އަންނަ އާދީއްތަ ދުވަހު ބާއްވާ ރިޔާސީ އިންތިހާބުގެ ވޯޓު ކަރުދާސް ޗާޕުކުރީ އެކަމަށް ކުރިމަތިލި ދެ ވަނަ ޗާޕްހާނާ އިން ހުށައެޅި އަގަށް ވުރެ 3 މިލިއަން ރުފިޔާ ބޮޑު އަގެއްގައި، އެމް ސެވަން ޕްރިންޓާސް އިން ކަން "މިހާރު" އަށް އެނގިއްޖެ އެވެ.
އިންތިހާބުގެ ވޯޓު ކަރުދާސް ޗާޕުކުރަން ރާއްޖޭގެ ދެ ޗާޕްހާނާ އިން ކުރިމަތިލީ ިއރު އެންމެ ކުޑަ އަގެއް ހުށަހެޅީ ނޮވެލްޓީންނެވެ. ރާއްޖޭގެ އެންމެ ގިނަ ދުވަސް ވީ އަދި އެންމެ ބޮޑު ޗާޕުޚާނާ އިން ހުށަހެޅީ 25 ވޯޓުކަރުދާސް ހިމެނޭ ފޮތެއް ޗާޕުކުރަން 63.80ރ. އެވެ. އެކަމަކު 25 ކަރުދާސް ހިމެނޭ ފޮތެއް ޗާޕްކުރެވޭނެ އަަގަކަށް އެމް ސެވަން އިން ހުށަހެޅީ 345.85ރ. އެވެ.
ވޯޓު ކަރުދާސްތައް ހުންނަނީ 25 ކަރުދާހުން 25 ކަރުދާހުން ފޮތެއްގެ ގޮތަށް ބައި އަޅައިފަ އެވެ.
މީގެ ކުރިން ރާއްޖޭގައި ބޭއްވި ހުރިހާ ރިޔާސީ އިންތިހާބަކާއި ރައްޔިތުން މަޖިލީހުގެ ގިނަ އިންތިހާބުތަކާއި ލޯކަލް ކައުންސިލްގެ ގިނަ އިންތިހާބުތަކުގެ ވޯޓު ކަރުދާސް ޗާޕުކުރީ ނޮވެލްޓީންނެވެ.
ދެ ޗާޕްހާނާގެ އަގުގައި އެހާ ބޮޑު ތަފާތެއް ހުރި އިރު، ބޮޑު އަގު ހުށައެޅި އެމް ސެވަން އަށް އެ މަސައްކަތް ހަވާލުކުރި ސީދާ ސަބަބެއް އިލެކްޝަންސް ކޮމިޝަނަކުން ނުބުނެ އެވެ. އެ ކޮމިޝަނުން ހަމައެކަނި ބުނީ "ވޯޓު ކަރުދާހާ ގުޅޭ މައުލޫމާތު ގާނޫނުގައި ވާ ގޮތަށް ހާމަކުރަން ޖެހޭ މައުލޫމާތު ހާމަކުރާނެ" ކަމަށެވެ.
އެމް ސެވަންގެ މެނޭޖިން ޑިރެކްޓަރު މުހައްމަދު އަބްދުއް ސައްތާރު ވިދާޅުވީ ވޯޓު ކަރުދާސް ޗާޕްކުރުމުގެ އަގު ބޮޑުވި ސަބަބުތަކުގެ ތެރޭގައި އޭގައި ހިމެނޭ ސެކިއުރިޓީ ފީޗާސްތައް ހިމެނޭ ކަމަށެވެ.
"އަޅުގަނޑުމެން މިފަހަރު މިކަމަށް ކުރިމަތިލީ ދުރާލައި ސެކިއުރިޓީ ފީޗާސްތަކަށް ތައްޔާރުވުމަށް ފަހު. އެހާ ވަރުގެ ސެކިއުރިޓީ ފީޗާސްތަކެއް ވޯޓު ކަރުދާހުގައި ހިމަނާފައި ހުންނާނެ. އެ ކަރުދާހެއް ކައުންޓަ ފީޓެއް ނުކުރެވޭނެ،" ސައްތާރު ވިދާޅުވި އެވެ.
