ބޭނުން ވަނީ ރަންބީރު އަވަހަށް ކައިވެނިކޮށް، ދަރިން ހޯދުން: ރިޝީ ކަޕޫރް

ދަރިފުޅު ރަންބީރް ކަޕޫރް ވީހާ ވެސް އަވަހަކަށް ކައިވެނިކޮށް، އޭނާގެ ފަރާތުން ކާފަ ދަރިން ލިބޭނެ ދުވަހަކަށް އިންތިޒާރު ކުރަމުން އަންނަ ކަމަށް ރަންބީރްގެ ބައްޕަ ރިޝީ ކަޕޫރް ބުނެފި އެވެ.

އަންނަ މަހުގެ 4 ގައި ރިލީޒް ކުރާ ރިޝީގެ އެންމެ ފަހުގެ ފިލްމް "102 ނޮޓް އައުޓް" ގެ ޕްރޮމޯޝަނަލް އިވެންޓްގައި މުމްބާއީ މިރާ އަށް އޭނާ ބުނީ އަބަދު ވެސް ދަރިން ދެކެ ވަރަށް ލޯބިވާ ކަމަށާއި ދަރިންނަށް އުފާވެރި މުސްތަގުބަލެއް ލިބެން އެދޭ ކަމަށެވެ.

"އެހެންވެ މިހާރު އަހަރެން އެންމެ ދެކެން ބޭނުން ވަނީ ރަންބީރު ވީހާ ވެސް އަވަހަކަށް ކައިވެނިކޮށް ދަރިން ހޯދުން. އަހަރެން ވަރަށް ބޭނުން ރަންބީރުގެ ފަރާތުން ލިބޭ ކާފަދަރިންނާ އެކު ކުޅެ މަޖާކޮށްލަން،" ރިޝީ، 65، ބުންޏެވެ.

އޭނާ ބުނީ މިހާރު އުމުރުން 35 އަހަރުގެ ރަންބީރު ކައިވެނި ކުރާނެ މީހަކު ނިންމާނީ އޭނާ އަމިއްލަ އަށް ކަމަށެވެ. އެކަމަކަށް ބައްޕައެއްގެ ހައިސިއްޔަތުން އެއްވެސް ނުފޫޒެއް ނޯންނާނެ ކަމަށް ރިޝީ ބުންޏެވެ.

ރަންބީރް ވަނީ ބޮލީވުޑްގެ ވަރަށް މަޝްހޫރު ދެ ބަތަލާއަކާ ވަރަށް ސީރިއަސް ލޯބީގެ ގުޅުންތަކެއް ކުރިން ބާއްވައިފަ އެވެ. އެއީ ދީޕިކާ ޕަދްކޯން އާއި ކެޓްރީނާ ކައިފް އެވެ. މިހާރު އަޑުތައް އަރާފައިވާ ގޮތުން ރަންބީރް އުޅެނީ ޒުވާން ބަތަލާ އާލިއާ ބަޓް އާ ރައްޓެހިވެގެންނެވެ.

އެކަމަކު ކެޓްރީނާއާ ވަކިވި ތަނާ، މަންމަ ނީޓޫ ސިންގް ދައްކާ އަންހެން ކުއްޖަކާ ކައިވެނި ކުރަން ރަންބީރު ތައްޔާރަށް ހުރި ކަމަށް މީޑިއާތަކުން ރިޕޯޓްކޮށްފައިވެ އެވެ.

ރަންބީރަކީ ރިޝީގެ ދެ ކުދިންގެ ތެރެއިން ހަގު މީހާ އެވެ. ދޮށީ އަންހެން ދަރިފުޅު ރިދިމާ ކަޕޫރް، 37، ކައިވެނިކޮށް، 7 އަހަރުގެ އަންހެން ދަރިއަކު ވެސް އެބަ ހުއްޓެވެ.