ހޯރަފުށި އެއާޕޯޓު: އެ އެއާޕޯޓުގެ މަރާމާތުގެ ހުރިހާ މަސައްކަތެއް މިހާރު ނިމިފައިވާ ކަމަށް އެމްޓީސީސީން ބުނޭ-- ފޮޓޯ: އަހުމަދު އަވްޝަން/މިހާރު
11 ޖޫން 2021 - 11:11
ހޯރަފުށި އެއާޕޯޓުގެ މަރާމާތުގެ މަސައްކަތް ނިމިއްޖެ ކަމަށް އެމްޓީސީސީން ބުނެފި އެވެ.
އެ ކުންފުނިން ބުނިގޮތުގައި އެއާޕޯޓު މަރާމާތުގެ މަސައްކަތް ނިންމާލާފައި ވަނީ މިދިޔަ އަންގާރަ ދުވަހު އެވެ.
މިދިޔަ މަހު ރާއްޖެ އަށް ކުރި ވިއްސާރައިގެ ސަބަބުން އުދަ އަރައި ހޯރަފުށީ އެއާޕޯޓަށް އެކި ވަރުގެ ގެއްލުން ވަނީވެފަ އެވެ. އެގޮތުން، އެ އެއާޕޯޓުގެ ރަންވޭ އަށް ވެލި އަރާފައިވާއިރު ޓާމިނަލަށާއި އެތަނުގައި ބޭނުން ކުރާ ބައެއް ސާމާނުތަކަށާއި އެކޮމޮޑޭޝަން ބްލޮކަށް ވެސް ވަނީ ގެއްލުންވެފަ އެވެ.
މި ގެއްލުންތަކާ އެކު މަރާމާތަށް ވަގުތީ ގޮތުން އެއާޕޯޓް ވަނީ ބަންދުކޮށްފަ އެވެ. މަރމާތުގެ ހުރިހާ މަސައްކަތެއް ކުރީ އެމްޓީސީސީން އަމިއްލަ ހަރަދުގައި ކަމަށް ރީޖަނަލް އެއާޕޯޓްސް އިން ވަނީ ބުނެފަ އެވެ.
ހޯރަފުށީ އެއާޕޯޓު ތަރައްގީ ކުރީ ވެސް އެމްޓީސީސީންނެވެ. އެހެންކަމުން އެ ކުންފުންޏާ އެކު ވެފައިވާ ތިން އަހަރު ދުވަހުގެ އެއްބަސްވުމުގެ ދަށުން ކޮންޓްރެކްޓުގެ މުއްދަތުގައި އެއާޕޯޓުގެ މަރާމާތުގެ މަސައްކަތް އެ ކުންފުނިން ކުރަން ޖެހޭނެ އެވެ.
ރީޖަނަލް އެއާޕޯޓްސްގެ މެނޭޖިން ޑިރެކްޓަރު މުހައްމަދު ރިޒްވީ "މިހާރު"އަށް ވިދާޅުވި ގޮތުގައި މި މަހުގެ 15 ވަނަ ދުވަހު އެ އެއާޕޯޓު އަލުން އޮޕަރޭޝަނަށް ގެނެވޭނެ އެވެ.
ނޮވެމްބަރު 19، 2020 ގައި ރައީސް އިބްރާހިމް މުހައްމަދު ސޯލިހު ރަސްމީކޮށް ހުޅުއްވައި ދެއްވި މި އެއާޕޯޓަކީ 198 މިލިއަން ރުފިޔާ ހޭދަ ކޮށްގެން ތަރައްގީ ކުރި މި ސަރުކާރުގެ ފުރަތަމަ އެއާޕޯޓެވެ. މި އެއާޕޯޓުގައި 1،200 މީޓަރުގެ ރަންވޭއަކާއި 8،635 އަކަމީޓަރުގެ އޭޕްރަންއަކާއި ޓެކްސީވޭއެއް ވަނީ ތަރައްގީކޮށްފަ އެވެ. ޓާމިނަލް ކުރިމަތީގެ މަގުތައް ތަރައްގީ ކުރުމާއި 9،473 އަކަމީޓަރުގެ ޕާކިން އޭރިއާއަކާއި 1،718 އަކަމީޓަރުގެ ފަޔާ އެކްސެސް މަގެއްގެ އިތުރުން 720 މީޓަރުގެ އެއާޕޯޓް ސެކިއުރިޓީ އަދި ބީޗް ފެންސެއް ވަނީ ހަދައިފަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ކާންޓޭ
11 June 2021
ރިޒްވީ އެއާރފޯޓް އިންސޫރެއްސު ކޮށްފަތަ ތި ހުޅުވަނި
މަމީ
11 June 2021
އެއާރފޯޓް އަލުން އޮފަރޭސަނަށް ގެންނަ އިރު އެއާރފޯޓް ގަ އޮތް ފަޔަރވެހިކަލު އޮތީ ބޭނުން ކުރެވޭ ހާލަތެއްގަބާ?
މޫސަ
11 June 2021
އަސްލަމް ބުނި ގެއްލުންވީ އެއާރފޯޓް ތޮށިލާން އުޅެނި ކޮށްނޭ . ތޮށި ލާފަބާ މަސައްކަތް ނިންމާ ލިންޔޭ މި ބުނަނި
މޯޑޭ
11 June 2021
އެއާރފޯޓް މަސައްކަތް ނިންމާލީއޭ ބުނާއިރު އަދިވެސް އެބުނާ ބޮނޑް ހިލައެއް ނުޖަހާ. އެނެއްކާ ވެސް ރާޅު އަރާ އެއާރފޯޓް ގަ ފެން ބޮނޑް ވީމަ ރަށްއިތުންގެ ބަޖެޓްން ބޮނޑް ހަރަދު ކުރަށް ވީ. ކޯޒް ވޭ ވެސް އޮތީ ކުރީގަ އޮތް ހާލަތުގަ. ސާފް ކޮށްލި ކަން އެކަނި.