ތިންވަނަ ކުއާޓަރުގައި ބީއެމްއެލްއަށް 492 މިލިއަން ރުފިޔާގެ ފައިދާ

ބީއެމްއެލްއަށް މި އަހަރުގެ ތިން ވަނަ ކުއާޓަރުގައި ސާފު ފައިދާގެ ގޮތުގައި 492 މިލިއަން ރުފިޔާ ލިބިއްޖެ އެވެ.

މިއީ ދެވަނަ ކުއާޓަރާ އަޅާބަލާއިރު 9.6 ޕަސެންޓު އިތުރު އަދަދެކެވެ. ބެންކުން މިއަދު އާއްމުކުރި ކުއާޓާ ރިޕޯޓުން ދައްކާ ގޮތުން އެ ބެންކުގެ ހިންގުމުގެ ފައިދާގެ ގޮތުގައި 718 މިލިއަން ރުފިޔާ ވަނީ ހޯދައިފަ އެވެ. މިއީ ކުރީ ކުއާޓަރާ އަޅާބަލާއިރު 2.9 ޕަސެންޓު އިތުރު އަދަދެކެވެ.

މި ރިޕޯޓުން ދައްކާ ގޮތުގައި ތިން ވަނަ ކުއާޓާ ނިމުނު އިރު ޖުމްލަ އެސެޓް ހުރީ 44.7 ބިލިއަން ރުފިޔާގަ އެވެ. ކެޕިޓަލް އެޑިކުއަސީ ރޭޝިއޯ 54 ޕަސެންޓުގަ އެވެ. މިއީ ގަވާއިދުން ލާޒިމްކުރާ މިންވަރަށް ވުރެ މަތީ އަދަދެއްކަން އެ ބެންކުން ފާހަގަކުރެ އެވެ.

ބީއެމްއެލްއިން ވަނީ ނިމިދިޔަ ކުއާޓާގައި ލޯނު ޕޯޓްފޯލިއޯ ހަރުދަނާކަމާ އެކު ކުރިއަރަމުން އަންނަ ކަން ފާހަގަކޮށްފަ އެވެ. އެގޮތުން ވަކިވަކި ފަރުދުންނަށާއި ވިޔަފާރިތަކަށް 1.2 ބިލިއަން ރުފިޔާގެ އާ ލޯނު ނިމުނު ކުއާޓަރުގައި ދީފައިވާކަން ފާހަގަކުރެ އެވެ.

ބީއެމްއެލް އިން މިދިޔަ ކުއާޓަރުގައި ވަނީ މުޖުތަމައުގެ ކުރިއެރުމަށް ވެސް ބޮޑު އިންވެސްމެންޓެއް ކޮށްފަ އެވެ. އެއީ، އިސްލާމިކް ޔުނިވާސިޓީ އޮފް މޯލްޑިވްސްގެ ސަނާބިލް މަޝްރޫއުއަށް ކުރި އިންވެސްޓްމަންޓެވެ. އޭގެ އިތުރުން މިދިޔަ ކުއާޓަރުގައި ބޭންކުން ވަނީ ބީއެމްއެލްއިން ދޭ އެއް މިލިއަން ރުފިޔާގެ ބޭންކް ފަންޑު ކާމިޔާބުކުރި ފަރާތްތައް ވެސް އިއުލާނުކޮށްފަ އެވެ.

އެ ފަންޑުގެ ދަށުން ތައުލީމާއި ތިމާވެއްޓާއި ކުޅިވަރު އަދި މުޖުތަމައުގެ ތަރައްގީއާ ގުޅޭ ދާއިރާތަކުން ފަސް މަޝްރޫއުއަކަށް އެހީދޭނެ އެވެ. މި މަޝްރޫއުތަކުގެ މަގުސަދަކީ ދެމެހެއްޓެނިވި އަދި އާ ގޮތްތައް ތައާރަފްކޮށް ކުރިއެރުވުމާއި އިޖުތިމާއީ ބޭނުންތަކަށް ފުރުސަތުތައް ހޯދައިދިނުމެވެ.

ކުއާޓާ ރިޕޯޓު ނެރުމާ ގުޅިގެން ބީއެމްއެލްގެ ސީއީއޯ މުހައްމަދު ޝަރީފު ވިދާޅުވީ މިދިޔަ ކުއާޓާގައި ލިބުނު މާލީ ކުރިއެރުމާ މެދު ހިތްހަމަޖެހޭ ކަމަށެވެ. އަދި މުޖުތަމައަށް އަމާޒުކޮށްގެން ހިންގި މަޝްރޫއުތަކާއި ވަކިވަކި ފަރުދުންނަށާއި ރާއްޖޭގެ ވިޔަފާރިތަކަށް އެހީތެރިވުމަށާއި ގައުމުގެ މުސްތަގުބަލް އާރާސްތުކުރަން ބޭންކުން ކުރާ މަސައްކަތާ މެދު ވެސް ހިތްހަމަޖެހުން ފާޅުކުރެއްވި އެވެ.

"މި އަހަރުގެ ބާކީ އޮތް މުއްދަތުގައި ވެސް މި ރަނގަޅު ނަތީޖާ ދެމެހެއްޓޭނެކަމުގެ އިތުބާރު އަޅުގަނޑުމެންނަށް އެބައޮތް،" އޭނާ ވިދާޅުވި އެވެ.

ބީއެމްއެލްއިން މުޅި ރާއްޖެ ހިމެނޭ ބޭންކިން ވިއުގައާ އެކު 20 އަތޮޅުގައި 39 ބްރާންޗް، 89 ސެލްފްސާވިސް ބޭންކިން ސެންޓަރު، 144 އޭޓީއެމް، ކޭޝް އޭޖެންޓުން މެދުވެރިކޮށް ދަނީ ހިދުމަތް ދެމުންނެވެ. އަދި އޮންލައިންކޮށް ވެސް ބެންކުގެ ހިދުމަތްތައް ދެ އެވެ.