އުރީދޫގެ ވާޗުއަލް ދުވުމަށް ބޮޑު ތަރުހީބެއް

މިދިޔަ މަހުގެ 28-31 އަށް އުރީދޫން ބޭއްވި ވާޗުއަލް ދުވުމަށް ބޮޑު ތަރުހީބެއް ލިބުނު ކަމަށް އެ ކުންފުނިން މިއަދު ބުނެފި އެވެ.

އުރީދޫ "އަތޮޅު ދުވުމަކީ" މިހާތަނަށް ރާއްޖޭގައި ބޭއްވި ފުރަތަމަ ވާޗުއަލް ދުވުމެވެ. މި ދުވުމުގައި 20 އަތޮޅުން 5،800 މީހުން ވަނީ ބައިވެރިވެފަ އެވެ. އޭގެ ތެރޭގައި ދިވެހިންގެ އިތުރުން ބިދޭސީން ވެސް ހިމެނެ އެވެ.

މިއީ ރާއްޖޭގެ ކޮންމެ ހިސާބެއްގައި ތިބެގެން ވެސް ބައިވެރިވެވޭ ގޮތަށް ކުރިއަށް ގެންދިޔަ ދުވުމެކެވެ. މި ދުވުމުގެ ބައިވެރިން އެ މީހެއްގެ ރަށުގައި ތިބެގެން ފަސް ކިލޯމީޓަރު އޮންލައިން ރޫޓެއްގައި ދުވުމުގެ ފުރުސަތު ވަނީ ދީފަ އެވެ.

މި ދުވުން ކުރިއަށް ދިޔައީ ދެ ކެޓަގަރީއަކަށް ބަހާލައިގެންނެވެ. އެއީ 15 ކިލޯމީޓަރާއި ފަސް ކިލޯމީޓަރުގެ ކެޓަގަރީ އެވެ. ފަނަރަ ކިލޯ މީޓަރުގެ ދުވުމުގައި ބައިވެރިވީ އުރީދޫން ކުރިން އެޕްރޫވް ކޮށްފައިވާ 20 ދުވުންތެރިއެކެވެ. ނަމަވެސް ފަސް ކިލޯމީޓަރުގެ ދުވުމުގައި ހަ އަހަރުން މަތީގެ 5،800 މީހުން ބައިވެރިވި އެވެ.

އުރީދޫގެ އެކްޓިން ޗީފް ކޮމާޝަލް އޮފިސަރު ހުސެއިން ނިޔާޒު ވިދާޅުވީ ކޮވިޑް-19އާ ގުޅިގެން ގިނަ ބަޔަކަށް އެއް ތަނަކަށް އެއް ނުވެވުނު ނަމަވެސް ވާޗުއަލްކޮށް ގިނަ ބަޔަކު ބައިވެރިވެ، އެއްބައިވަންތަކަން ފެނުމަކީ އެ ކުންފުންޏަށް ލިބުނު އުފަލެއް ކަމަށެވެ. އަދި މި ދުވުމުގައި ބައިވެރިންގެ ފަރާތުން ފެނުނު ހިތްވަރަށް އޭނާ ތައުރީފްކުރެއްވި އެވެ.

"މިފަދަ ދަނޑިވަޅެއްގައި، އެއް އިވެންޓެއްގައި އެކި ހިސާބުތަކުން މީހުން ބައިވެރިވެ، އެ އެއްބައިވަންތަކަން ފެނިގެންދިޔުމަކީ އަޅުގަނޑުމެންނަށް ލިބުނު ވަރަށް ބޮޑު އުފަލެއް. ހަމައެއާ އެކު މި ރަންގައި ބައިވެރިވާން އެތައް ބަޔަކު ތައްޔާރުވެ، އަމިއްލަ ލަނޑުދަނޑިތައް ހާސިލް ކުރާ ތަން ފެނިގެން ދިޔަ. މިއީ ވެސް އަޅުގަނޑުމެންނަށް ވަރަށް އުފާވެރި މަންޒަރެއް،" ނިޔާޒު ވިދާޅުވި އެވެ.

އަތޮޅު ދުވުމުގެ ޑައިރެކްޓަރު ހުސެއިން ޝުޖާއު ބުނީ މި ދުވުމުން ފެނުނީ ދުޅަހެޔޮ ސިއްހަތެއްގައި ތިބެން ގިނަ ބައެއްގެ މެދުގައި ޝައުގުވެރިކަން އުފެދިފައިވާ ކަން ކަމަށެވެ. މި ދުވުމުގައި ގިނަ ބަޔަކު ފުރަތަމަ ފަހަރަށް ފަސް ކިލޯމީޓަރު ހަމަކުރި ކަމަށް ވެސް އޭނާ ބުންޏެވެ.

ދުވުން ފެށުމާ އެކު ދުވުމުގެ ތެރެއިން ނަގާފައިވާ އުފާވެރި، ހިތްގައިމު މަންޒަރުތައް އަދި ފަސް ކިލޯމީޓަރު ހަމަކުރިކަން އަންގައި ދިނުމަށް ދުވި ރޫޓުގެ ސްކްރީން ޝޮޓްތަކާއި ވާޗުއަލް މެޑަލްތައް ދުވުމުގެ ބައިވެރިން ވަނީ ސޯޝަލް މީޑިއާގައި އާއްމުކޮށްފަ އެވެ. އެހެންކަމުން ދުވުންތެރިންނަށް އިތުރު ހިތްވަރެއްގެ ގޮތުން އުރީދޫން ވަނީ އަތޮޅު ދުވުމުގެ ޕާޓްނަރުންގެ ތެރެއިން ހެބިޓަސް ފްރެޝް އާއި ދަ މެރަތަން ޝޮޕް އަދި މެޑްމެކްސް ބިސްޓްރޯއާ ގުޅިގެން ނަސީބުވެރި ފަރާތްތަކަށް ހާއްސަ އިނާމްތަކެއް ވެސް އިއުލާންކޮށްފަ އެވެ.

- ވާޗުއަލް ބިބް ސޯޝަލް މީޑިއާގައި ޝެއާކުރާ ފަރާތްތަކުގެ ތެރެއިން ހޮވޭ މީހަކަށް އޮޕޯ އޭ1ކޭ ފޯނެއް.

- ދުވުމުގެ ފޮޓޯ ސޯޝަލް މީޑިއާގައި ޝެއާކުރާ ދުވުންތެރިންގެ ތެރެއިން ހޮވޭ މީހަކަށް އެންމެ ފަހުގެ އައިފޯން އެސްއީއެއް.

- ދުވުން ނިންމުމަށް ފަހު، ވާޗުއަލް މެޑަލް ސޯޝަލް މީޑިއާގައި ޝެއާކުރާ ދުވުންތެރިންގެ ތެރެއިން ނަސީބުވެރި ފަސް މީހަކަށް ދަ މެރަތަން ޝޮޕްގެ ފަރާތުން 1،000 ރުފިޔާގެ ވައުޗަރު އަދި ނަސީބުވެރި ތިން މީހަކަށް މެޑްމެކްސްގެ ފަރާތުން ދެ މީހަކަށް ރޭގަނޑުގެ ކެއުމެއް.

- ދުވުން ނިންމުމަށް ފަހު، މެޑަލް ޕޯޓަލް އަށް ދުވި ރޫޓުގެ ސްކްރީން ޝޮޓް އަޕްލޯޑް ކުރާ ދުވުންތެރިންގެ ތެރެއިން ނަސީބުވެރި 100 މީހުންނަށް ހެބިޓަސް ފްރެޝްގެ ފަރާތުން 100 ރުފިޔާގެ ވައުޗާއެއް.