ހުޅުމާލެ ދެވަނަ ފިޔަވަހީގައި އަޅާ ސްޓެލްކޯގެ ފްލެޓުތަކުން ފްލެޓެއް ބައްލަވައިގެންނެވި ކަމަށް އެ ކުންފުނީގެ މެނޭޖިން ޑިރެކްޓަރު ހަސަން މުޣުނީ އިއްޔެ ވިދާޅުވެއްޖެ އެވެ.
ރައްޔިތުންގެ މަޖިލީހުގެ އެސްއޯއީ ކޮމިޓީގައި ވާހަކަ ދައްކަވަމުން އޭނާ ވިދާޅުވީ އެއީ ކުންފުނީގެ ބޯޑު މެމްބަރުންނަށް ކަނޑައަޅާފައިވާ ފްލެޓުތަކުގެ ތެރެއިން ފްލެޓެއް ކަމަށެވެ. އަދި ކޮންމެ މީހަކަށް ވެސް ފްލެޓް ގަތުމުގެ ހައްގު އޮންނަ ކަމަށް އޭނާ ވިދާޅުވިި އެވެ.
ސްޓެލްކޯއިން ބުނިގޮތުގައި އެ ކުންފުނީގެ ފްލެޓުތަކުގެ ތެރެއިން ހަ ފްލެޓް ވަނީ ބޯޑު މެމްބަރުންނަށް ހާއްސަ ކޮށްފަ އެވެ. އޭގެ ތެރެއިން މިހާތަނަށް ދެ ފްލެޓެއް ލިބޭ މީހުން ވަނީ ކަނޑައަޅައިފަ އެވެ.
ސްޓެލްކޯގެ ފްލެޓެއް އޭނާއަށް ބައްލަވައިގެންނެވެނީ، ކޮމިޓީގައި ދެއްކެވި ވާހަކަތަކަށް ބަލާއިރު، ފްލެޓާ ބެހޭ ގޮތުން ސްޓެލްކޯގެ އުސޫލުތަކަށް ގެނައި ބަދަލުތަކުގެ ސަބަބުންނެވެ. އެ އުސޫލު ބަދަލުކުރީ، ކުރީގެ މެނެޖްމަންޓުން ކަމަށް އޭނާ ވިދާޅުވި އެވެ.
ސްޓެލްކޯ އިން ފްލެޓް ދޫކުރާ އުސޫލުގައި މިހާރު ބުނެފައިވާ ގޮތުގައި ފްލެޓަށް ކުރިމަތިލާ ކޮންމެ މުވައްޒަފަކަށް ވެސް ފްލެޓް ލިބޭނެ އެވެ. އެ ކުންފުނިން އެ ބަދަލު ގެނައީ ފްލެޓުތަކަށް ފުރަތަަމަ އިއުލާން ކުރުމުން ހިމެނި ޝަރުތުތަކާ އެކު، އެކަށީގެންވާ ތަރުހީބެއް ނުލިބިގެން ކަމަށް މުޣުނީ ވިދާޅުވި އެވެ.
އޭނާ ވިދާޅުވި ގޮތުގައި އެ ބަދަލުގެ ސަބަބުން މާލޭގައި އަމިއްލަ ގެއެއް ހުއްޓަސް ފްލެޓް ލިބޭނެ އެވެ.
"އެންމެ ފުރަތަމަ ބައިވަރު ކަންތައްތަކަށް ބެލި. އެހެންނަމަވެސް އެކަށީގެންވާ ވަރަށް މީހުން ކުރިމަތި ނުލާ. އެހެންވެ ކުރީގެ ބޯޑުން ހުރިހާ ޝަރުތެއް އުނިކޮށް ކުރިމަތިލާ ކޮންމެ މީހަކަށް ވެސް ފްލެޓް ލިބޭ ގޮތް ހެދީ. އެހެންކަމުން އަމިއްލަ ގެދޮރު ހުއްޓަސް ލިބޭ ގޮތަށް އޮތީ،" މުޣުނީ ވިދާޅުވި އެވެ.
ސްޓެލްކޯގެ އާ ބޯޑުން ވެސް ނިންމީ ކުރީގެ ބޯޑުން ކަނޑައެޅި އުސޫލުތަކާ އެއްގޮތަށް ފްލެޓުތައް ދޫކުރުމަށެވެ. އަދި އުސޫލުތައް އަލުން ބަދަލުކޮށް ފްލެޓުތައް އަނބުރާ ނެގުމުގެ ވިސްނުމެއް ނުގެންގުޅުއްވާ ކަމަށް ވެސް މުޣުނީ ވިދާޅުވި އެވެ.
"ކުރިން ފްލެޓުތައް ދޫކުރި މީހުންނާ އެކު ވަނީ ކޮންޓްރެކްޓު ހަދާފައި. އެހެންކަމުން އެ އުސޫލުތައް ބާތިލުކޮށް ފްލެޓުތައް ނަގަންޏާ ގާނޫނީ މައްސަލަތަކާ ކުރިމަތިލާން ޖެހިދާނެ. މީގެ ސަބަބުން ކުންފުނި ބަދުނާމުވެ އިތުރު ހަރަދުތައް ކުރަން ޖެހުމަކީ ވެސް އެކަށީގެންވާ ކަމެއް،" މުޣުނީ ވިދާޅުވި އެވެ.
ފްލެޓު ހައްގުވާ މީހުން ތިއްބަސް އެ އުސޫލުތަކުގެ ސަބަބުން އެ މީހުންނަށް ފްލެޓް ނުލިބުމަކީ ކަންބޮޑުވާ ކަމެއް ކަމަށް އެސްއޯއީ ކޮމިޓީގެ މެމްބަރުން ވިދާޅުވި އެވެ. އެހެންކަމުން މިހާރު ހުރި މައްސަލަތައް ހައްލުކޮށް ހައްގުވާ މީހުންނަށް ފްލެޓް ލިބޭ ގޮތަށް މަގުފަހިކޮށްދޭން ކޮމިޓީން ވަނީ ސްޓެލްކޯގައި އެދިފަ އެވެ.