އޭނާ ވިދާޅުވީ ވޯޓު ކަރުދާސް ޗާޕްކުރަން ހުށަހެޅި ޖުމްލަ އަގު ހަތަރު މިލިއަނަށް ވުރެ ބޮޑުނުވާނެ ކަމަށެވެ.
"މިހާރު"ން ބެލިބެލުމުން އެނގުނީ އެމް ސެވަން އިން ހުށަހައެޅި އަގަށް ވޯޓު ކަރުދާސް ޗާޕްކުރަން ގާތްގަނޑަކަށް 3.7 މިލިއަން ރުފިޔާ ހޭދަވާނެ ކަމަށެވެ.
މިފަހަރުގެ އިންތިހާބުގައި ވޯޓުލުމުގެ ހައްގު ލިބިފައިވާ 263،181 މީހުންނެވެ. ވޯޓުލުމުގެ ހައްގު ލިބިފައިވާ މީހުންގެ އަދަދުގެ އިތުރަށް ފަސް ޕަސެންޓް ކަރުދާސް ޗާޕުކުރަން، ގާނޫނުން ހުއްދަކުރެ އެވެ. އެހެންކަމުން އިތުރަށް ޗާޕުކުރި 13،159 ކަރުދާހާ އެކު ޖުމްލަ 276،340 ކަރުދާސް ޗާޕުކުރަން ޖެހެ އެވެ. އެހެންކަމުން އެމް ސެވަން އިން އެ އެއްޗެހި ޗާޕްކުރުމުގެ އަގު 3،822،887.56ރ. އަށް އަރަ އެވެ.
ނޮވެލްޓީން ހުށަހެޅި އަގަށް ހަވާލުކުރި ނަމަ އީސީން ދައްކަން ޖެހޭނީ ގާތްގަނޑަކަށް 705،219.68ރ. އެވެ. މިއީ 3.7 މިލިއަން ރުފިޔާގެ ކުޑަ އަގެކެވެ.
ވޯޓު ކަރުދާސް ޗާޕުކުރަން ހަވާލުކުރުމުގައި އީސީން މާކްސް ދިނީ އަގަށް 50 ޕަސެންޓް އަދި އެންމެ ރަނގަޅު ސެކިއުރިޓީ ފީޗާސް ހިމަނާ ބަޔަކަށް 50 ޕަސެންޓެވެ.
އެމް ސެވަން އިން މީގެ ކުރިން ވެސް ވަނީ ބައެއް އިންތިހާބުތަކުގެ ވޯޓު ކަރުދާސް ޗާޕްކޮށްފަ އެވެ. އެގޮތުން އެންމެ ފުރަތަމަ ވޯޓުކަރުދާހަކަށް ޗާޕުކުރީ، ދެ އަހަރުގެ ކޮންޓްރެކްޓެއްގެ ދަށުން، ލޯކަލް ކައުންސިލް ބައި އިލެކްޝަންތަކާއި ރައްޔިތުންގެ މަޖިލީހުގެ އެންމެ ފަހުން އޮތް ބައި އިލެކްޝަނާއި އެންމެ ފަހުން ބޭއްވި ލޯކަލް ކައުންސިލް އިންތިހާބުގެ ވޯޓު ކަރުދާހެވެ.
"މިހާރު" އަށް އެނގިފައިވާ ގޮތުގައި މިފަހަރުގެ ވޯޓު ކަރުދާސް ޗާޕުކުރިއިރު އެމް ސެވަން އިން ވީޑިއޯ ކުރުމުގެ އިތުރުން، ދެ ގަޑިން ގަޑިން ޑިއުޓީ ބަދަލުވާ ގޮތަށް ފުލުހުން ޗާޕް މެޝިންތައް ކައިރީގައި ފޯރިއަށް ތިއްބެވެ. އޭގެ އިތުރުން ޗާޕް މަސައްކަތް ކުރިއަށް ދާ ގޮތް އީސީން ވެސް ބަލާފައިވާ ކަމަށް އެނގިފައިވެ އެވެ.
