ސީލައިފް މޯލްޑިވްސް އިން 80 ހައުސިން ޔުނިޓް އެޅުމަށް ސަރުކާރާ އެކު، 2011 ވަނަ އަހަރު ވެފައިވާ އެއްބަސްވުމެއް އުވާލަން ނިންމުމުން، އޭގެ ގެއްލުމުގެ ބަދަލުގެ ގޮތުގައި ސަރުކާރުން އެ ކުންފުންޏަށް 185 މިލިޔަން ރުފިޔާ ދޭން އެއްބަސްވެއްޖެ އެވެ.
"މިހާރު" އަށް ކޮޕީ ލިބިފައިވާ ސެޓްލްމަންޓް އެގްރީމަންޓްގައި ސޮއި ކޮށްފައިވަނީ މިދިޔަ މަހުގެ 26 ވަނަ ދުވަހު އެވެ. ސަރުކާރުގެ ފަރާތުން ހައުސިން މިނިސްޓްރީގެ ޑެޕިއުޓީ މިނިސްޓަރުު އިބްރާހިމް ނަޒީމް ސޮއި ކޮށްފައިވާއިރު، ސީލައިފްގެ ފަރާތުން ސޮއި ކުރީ އެ ކުންފުނީގެ މެނޭޖިން ޑައިރެކްޓާ އަހުމަދު މޫސާ މުހައްމަދު އެވެ.
ސެޓްލްމަންޓް އެގްރީމަންޓްގައި ބުނެފައިވަނީ، 80 ހައުސިން ޔުނިޓުގެ އެއްބަސްވުން ބާތިލް ކުރަން ޖެހުނީ، އެ އެއްބަސްވުމުގެ ތެރެއިން ވ. ތިނަދު އިން ސީލައިފަށް ބިމެއް ދޫކުރަން އެއްބަސްވެފައިވީ ނަމަވެސް އެ ރަށު ކައުންސިލުން އެ ބިން ދޫކުރަން ދެކޮޅު ހެދުމުން ކަމަށެވެ. އެ ރަށުން ސީލައިފަށް ބިން ދޫކުރަން ހަމަޖެހިފައި އޮތީ ލަގްޒަރީ ވިލާތަކެއް ތަރައްގީ ކުރަން ކަމަށް ވެސް ބުނެފައިވެ އެވެ.
މިކަމާ ގުޅޭ ގޮތުން ވ. ތިނަދޫ ކައުންސިލް މެމްބަރަކު ވިދާޅުވީ، ސީލައިފަށް އެ ރަށުން ބިން ދޭން ސަރުކާރުން އެއްބަސްވީ ކައުންސިލާ އެއްވެސް މަޝްވަރާއެއް ނުކޮށް ކަމަށެވެ. އަދި އެކަމަށް ކައުންސިލުގެ އިތުރުން ރަށު ރައްޔިތުން ވެސް ދެކޮޅު ކަމަށެވެ.
"ރައީސް ނަޝީދުގެ ސަރުކާރުން އޮތީ 10،000 އަކަފޫޓުގެ ބިމެއް ލަގްޒަރީ ވިލާ އަޅަން ދޫކުރަން ނިންމާފައި... ނަމަވެސް، ސަރުކާރުން ސީލައިފަށް ދޭން އުޅުނީ ރަށުގެ ތިން ބައިކުޅަ އެއް ބައި ވަރުގެ ބޮޑު ސަރަހައްދެއް،" ކައުންސިލަރު ވިދާޅުވި އެވެ.
އޭނާ ވިދާޅުވީ އެ ބިން، ސީލައިފަށް ހަވާލު ކުރަން ހައުސިން މިނިސްޓްރީން ދެތިން ފަހަރަކު އެެ ރަށަށް ގޮސް މަސައްކަތް ކުރި ކަމަަށެވެ. އަދި ރައްޔިތުން އެކަމާ ދެކޮޅަށް ނިކުމެ "ހަމަނުޖެހުން ހިނގާ ވަރަށް" އެކަން ދިޔަ ކަމަށް ވެސް ވިދާޅޅުވި އެވެ.
ސެޓްލްމަންޓް އެގްރީމަންޓްގައި ބުނެފައިވަނީ، ސަރުކާރާ އެކު ސީލައިފުން އޭރު ވެފައި އޮތް އެއްބަސްވުމުގެ ދަށުން އެ ކުންފުނިން 3.5 މިލިޔަން ޑޮލަރު ހަރަދު ކޮށްފައިވާ ކަމަށެވެ. ސަރުކާރުން އެ ކުންފުންޏަށް ދޭން ނިންމި 12 މިލިޔަން ޑޮލަރު (185 މިލިޔަން ރުފިޔާ) އަކީ ހަރަދު ކުރި އަދަދުގެ އިތުރުން ގެއްލުމުގެ ބަދަލުގެ ގޮތުގައި ދޭ އެއްޗެކެވެ.
އެ ފައިސާ ސީލައިފް މޯލްޑިވްސް އަށް ދޫކުރުމަށް، އެއްބަސްވުން އެކުލަވާލުމަށް ފަހު ހައުސިން މިނިސްޓްރީން ވަނީ ފިނޭންސް އަށް ވެސް ހުށަހަޅާފަ އެވެ. އަދި އެ ފައިސާ ސީލައިފް މޯލްޑިވްސް އަށް ދޭނީ 12 ޕޭމަންޓަކަށް ބަހާލައިގެންނެވެ. ފުރަތަމަ ބުރުގައި، 15،420،000ރ. ދެ ވަނަ ބުރުގައި 30،840،000ރ. ދޭން ނިންމާފައިވާއިރު، ބާކީ 10 ފަހަރު ދޭނީ، ކޮންމެ ފަހަރަކު 13،878،000 ރުފިޔާ އެވެ.
އުވާލި އެއްބަސްވުމުގެ ދަށުން އަޅަން ނިންމި 80 ހައުސިން ޔުނިޓަކީ ކޮން ތަނެއްގައި އަޅަން ނިންމި ހައުސިން ޔުނިޓުތަކެއް ކަމެއް ސާފެއް ނުވެ އެވެ. އަދި މިކަމާ ގުޅޭ ގޮތުން ސީލައިފްގެ ބަހެއް ވަނީ ލިބޭ ގޮތް ނުވެފަ އެވެ.
ސީލައިފް މޯލްޑިވްސް އަކީ، 2014 ވަނަ އަހަރު ހުޅުމާލޭގައި ރައީސް އަބްދުﷲ ޔާމީން ބިންގާ އެޅުއްވި 3،000 ހައުސިން ޔުނިޓު އެޅުމުގެ މަސައްކަތް ކުރަމުން އަންނަ ސީލައިފް ގްލޯބަލްގެ ކުންފުންޏެކެވެ. އެ ދެ ކުންފުނީގެ މެނޭޖިން ޑައިރެކްޓަރަަކީ ވެސް އަހުމަދު މޫސާ މުހައްމަދެވެ.
ސީލައިފް ގްލޯބަލް އިން ހުޅުމާލޭގައި އަޅާ ފްލެޓްތަކުގެ މަސައްކަތްތައް ވެސް ވަނީ ދިގުލައިގެން ގޮސްފަ އެވެ. އަދި އެކަމާ ގުޅިގެން އާންމުންގެ ޝަކުވާތައް ވެސް ވަނީ އިތުރުވެފަ އެވެ.
