ޔޫޓިއުބް ފަތަހަކުރުމުގެ ހަނގުރާމަ މިހާރު އޮތީ ވަރަށް ފޯރި ގަދަ ހިސާބެއްގަ އެވެ. ވީޑިއޯތައް ބަލަން އެންމެ މަގުބޫލު ޕްލެޓްފޯމް ކަމަށްވާ ޔޫޓިއުބްގެ ސަބްސްކްރައިބުން އެންމެ ގިނައީ އިންޑިއާގެ ކުންފުނި ޓީ ސީރީޒާއި ސްވިޑްންގެ މަޝްހޫރު ޒުވާން ޔޫޓިއުބާ ޕިއުޑިޕައިގަ އެވެ.
މި މަހުގެ 9 ވަނަ ދުވަހާ ހަމައަށް ސަބްސްކްރައިބުންގެ އަދަދަށް ބަލާއިިރު، ޓީ ސީރީޒާއި ޕިއުޑިޕައި ސަބްސްކްރައިބަރުންގެ އަދަދު ވަނީ އެއްވަރުވެފަ އެވެ. އެއީ ކޮންމެ ބަޔަކަށް 88.5 މިލިއަނެވެ. ޖުމްލަ ވިއުސް އަށް ބަލާއިރު ކުރީގައި އޮތީ އެންމެ ގިނަ ލަވަތައް އެއް ޕްލެޓްފޯމަކުން ފެނިގެންދާ ޓީ ސީރީޒެވެ. އެއީ މި މަހުގެ 9 ވަނަ ދުވަހާ ހަމައަށް 64.0 ބިލިއަން ވިއުސްއާ އެކީގަ އެވެ.
އެ މުއްދަތަށް ބަލާ އިރު، ޕިއުޑިޕައިގެ ޖުމްލަ ވިއުސްއަކީ 20.6 ބިލިއަނެވެ.
އެހެންވެ މިހާރު ކުރި ހޯދުމުގެ ހަނގުރާމައިގެ ފޯރި ގަދަވެ، އިންޑިއާގެ މަޝްހޫރު ސެލެބްރިޓީން މިހާރު ވަނީ ޓީ ސީރީޒަށް ފަހަތަ ހޯދައި ދޭން ކެމްޕޭން ކުރަމުންނެވެ. އަނެއްކޮޅުން ޓީ ސީރީޒް ހިންގުމާ މިހާރު ހަވާލުވެ ހުރެ ޕްރޮޑިއުސަރު ބުޝަން ކުމާރު ވަނީ ޓީ ސީރީޒް ސަބްސްކްރައިބް ކުރަން އެދި ޓްވިޓާގައި ވީޑިއޯ މެސެޖެއް ވެސް ހިއްސާކޮށްފަ އެވެ.
މިއާ އެކު އިންޑިއާގައި މިހާރު އަންނަނީ #ބާރަތުވިންސްޔޫޓިއުބްގެ ނަމުގައި ވަރުގަދަ ކެމްޕޭނެއް ވެސް ހިންގަމުންނެވެ.
އިންޑިއާގެ އުފެއްދުންތަކަށް މިދިޔަ އަހަރު ފާޑުކިޔައި ޖޯކް ޖަހައި، ވީޑިއޯތައް އާންމު ކުރުމުން ޕްރޮޑިއުސަރު އެކްތާ ކަޕޫރް ވެސް ޓްވިޓާގައި ބަވައިލި ޕިއުޑިޕައި، 29، ވެސް އަންނަނީ ވަރަށް ވަރުގަދަ އަށް، ޓީ ސީރިޒް ބަލިކުރަން ކެމްޕޭން ކުރަމުންނެވެ. އޭނާގެ މި މަސައްކަތުގެ ތެރެއިން ހެކަރުންގެ އެހީގައި ޓީ ސީރީޒަށް ހަމަލާދޭ ކަމުގެ ތުހުމަތު ވެސް މި ދޭތެރެ އިން ކުރެވިފައިވެ އެވެ.
އެހެން ވިޔަސް ސުވާލަކީ ޓޫބިއުބް ފަތަހަކޮށް، ރަސްކަން ކުރާނީ ކާކުތޯ އެވެ؟ އެއީ ޓީ ސީރީޒާއި ބުޝަންތޯ ނޫނީ ޕިއުޑިޕައިތޯ މާ ލަހެއް ނުވެ ކަނޑައެޅިގެން ދާނެ އެވެ.