އަންނަ އަހަރަށް ހަތަރު ފިލްމެއް ލޯންޗްކޮށްފި

މި އަހަރު ވެސް ވަރަށް ކާމިޔާބު ފިލްމްތަކަކާ އެކު، އަހަރު ނިމުމަކާ ހަމައަށް ދަނިކޮށް އަންނަ އަހަރު ރިލީޒް ކުރަން އާ ހަތަރު ފިލްމެއް ރޭ ލޯންޗްކޮށްފި އެވެ.

ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށް ދެން އެންމެ އަވަހަށް ގެނެސްދޭ ސަސްޕެންސް ތުރިލާ "ދެވަންސޫރަ" އިގެ ފަސްޓްލުކް ދައްކާލަން މިރޭ ބޭއްވި ހަފުލާގައި ލޯންޗް ކުރި ހަތަރު ފިލްމަކީ "ކަޅަކި"، "ހައްޔަރު"، "ނަފުސު" އަދި މި އަހަރު ގެނެސް ދިން ކާމިޔާބު ފިލްމް "ނޯޓީ 40" ގެ ދެވަނަ ބައި "+40" އެވެ.

މި ހަތަރު ފިލްމް ލޯންޗްކޮށް ދިނީ ފިލްމީ ދާއިރާގެ ތަޖުރިބާކާރު ފަންނާނެއް ކަމަށްވާ އާރިފާ އިބްރާހީމެވެ.

ރިލީޒް ކުރާނެ ވަކި ތާރީހުތަކެއް އިއުލާން ނުކޮށް ރޭ ލޯންޗް ކުރި ފިލްމްތަކުގެ ތެރެއިން "ކަޅަކި" އަކީ ޔޫއްޕެ، ލިޔެ ޑައިރެކްޓް ކުރާ ފިލްމެކެވެ. މީގެ ކާސްޓުންގެ ތެރޭގައި ހިމެނެނީ ފާތުމަތު އާޒިފާ (އަޒޫ)، މުހައްމަދު ފައިސަލް އަދި އަހުމަދު ޝާހް އެވެ.

މިރޭ ލޯންޗް ކުރި ދެވަނަ ފިލްމް "ނަފުސު" އަކީ އެކްޓަރު އަލީ ޝަޒްލީމް ޑައިރެކްޓް ކުރާ ފިލްމެކެވެ. އަހުމަދު ޒަރީރުގެ ސްކްރީންޕްލޭއަކަށް ހަދާ މި ފިލްމްގެ މައިގަނޑު ކާސްޓުންނަކީ އަޒޫ، އަހުމަދު ނިމާލް އަދި ޔޫއްޕެ އެވެ.

އަންނަ އަހަރަށް ރޭ ލޯންޗް ކުރި ތިން ވަނަ ފިލްމަކީ އެކްޓަރު ފައިސަލް އެކްޓްކޮށް، ޑައިރެކްޓް ކުރާ "ހައްޔަރު" އެވެ. ޔޫއްޕެގެ ސްކްރިޕްޓަކަށް ހަދާ ފިލްމްގެ ކާސްޓުންގެ ތެރޭގައި "ދެވަންސޫރަ" އިން ތައާރަފުވާ މަރިޔަމް ޝިފާ އަދި އަލީ އާޒިމް (ދޮންއައްޔަ) ހިމެނެ އެވެ.

އަންނަ އަހަރަށް އޮތް އަނެއް ފިލްމަކީ މި އަހަރު ޔޫއްޕެ ހުރިހާ ރަހަތަކެއް ހެޔޮވަރުކޮށްގެން ގެނެސް ދިން ކޮމެޑީ ފިލްމް "ނޯޓީ 40" ގެ ދެވަނަ ބައި "40+" އެވެ. މިއީ ހަމަ ޔޫއްޕެ ލިޔެ، ޑައިރެކްޓް ކުރާ ފިލްމެކެވެ. ކާސްޓުންގެ ތެރޭގައި ފުރަތަމަ ބައިން ފެނިގެން ދިޔަ އަހުމަދު ސައީދު، މުހައްމަދު މަނިކު، އަލީ ސީޒަން، އަޒޫ އަދި ދޮންއައްޔަ ހިމެނެ އެވެ. އަދި އަލަށް ކާސްޓާ ގުޅޭ ތަރިންގެ ތެރޭގައި ޝީލާ ނަޖީބް، ފައިސަލް އަދި ޝިފާ ހިމެނެ އެވެ.

އަންނަ ޑިސެމްބަރުގައި ރިލީޒް ކުރަން އަމާޒު ހިފާފައިވާ "ދެވަންސޫރަ" ގައިގެ ފަސްޓްލުކް ލޯންޗްކޮށް ދިނީ ފިލްމީ ދާއިރާގައި މަސައްކަތް ކުރާ މި އަހަރަށް 41 އަހަރު ފުރޭ ހަސަން މަނިކު (ރޯނު) އެވެ. މި ފިލްމްގެ ދެ ޓީޒާ ޓްރެއިލާއެއް ވެސް ވަނީ ދައްކާލައިފަ އެވެ. އެކަމަކު ފިލްމް ސިނަމާ އަށް ގެންނާނެ ތާރީހެއް އިއުލާނެއް ނުކުރެ އެވެ.