ޝިޕިން ވިޔަފާރީގެ ތެރެއަށް އެސްޓީއޯ ވަދެއްޖެ ނަމަ ރާއްޖެ އިން ލިބެން ހުންނަ ތަކެތީގެ އަގުހެޔޮ ކުރުމުގެ ފުރުސަތު ބޮޑުވާނެ ކަމަށް އެ ކުންފުނީގެ މެނޭޖިން ޑިރެކްޓަރު ހުސައިން އަމްރު ރޭ ވިދާޅުވެއްޖެ އެވެ.
އެސްޓީއޯގެ އަހަރީ އާންމު ޖަލްސާގައި އަމްރު ވިދާޅުވީ، އެ ކުންފުނިން ޝިޕިން ވިޔަފާރި އަށް ވަނުމަށް ނިންމާފައިވާއިރު، އޭގެ ނަތީޖާ އަކަށް ވާނީ އެސްޓީއޯ އިން މިހާރު ގެންނަ ތަކެތީގެ އަގު ކުޑަވުން ކަމަށެވެ.
"އެސްޓީއޯ އިން ކޮންމެ މަހަކު އެބަގެނޭ 200 ކޮންޓެއިނަރު. މީގެ ސަބަބުން އަޅުގަނޑުމެންނަށް އަގު ހެޔޮކޮށް ތަކެތި ގަނެވޭނެ،" އޭނާ ވިދާޅުވި އެވެ.
އަމްރު ވިދާޅުވީ، ޝިޕިންގެ އިތުރުން ފުޑް ޕްރޮސެސިން ވިިޔަފާރި އަށް އެސްޓީއޯ އިން ވަނުމުގެ ވިސްނުން ވެސް ގެންގުޅޭ ކަމަށެވެ. އެގޮތުން، ދަނޑުވެރިކަމުގެ ވިޔަފާރި އަށް ވަނުމުގެ ވިސްނުން ވެސް ގެންގުޅޭ ކަމަށް އޭނާ ވިދާޅުވި އެވެ.
"އަޅުގަނޑުމެންގެ ވިސްނުން އެބަހުރި ދަނޑުވެރިކަން ފުޅާކޮށް، ދަނޑުވެރިކަމުން ލިބޭ އެއްޗެއް އިތުރުކޮށް، އެސްޓީއޯ އިން ޑިސްޓްރިބިއުޝަން ތެރެއަށް ވަދެފި ނަމަ އެސްޓީއޯ އަށް ވެސް ފައިދާވާނެ،" އަމްރު ވިދާޅުވި އެވެ.
އެސްޓީއޯ އިން އާ ވިޔަފާރިތަކަށް ވަނުމުގެ ވިސްނުން ގެންގުޅޭ އިރު މިހާރު ވެސް އެ ކުންފުނިން އަންނަނީ އެކި ދާއިރާތަކުން ވިޔަފާރި ކުރަމުންނެވެ. އެގޮތުން، ތެލާއި އާންމު ވިޔަފާރި އާއި އިންޝުއަރެންސާއި މަސްވެރިކަމުގެ ދާއިރާ އިން ވިޔަފާރި ކުރެ އެވެ.