ހޮލޯގޯ ވޯލްޑް: އޭއާރުގެ ހިތްގައިމުކަމާ އެކު ކިޔަވައިދިނުމަށް އިތުރު ފުރިހަމަ ކަމެއް

އައިލެންޑާސް އެޑިއުކޭޝަން ގުރޫޕަކީ ރާއްޖޭގެ ތައުލީމީ ނިޒާމަށް ބޮޑެތި ކުރިއެރުންތަކާއި ބަދަލުތައް ގެނެސްދީފައިވާ ކުންފުންޏެކެވެ. ބިލަބޮންގް ހައި ސްކޫލުން ފެށިގެން ގޮސް ކެންގަރޫ ކިޑްސްގެ ސްކޫލްތަކެވެ. އެ ކުންފުނިން ރާއްޖޭގެ އެކި ސަރަހައްދުތަކުގައި ހިންގަމުން އަންނަ އިންޓަނޭޝަނަލް ފެންވަރުގެ އިގްރާ ޕްރީ ސްކޫލްތަކެވެ. އަދި ޓެކްނޮލޮޖީގެ ކުރިއެރުމާ އެކު، ކިޔަވާ ކުދިންނަށް އޮންލައިންކޮށް އުނގެނުމުގެ ދޮރު ހުޅުވާލަދިން ޓީޗިން ޓިއުބެވެ.

އެ ކަންކަމުގެ އިތުރުން ކިޔަވާ ކުދިންނާއި ޓީޗަރުންނަށް އަނެއްކާ ވެސް މިއޮތީ އެ ކުންފުނިން ބޮޑު ހަދިޔާއެއް ދީފަ އެވެ؛ އައިލެންޑާސްގެ ހޮލޯގޯ ވޯލްޑަށް މަރުހަބާ އެވެ.

ހޮލޯގޯ އިން މިވަނީ ތަފާތު ކަމެއް ފަށާފަ އެވެ. އޮގްމެންޓެޑް ރިއަލިޓީ (އޭއާރު)ގެ ހިތްގައިމުކަމާ އެކު، ކިޔަވައިދިނުމަށް ބޮޑު ލުޔެއް ގެނެސްދެނީ އެވެ. އަދި ކިޔަވާ ކުދިންނަށް، ކިޔަވައިދޭ އެއްޗެއް ނަގައިގަންނަން އެތައް ހާސް ގުނައެއް ފަސޭހަ ކޮށްދެނީ އެވެ.

"އޭއާރުން ޑިޖިޓަލް އިންފޮމޭޝަން އޯވަލޭ މި ކުރަނީ ކެމެރާ ލެންސް މެދުވެރިކޮށް، ރިއަލް ވޯލްޑް އޮބްޖެކްޓްސްގައި. މިސާލަކަށް ސްނެޕްޗެޓްގައި ދޫ ނެރެ، ތަފާތު ކަންކަން ކުރެވޭ ފިލްޓާ ތަކަކީ މި ޓެކްނޮލޮޖީ،" ހޮލޯގޯގެ ސީއީއޯ އީދަމް ރަޝީދު ވިދާޅުވި އެވެ.

މިސާލަކަށް ސައިންސް ކިޔަވާ ކުދިންނަށް ދެނެގަންނަން އުނދަގޫ މޮލެކިއުލެއްގެ ތްރީޑީއެއް ހޮލޯގޯ އިން ބެލިދާނެ އެވެ. އަދި ދަރިވަރުންގެ އަތުގެ އިޝާރާތުން އެ މޮލެކިއުލް ކުޑަކޮށް، ބޮޑުކޮށް ގޮތްގޮތަށް އަނބުރައި ހެދޭނެ އެވެ. އަދި އޭގެ އެތެރޭގެ ބައިތައް ބަލައި، އެ ބައިތަކާ ބެހޭ މައުލޫމާތުތައް ހޯދޭނެ އެވެ.

