"އާޝިގީ 3" ގައި ވަރުން ދަވަން އާއި އާލިއާ ބަޓް؟

ވަރުން އާއި އާލިއާ ބަޓްއަކީ ބޮލީވުޑްގައި މިހާރު އެންމެ ކާމިޔާބު ޒުވާން ޖޯޑެވެ. "ސްޓޫޑަންޓް އޮފް ދި އިޔާ" އިން 2012 ގައި ފިލްމީ ދަތުރު އެކީގައި ފެށި، މި ދެ ތަރިން އެކުގައި ކުޅުނު ކޮންމެ ފިލްމެއް ވެސް ވަރަށް ކާމިޔާބެވެ. އޭގެ ތެރޭގައި "ހަމްޓީ ޝަރްމާ ކީ ދުލްހަނިޔާ" އާއި "ބަދްރީނާތު ކީ ދުލްހަނިޔާ" ވެސް ހިމެނެ އެވެ.

އާލިއާ އާއި ވަރުން ސޮއިކޮށްފައިވާ އިތުރު ފިލްމްތަކުގެ ތެރޭގައި ކަރަން ޖޯހަރްގެ "ޝިއްދަތު" ވެސް ހިމެނެ އެވެ. ބޮލީވުޑްގެ އެންމެ ފަހުގެ ހަބަރުތައް ބުނާ ގޮތުން އާލިއާގެ އާއިލީ ފިލްމް ކުންފުނި ވިޝޭޝް އިން ގެނެސްދޭ ކާމިޔާބު ފްރެންޗައިޒް "އާޝިގީ" ތިން ވަނަ ބައިން ފެނުމުގެ ފުރުސަތު ބޮޑީ ވެސް ހަމަ މި ދެ ތަރިންނެވެ.

ކުރިން އަޑު އަރާފައި އޮތް ގޮތުން "އާޝިގީ 3" ގެ ލީޑް ރޯލް ކުޅޭނީ އާލިއާ އާއި ކުރީގެ ލޯބިވެރިޔާ ސިދާތު މަލްއުތުރާ އެވެ. އޭނާއަކީ ވެސް އާލިއާ އާއި ވަރުންއާ އެކު، "ސްޓޫޑަންޓް އޮފް ދި އިޔާ" އިން ބޮލީވުޑަށް ނުކުތް އެކްޓަރެކެވެ.

އެ ފިލްމަށް ފަހު ސިދާތާއި އާލިއާ އެކުގައި ކުޅުނީ އެންމެ ފިލްމެކެވެ. އެއީ "ކަޕޫރް އެންޑް ސަންސް" އެވެ. ނަމަވެސް މިހާރު އާލިއާ އާއި ސިދާތު ރުޅިވެފައިވާތީ "އާޝިގީ 3" އިން ދެ މީހުން ފެނުމުގެ ފުރުސަތު ނެތް ކަމަށް ރިޕޯޓްތައް ބުނެ އެވެ.

އަނެއްކޮޅުން އާލިއާ އާއި ވަރުންގެ ޖޯޑް ފިލްމަށް ގެންނަން ބޭނުންވާ އެއް ސަބަބަކީ މި ޖޯޑްގެ ކެމިސްޓްރީ ބެލުންތެރިންނަށް މާ ބޮޑަށް ވެސް ކަމުގޮސްފައި އޮތުމެވެ. އެކަމަކު މިކަމާ ބެހޭ ގޮތުން ފިލްމާ ގުޅުން ހުރި އެއްވެސް ފަރާތަކުން އަދި އެއްވެސް ވާހަކައެއް ނުދައްކަ އެވެ.

"އާޝިގީ 3" އަށް ވަރުން އާއި އާލިއާ ހަމަޖެއްސި ކަމަށް މީޑިއާތަކުގައި ވާހަކަތައް ފެތުރެން ފެށުމާ އެކު، ފޭނުން އަންނަނީ މިހާރު އެ ދެ ތަރިން ހިނަމައިގެން ފިލްމްގެ ޕޯސްޓަރެއް ވެސް ހަދައިގެން ސޯޝަލް މީޑިއާގައި ދައުރު ކުރަމުންނެވެ.

މިދިޔަ މަހު އަޔާން މުކަރްޖީގެ "ބްރައްމަސްތުރާ" ގެ ބަލްގޭރިއާ ޝޫޓިން ޝެޑިއުލް ނިންމާލައި މިހާރު އެނބުރި މުމްބާއީ އަށް ގޮސް ހުރި އާލިިއާ ވަނީ އާ ސްކްރިޕްޓެއް ކިޔަމުން އަންނަކަން ވެސް އިސްޓަގްރާމްގައި ހިއްސާކޮށްފަ އެވެ. ކެޕްޝަނަކަށް "ނެކްޓްސް" ޖަހާފައި އޭނާ ޕޯސްޓް ކުރި ފޮޓޯއާ އެކު، ބައެއް މީހުން ބުނަނީ އާލިއާ މިހާރު އެ ކިޔަނީ "އާޝިގީ 3" ގެ ސްކްރިޕްޓް ކަމަށެވެ.

އާލިއާގެ ބައްޕަ މަހޭޝް ބަޓް ޑައިރެކްޓް ކުރި 1990 ގެ ފިލްމް "އާޝިގީ" އަށް ފަހު، މީގެ ދެވަނަ ބައި 2013 ގައި މުޅިން ތަފާތު ކާސްޓަކާ އެކު ޑައިރެޓް ކުރީ މޯހިތު ސޫރީ އެވެ. ވަރަށް އަސަރު ގަދަ ޖާދުވީ ލަވަތަކެއް ވެސް ހިމެނުނު "އާޝިގީ 2" ގައި ލީޑް ރޯލް ކުޅުނީ ޝްރަދާ ކަޕޫރާއި އަދިތިޔާ ރޯއި ކަޕޫރެވެ.

"އާޝިގީ 3" ގެ ލިޑް ބަތަލު ސުވާލު މާކެއްގެ ތެރޭގައި އޮތަސް ފިލްމްގެ ބަތަލާއަކީ އާލިއާކަމާއި ޑައިރެކްޓަރަކީ މޯހިތުކަން މިހާރު ވެސް ކަށަވަރެވެ. އަދި މި ފިލްމްވެގެން ދާނީ އާލިއާ ކުޅޭ އާއިލީ ފިލްމް ކުންފުނީގެ ފުރަތަމަ ފިލްމަށެވެ.