ސްޕީލްބާގް "ވެސްޓް ސައިޑް ސްޓޯރީ" ގެ ރިމެކިންއެއް ހަދަނީ

އޮސްކާ ހާސިލްކޮށްފައިވާ ހޮލީވުޑްގެ މަޝްހޫރު ޑައިރެޓަރު ސްޓީވެން ސްޕީލްބާގަކީ އޭނާގެ ކެރިއަރުގައި މިހާތަނަށް ވަރަށް ތަފާތު ގިނަ ޖޯންރާތަކަށް ފިލްމް ހަދައިފައިވާ ކުޅަދާނަ ޑައިރެކްޓަރެކެވެ.

އެކަމަކު މިހާތަނަށް މިއުޒިކަލް ޖޯންރާގެ ފިލްމެއް އޭނާ ހަދައިފައެއް ނެތެވެ. އެއީ ޝައުގުވެރިކަން ނެތިގެން ނުވެފައި އޮތް ކަމެއް ނޫނެވެ.

އެހެންވެ ސްޕީލްބާގްގެ ފޭނުންނަށް އޭނާ ދޭން އޮތީ ވަރަށް އުފާވެރި ހަބަރެކެވެ. އެއީ މިއުޒިކަލްއެއް ހަދަން އޭނާ ނިންމާފައިވާ ވާހަކަ އެވެ.

ނަވާރަސަތޭކަ ފަސްދޮޅަސް އެއް ވަނަ އަހަރު ޖެރޮމް ރޮބިންސާއި ރޮބަޓް ވައިސް ޑައިރެކްޓްކޮށް 10 އޮސްކާ ވެސް ހޯދި މަޝްހޫރު ކްލެސިކް މިއުޒިކަލް "ވެސްޓް ސައިޑް ސްޓޯރީ" ގެ ރިމެކިންއެއް ހަދަން އޭނާ ވަނީ ނިންމައިފަ އެވެ.

އޮސްކާގެ އެންމެ މޮޅު ފިލްމުގެ އެވޯޑް ވެސް ހޯދާފައިވާ ފިލްމްގެ ރައިޓްސް ވެސް ސްޕީލްބާގް ގަނެފައި އޮންނަތާ 15 އަހަރު ވެއްޖެ އެވެ.

އެކަމަކު ކަންތައް ދިމާވި ގޮތުން އެ ފިލްމް ބެލުންތެރިންނާ ހަމައަށް ގެނެސް ދެވިފައި ނެތީ އެވެ.

ހޮލީވުޑްގެ އެންމެ ފަހުގެ ހަބަރުތައް ބުނާ ގޮތުން ސްޕީލްބާގްގެ ކުރިއަށް ހުރި ޕްރޮޖެކްޓްތައް 2019 ވަނަ އަހަރާ ހަމައަށް ނިމުމުން "ވެސްޓް ސައިޑް ސްޓޯރީ" ގެ ރިމެކިންގެ މަސައްކަތް ފަށާނެ އެވެ.

ކުރިއަށް އޮތް ތިން އަހަރަށް ބަލާ އިރު ތިން ޕްރޮޖެކްޓެއް ޕްލޭންކޮށްފައި އެބަ އޮތެވެ. އޭގެ ތެރެއިން އެއް ފިލްމަކީ "އިންޑިއާނާ ޖޯންސް 5" އެވެ. "ވެސްޓް ސައިޑް ސްޓޯރީ" ގެ މަސައްކަތް ފަށާނީ އެ ފިލްމަށް ފަހު އެވެ.

"ވެސްޓް ސައިޑް ސްޓޯރީ" ގެ ސްކްރިންޕްލޭ ލިޔަން ހަވާލުކޮށްފައި ވަނީ ސްޕީލްބާގް ޑައިރެކްޓް ކުރި "ލިންކަން" އާއި "މިއުނިޗް" ފަދަ ފިލްމުތަކުގެ ސްކްރީންރައިޓަރު ޓޯނީ ކުޝްނާ އެވެ.

"އެ ފިލްމްގެ ރިމެކިންއެއް ހެދުމުގެ ހުވަފެން އަހަރެން ދެކޭތާ އަހަރުތަކެއްވެއްޖެ. އެކަން ކޮންމެވެސް ދުވަހަކުން ހާސިލް ކުރުމަކީ އަބަދު ވެސް ބޭނުންވެފައި ހުރި ކަމެއް،" މޮޅެތި އެތައް ފިލްމެއް ބެލުންތެރިންނާ ހަމަައަށް ގެނެސް ދީފައިވާ ޑައިރެކްޓަރު ބުންޏެވެ.

"ވެސްޓް ސައިޑް ސްޓޯރީ" ގެ ރިމެކިންއެއް ހަދަން ނިންމި ނަމަވެސް ފިލްމުގެ ކާސްޓުންނާ ބެހޭ ގޮތުން ވާހަކަ ދައްކަން އަދި މާ އަވަސް ކަމަށް ސްޕީލްބާގް ބުންޏެވެ.

ގިނަ ބަޔަކު މިހާރު އެންމެ ބޮޑަށް ބަލަން ބޭނުން ވާނީ ޝޭކްސްޕެއާގެ "ރޯމިއޯ އެންޑް ޖޫލިއަޓް" އަސްލަކަށް ބަލައިގެން ހެދި "ވެސްޓް ސައިޑް ސްޓޯރީ" ގައި ނަތާލީ ވުޑް (މާރިއާ) އާއި ރިޗަޑް ބޭމާ (ޓޯނީ) ކުޅުނު ރޯލްތައް ރިމެކިންގައި ކުޅޭނީ ކޮން ތަރިންނެއްތޯ އެވެ.

ރިޕޯޓްތައް ބުނާ ގޮތުން ޓޯނީގެ ރޯލުން "ކެޕްޓަން އެމެރިކާ" ގެ ތަރި ކްރިސް އީވަންސް، 35، ފެނުން ވަރަށް ގާތެވެ. އޭނާ ވަނީ ދާދި ފަހުން "ވެސްޓް ސައިޑް ސްޓޯރީ" އަކީ ޑްރީމް ޕްރޮޖެކްޓެއް ކަމަށް ބުނެފަ އެވެ.

ސުވާލަކީ ދެން ކްރިސް އާ އެކު ބަތަލާގެ ރޯލުން ފެނިގެން ދާނީ ކާކުތޯ އެވެ.

އިންތިޒާރެއްކޮށްލަމާ ހިނގާށެވެ. ސްކްރިޕްޓް ނިންމައިލެވުމުން ކާސްޓުންގެ އަޑު އިވެން ފަށާނެ އެވެ.

ސްޕީލްބާގްގެ ކުރިއަށް ހުރި ފިލްމަކުގެ ތެރެއިން ދެން އެންމެ އަވަހަށް ސިނަމާތަކަށް އަންނާނީ މެއި މަހު ބޭއްވި ކާންސް ފިލްމް ފެސްޓިވަލްގައި ވެސް ދައްކާލި ފެންޓަސީ އެޑްވެންޗާ "ދަ ބީއެފްޖީ" އެވެ.

އެ ފިލްމް ރިލީޒް ކުރަން ހަމަޖެހިފައި ވަނީ އަންނަ މަހުގެ އެކެއްގަ އެވެ.