ބޮލީވުޑަށް ތައާރަފުވާ މަޝްހޫރު މީސްމީހުންގެ ދަރިންގެ ލިސްޓް ވަރަށް ބޮޑަށް ދިގުވަމުން އަންނަ އިރު، އަނެއްކާ ވެސް ވަރުފަދަ ތަރިއެއްގެ ވާހަކަ އެވެ. މި ފަހަރު މިއޮތީ އަނެއްކާ ވެސް އާ ތަރިއަކު ބޮލީވުޑަށް ލޯންޗް ކުރާ ވާހަކަ އެވެ.
އެއީ ހިންދީ ސިނަމާގެ އެންމެ ވަރުގަދަ އެއް ވިލަން ކަމަށްވާ ޑެނީ ޑެންޒޮންގްޕާގެ ފިރިހެން ދަރިފުޅު ރިންޒިން ޒޮންގްޕާ އެވެ. އޭނާ ބޮލީވުޑަށް ތައާރަރު ކުރާ ފިލްމަކީ ނިލޭޝް ސަހޭ ޑައިރެކްޓް ކުރާ އެކްޝަން ތުރިލާ "ސްކޮޑް" އެވެ.
މި ފިލްމުގެ ޝޫޓިން އަންނަ އެޕްރީލް މަހުގެ ތެރޭގައި ފަށަން ވަނީ ނިންމައިފަ އެވެ.
ދަރިފުޅުގެ ފުރަތަމަ ފިލްމާ ބެހޭ ގޮތުން ޑެނީ ބުނީ ރިންޒިން އަށް ކަމުދާ ކަހަލަ ސްކްރިޕްޓަކާ އެންމެ ފަހުން ލައްވާލައި، އޭނާ ފިލްމީ ދާއިރާ އަށް ނުކުންނަން މަސައްކަތް ފެށުމަކީ ލައްކަ އުފާވާ ކަމެއް ކަމަށެވެ.
"އަހަންނާއި މުޅި އާއިލާ ވެސް މިތިބީ މިކަމާ ވަރަށް އުފަލުން. ރިންޒިންގެ ފުރަތަމަ ފިލްމުގެ އެންމެ ހާއްސަ ކަމަކީ އާއިލާއާ އެއްވެސް ގުޅުމެއް ނެތް ފިލްމަކުން އޭނާ ފިލްމީ ދާއިރާ އަށް ނުކުންނާތީ،" ވިޖޭޕަތު އާއި ހަމް ފަދަ އެތައް ފިލްމެއްގައި ނުބައިބައި ރޯލް ކުޅެގެން ބެލުންތެރިންގެ ލޯބި ހޯދި އެކްޓަރު ބުންޏެވެ.
ޑެނީ، 70، ބުނި ގޮތުގައި ރިންޒިންގެ އަލަތު ފިލްމު "ސްކޮޑް" އަކީ ވަރަށް ވެސް ފުރިހަމަ ސްކްރިޕްޓެކެވެ. އަދި ފިލްމުތަކަށް ލޯބި ކުރާ މީހުން ބޭނުން ވާނެ ހުރިހާ ރަހައެއް އެކުލެވޭނެ ފިލްމަކަށް ވާނެ ކަމަށް ބުންޏެވެ.
"ސްކޮޑް" ގެ ޑައިރެކްޓަރު ނިލޭޝް ވަނީ ރިންޒިންއަކީ އަކީ ބޮލީވުޑުން ފިލްމީ ދާއިރާ އަށް ނެރޭ ޑްވޭން (ރޮކް) ޖޯންސަންގެ ގޮތުގައި ސިފަކޮށްފަ އެވެ. އަދި އޭނާގެ ފިލްމުން ޒުވާން އެކްޓަރު ވަރުގަދަ އެކްޝަންތަކެއް ދައްކައިލައި، ވަރުގަދަ އެކްޝަން ހީރޯއެއްގެ ގޮތުގައި ބޮލީވުޑްގައި މަޝްހޫރުކަން ހޯދާނެ ކަމަށް ވެސް ނިލޭޝް ބުންޏެވެ.
"ފިލްމުގެ ބަތަލާ އާއި މީގެ އިތުރު ކާސްޓުން ވެސް ވަރަށް އަވަހަށް އިއުލާން ކުރާނަން. ސްކޮޑްގައި ވަރަށް މުހިއްމު ރޯލެއް ކުޑަކުއްޖަކު ކުޅޭނެ." އޭނާ ބުންޏެވެ.