އެ އެއްޗަކާ ބެހޭ ތަފްސީލީ މައުލޫމާތުތައް ކިޔަން ބޭނުން ނުވާ ދަރިވަރުންނަށް އެ މައުލޫމާތުތައް ހޮލޯގޯ މެދިވެރިކޮށް އަޑު ވެސް އެހިދާނެ އެވެ. އަދި ޓީޗަރެއް ނަމަ އެ އޮބްޖެކްޓަކާ ބެހޭ މައުލޫމާތުތައް އެ ކަރިކިއުލަމަކާ އެއްގޮތަށް އެޕަށް އަޅައި، އެ ޓީޗަރެއްގެ ދަރިވަރުންނަށް ހިއްސާ ކުރެވޭނެ އެވެ.

ޓީޗިން ޓިއުބްގެ ކާމިޔާބީއާ އެކު ޑިޖިޓަލް އެޑިއުކޭޝަނަށް ބޮޑު އިންގިލާބެއް ގެންނަމުން އަންނަ އައިލެންޑާސް އިން ހޮލޯގޯ ޓެސްޓް ކުރީ ސްވިޑެންގެ އެޕަލް ޑިސްޓިންގުއިޝް ސްކޫލްތަކުގަ އެވެ. އަދި އެ ސްކޫލުތަކުން ޓެސްޓް ކުރުމަށް ފަހު އިނގިރޭސިވިލާތުގެ ސްކޫލްތަކެއްގައި ވެސް ހޮލޯގޯ ވަނީ ޓެސްޓް ކޮށްފަ އެވެ.

މި އެޕްލިކޭޝަން ރަސްމީކޮށް މާކެޓަށް ނެރުނީ އަބޫދާބީގައި މިދިޔަ ހޯމަ ދުވަހު ބޭއްވި ބެޓް ކޮންފަރެންސް މިޑްލްއީސްޓް އެންޑް އެފްރިކާގަ އެވެ. އެ ކޮންފަރެންސަށް ހޮލޯގޯ ދިޔައީ ރަސްމީ ދައުވަތެއްގައި، ކޮންފަރެންސްގެ ޕާޓްނަރެއްގެ ގޮތުންނެވެ.

ތައުލީމީ ދާއިރާގައި ބޭއްވޭ އެންމެ ވަރުގަދަ ކޮންފަރެންސްތަކުގެ ތެރޭގައި ހިމެނޭ އެ ކޮންފަރެންސްގެ ޕާޓްނަރަކަށް ހޮލޯގޯ ވެފައިވާއިރު، މިއީ ބޭރުގައި ބޭއްވޭ މިފަދަ ބޮޑު ކޮންފަރެންސެއްގެ ޕާޓްނަރަކަށް ދިވެހި ކުންފުންޏަކުން ވެގެންދިޔަ ފުރަތަމަ ފަހަރު ކަަމަށް އައިލެންޑާސް އިން ވަނީ ބުނެފަ އެވެ.

ރާއްޖޭން ބޭރުގައި ޓެސްޓް ކުރެވި، ބޭރުގައި ބާއްވާ ފެއާއެއްގެ ތެރެއިން އެޕް މާކެޓަށް ނެރެވުނު ނަމަވެސް މި އެޕް ތައްޔާރުކުރީ ހުސް ދިވެހިންނެވެ. އަދި އެޕްގައި ބޭނުންކުރާ ތްރީޑީ ޑިޒައިންތަކަކީ ވެސް ދިވެހި ޒުވާނުންތަކެއް ހިންގަމުން އަންނަ ކުންފުންޏެއް ކަމަށްވާ ޕްރޯ ޑިޒައިނާސްގެ އުފެއްދުންތަކެވެ.

އެޕަލް އިން މިދިޔަ ސެޕްޓެންބަރު މަހު ނެރުނު އޭއަރު ކިޓް ބޭނުން ކޮށްގެން މިހާ ފުޅާ ދާއިރާއެއްގައި ތައުލީމީ ދާއިރާ ބަދަލުކޮށްލަން ނިކުތް އެންމެ ފުރަތަމަ ކުންފުނިތަކުގެ ތެރޭގައި ހޮލޯގޯ ހިމެނެ އެވެ. އެޕަލް ސްޓޯރުން މިހާރު ޑައުންލޯޑް ކުރެވޭ ހޮލޯގޯ އެޕާ އެކު، ރާއްޖެއަށް ވެސް މި ވަނީ ބޮޑު ފަހުރެއް ލިބިގެން ގޮސްފަ އެވެ.