އެސްޓީއޯ އަށް މިދިޔަ އަހަރު ލިބުނު ޖުމްލަ އާމްދަނީގެ އަދަދު 15.5 ބިލިއަން ރުފިޔާ އަށް އަރާފައިވާކަން އެ ކުންފުނީގެ ތަފާސްހިސާބުތަކުން ދަައްކައިފި އެވެ.
އެސްޓީއޯ އިން މިއަދު އާންމުކުރި ހިސާބުތަކުން އެނގޭ ގޮތުގައި އެއީ 2024 ގެ އާމްދަނީއާ އަޅާ ބަލާއިރު 98 މިލިއަން ރުފިޔާގެ އިތުރުވުމެކެވެ.
އެސްޓީއޯ އިން ބުނީ، އެ ކުންފުނީގެ މިދިޔަ އަހަރުގެ ވިޔަފާރި ރަނގަޅުވެފައިވާއިރު، އާމްދަނީ އާއި ފައިދާ އިތުރުވެ، ޓެކްސް އަށް ކެނޑުމުގެ ކުރިން މި އަހަރު ވަނީ 910 މިލިއަން ރުފިޔާ ލިބިފައި ކަމަށެވެ. ޓެކުހަށް ކެނޑުމަށް ފަހު، މި އަހަރުގެ ސާފު ފައިދާގެ ގޮތުގައި އެސްޓީއޯ އަށް ލިބުނީ 762 މިލިއަން ރުފިޔާ އެވެ. އެއީ، އޭގެ ކުރީ އަހަރާ އަޅާ ބަލާއިރު ތިން ޕަސެންޓުގެ އިތުރު ވުމެކެވެ.
އެސްޓީއޯގެ މިދިޔަ އަހަރުގެ ހަތަރުވަަނަ ކުއާޓަރުގެ ތަފާސްހިސާބުތައް މިއަދު އާންމުކޮށްފައިވާއިރު، އެ ހިސާބުތައް ދައްކާ ގޮތުން އެ ކުއާޓަރުގައި ޖުމްލަ އާމްދަނީގެ ގޮތުގައި ވަނީ 4.1 ބިލިއަން ރުފިޔާ ލިބިފަ އެވެ. އެއީ ކުރީ ކުއާޓަރާ އަޅާ ބަލާއިރު 8 ޕަސެންޓުގެ އިތުރުވުމެކެވެ.
އެސްޓީއޯ އިން ބުނި ގޮތުގައި ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ އެ ކުންފުނީގެ ހުރިހާ ދާއިރާތަކުގެ ވިޔަފާރި ރަނގަޅުވެފައިވުމެވެ.
އެގޮތުން، ތެލުގެ އާމްދަނީ ހަތަރު ޕަސެންޓަށް އަދި އެހެނިހެން އާމްދަނީ ވަނީ 19 ޕަސެންތަށް އިތުރުވެފަ އެވެ.
ޖުމްލަ އާމްދަނީ އިތުރުވުމާ އެކު، ޖުމްލަ ފައިދާގެ ގޮތުގައި މިދިޔަ އަހަރުގެ ފަހު ކުއާޓަރުގައި 671 މިލިއަން ރުފިޔާ އެސްޓީއޯ އަށް ލިބުނެވެ. މިއީ މީގެ ކުރީ ކުއާޓަރާ އަޅާ ބަލައި އިރު 11 ޕަސެންޓުގެ އިތުރުވުމެކެވެ.
ރާއްޖޭގައި އެންމެ ކާމިޔާބު ޕަބްލިކް ކުންފުނިތަކުގެ ތެރޭގައި ހިމެނޭ އެސްޓީއޯގެ ހިންގުމުގެ ފައިދާ ވެސް އޭގެ ކުރީ ކުއާޓަރާ އަޅާ ބަލައި މިދިޔަ އަހަރުގެ ހަތަރު ވަނަ ކުއާޓަރުގައި 11 ޕަސެންޓަށް އިތުރުވެ 322 މިލިއަން ރުފިޔާ ލިބިފައިވެ އެވެ.
އަދި ފައިނޭންސް ކުރުމުގެ ހަރަދު ކުޑަކުރުމާ ގުޅިގެން ޓެކްސް އަށް ކެނޑުމުގެ ކުރިން ވަނީ ސާފު ފައިދާގެ ގޮތުގައި 276 މިލިއަން ރުފިޔާ ލިބިފަ އެވެ.
"މިއީ މީގެ ކުރީ ކުއާޓާއާ އަޅާ ބަލައި އިރު 20 އިންސައްތައިގެ އިތުރުވުމެކެވެ. ޓެކުހަށް ކެނޑުމަށް ފަހު، މި ކުއާޓަގެ ސާފުފައިދާގެ ގޮތުގައި ވަނީ 244 މިލިއަން ރުފިޔާ ލިބިފަ އެވެ،" އެސްޓީއޯ އިން ބުންޏެވެ.