސީރިއަސް އެއްވެސް މައްސަލައެއް ދިމާވެފައެއް ނުވެ އެވެ.

އެމެރިކާގެ ބަޔޯޓެކްނޮލޮޖީ ކުންފުނި، މޮޑާނާގެ ވެކްސިން ތައްޔާރުކޮށްފައި ވަނީ މިހާތަނަށް އަދި ވެކްސިނެއް އުފައްދާފައި ނުވާ ޓެކްނޮލޮޖީއެއް ބޭނުންކޮށްގެންނެވެ. ވެކްސިންގެ މައިގަނޑަކީ ކޮރޯނާވައިރަސްގެ ޖެނެޓިކްގެ ބައެއް ކަމަށްވާ އެމް-އާރުއެންއޭ އެވެ. ޓްރަޔަލްގައި ބޭނުންކުރި މީހުންގެ ހަށިގަނޑުގައި އެންޓިބޮޑީސް އުފެދުމުން އެ ނަގައި، ލެބޯރަޓަރީގައި ޓެސްޓް ހެދީ، ކޮރޯނާވައިރަސްގެ ސަބަބުން އިންފެކްޓްވެފައި ހުރި ސެލްތަކެއް ބޭނުންކޮށްގެންނެވެ. ނަތީޖާ ދެއްކީ ވައިރަސް އިތުރުވުން ހުއްޓުވާ ކަމެވެ. ވައިރަސްގެ ނުރައްކާ ބޮޑުވަނީ ހަށިގަނޑު ތެރެއަށް ވަދެ ސެލްތައް ބޭނުންކޮށްގެން ގިނަވެގަންނާތީ އެވެ. ވެކްސިނެއް ކާމިޔާބުވާނީ ވައިރަސްގެ އެ ގިނަވުން ހުއްޓުވައިދޭ ނަމަ އެވެ.

މޮޑާނާ އިން ބޭނުންކުރާ ޓެކްނޮލޮޖީގައި މިހާތަނަށް އެއްވެސް ވެކްސިނެއް ތައްޔާރުކޮށް އިންސާނުންނާ ހަމައަކަށް ނާދެ އެވެ. އާންމުކޮށް ވެކްސިން ހަދަނީ އަސްލު ވައިރަސް ބޭނުންކޮށްގެންނެވެ. އެކަމަކު ވައިރަސްގެ ޖެނެޓިކް މެޓީރިއަލްސް ހިމަނައިގެން ވެކްސިނެއް އުފެއްދިއްޖެ ނަމަ އެއީ ގިނަ އަދަދަކަށް ތައްޔާރުކުރަން ވެސް ފަސޭހަވާނެ އީޖާދެކެވެ.