"ހައުސް އޮފް ކާޑްސް"ގައި ކެވިން ސްޕޭސީގެ ބައިވެރިވުމެއް ދެން ނޯންނާނެ ކަމަށާއި ނެޓްފްލިކްސް އިން އޭނާއާ ހުރިހާ ގުޅުމެއް ކަނޑާލާފައިވާ ކަމަށް އެ ކުންފުނިން ބުނެފި އެވެ.
ސްޕޭސީގެ މައްޗަށް ޖިންސީ ގޯނާގެ ތުހުމަތުތަކެއް ސިލްސިލާކޮށް އަމާޒުވަމުން ދިޔުމާ ގުޅިގެން ނެޓްފްލިކްސް އިން ނެރުނު ބަޔާނެއްގައި ބުނީ އޭނާ ބައިވެރިކޮށްގެން "ހައުސް އޮފް ކާޑްސް" އުފެއްދުމުގެ އެއްވެސް މަސައްކަތެއް ދެން ނުކުރާނެ ކަމަށެވެ. އަދި ސްޕޭސީއާ ނުލައި އެ ސީރީޒް ކުރިއަށް ގެންދާނެތޯ ނިންމަން ޝޯ އުފައްދާ ކުންފުނި އެމްއާރުސީއާ ވާހަކަދައްކާނެ ކަމަށް ވެސް ނެޓްފްލިކްސް އިން ބުންޏެވެ.
އެމެރިކާގެ ރައީސްކަމަށް އަންނަ ރަހުމުކުޑަ ސިޔާސީ މީހެއްގެ ބައި އަދާކޮށްގެން ސްޕޭސީ ވަނީ "ހައުސް އޮފް ކާޑްސް"ގެ ފުރަތަމަ ފަސް ސީޒަނުގައި ވެސް އެމީގެ އެންމެ މޮޅު ޑްރާމާ އެކްޓަރުގެ އެވޯޑަށް ނޮމިނޭޓްވެފަ އެވެ. އެކަމަކު އެއިން އެއްވެސް ފަހަރަކު އޭނާ އަށް އެވޯޑް ކާމިޔާބެއް ނުކުރެވެ އެވެ.
"ހައުސް އޮފް ކާޑްސް"ގައި ސްޕޭސީގެ ކެރެކްޓާ ފްރޭންކް އަންޑަވުޑްގެ އަންހެނުންގެ ބައި އަދާކުރާ ރޮބިން ރައިޓަކީ ވެސް ސްޕޭސީއާ އެއް ވަރެއްގެ ދައުރެއް އެ ސީރީޒްގައި އޮތް އެކްޓަރަކަށް ވާއިރު، ނެޓްފްލިކްސް އިން މިހާރު އިއުލާންކޮށްފައިވާ ހަވަނަ ސީޒަން އޭނާ އަށް އަމާޒުކޮށްގެން ކުރިއަށް ގެންދިޔުން އެކަށީގެންވެ އެވެ.
ނެޓްފްލިކްސް އިން އިތުރަށް ބުނިގޮތުގައި އޮސްކާ އެވޯޑް ހޯދާފައިވާ ސްޕޭސީ އެކްޓްކޮށް ޕްރޮޑިއުސަރެއްގެ ދައުރު ވެސް އަދާކޮށްފައިވާ އާ ފިލްމު "ގޯ" ރިލީޒްކުރަން ވެސް އެ ކުންފުނިން ދެކޮޅުހަދާނެ އެވެ.
"ހައުސް އޮފް ކާޑްސް"ގެ އެހާރާއި މިހާރުގެ އަށް މުވައްޒަފަކު ސީއެންއެން އަށް ކިޔައިދީފައިވާ ގޮތުގައި ސްޕޭސީ ވަނީ އެ ސީރީޒް އުފެއްދުމުގެ މަސައްކަތަކީ އެ މީހުންނަށް "ވިހަ" މާހައުލެއް ކަމަށް ހަދައިފަ އެވެ. އަދި އެއް މުވައްޒަފަކު އޭނާގެ މައްޗަށް ޖިންސީ ގޯނާގެ ތުހުމަތު ވެސް ކުރެ އެވެ.
ހޮލީވުޑުގައި ހިނގާ ޖިންސީ ގޯނާގެ އަމަލުތައް ފަޅާއެރުވުމުގެ ބޮޑު "ތޫފާނު"ގައި ސްޕޭސީ ޖެހުނީ "ސްޓާ ޓްރެކް"ގެ ތަރިއެއް ކަމަށްވާ އެންތަނީ ރެޕް އޭނާގެ މައްޗަށް ކުރި ތުހުމަތަކާ އެކުގަ އެވެ. ރެޕް ބުނެފައިވާ ގޮތުގައި އޭނާގެ އުމުރުން 14 އަހަރުގައި 1986 ވަނަ އަހަރު ސްޕޭސީ ވަނީ އޭނާއާ ބެހެން އުޅެފަ އެވެ.
އެކަމާ ބެހޭގޮތުން މައާފަށް އެދުނަސް ސްޕޭސީ ބުނެފައި ވަނީ އެފަދަ ކަމެއް ހިނގި ކަމެއް ހަނދާނެއް ނެތް ކަމަށެވެ.
އެކަމަކު ރެޕް އަށް ފަހު އިތުރު މީހުން ވެސް ސްޕޭސީގެ މައްޗަށް ޖިންސީ ގޯނާގެ ތުހުމަތު ކޮށްފައިވެ އެވެ.