ތެލެގޫ އެކްޓަރު މަހޭޝް ބާބޫ ވެސް ބޮލީވުޑަށް

އިންޑިއާގެ ސައުތު ފިލްމު އިންޑަސްޓްރީގެ ތަރިން ބޮލީވުޑަށް ދިޔުމާއި ބޮލީވުޑްގެ ތަރިން ސައުތުގެ ފިލްމުތަކުގައި މަސައްކަތް ކުރުމަކީ މި ފަހުން ވަރަށް ބޮޑަށް އާންމުވަމުން އަންނަ ޓްރެންޑެކެވެ. ވަކިން ހާއްސަކޮށް މި ފަހުން ދެ އިންޑަސްޓްރީގެ އޭ ލިސްޓް ތަރިން ދެ އިންޑަސްޓްރީގައި ކާމިޔާބު ހޯދަން ކުރާ މަސައްކަތްތައް ގިނަ އެވެ.

އެގޮތުން އަނެއްކާ ވެސް ސައުތުން ބޮލީވުޑަށް ވަރުގަދަ ތަރިއަކު ފިޔަވަޅު އަޅަނީ އެވެ. ރިޕޯޓްތައް ބުނާ ގޮތުން ކާމިޔާބު އެތައް ފިލްމެއް ކުޅެފައިވާ ސައުތުގެ ސުޕަސްޓާ މަހޭޝް ބާބޫ ވެސް ދެން މާ ލަސްތަކެއް ނުވެ ހިންދީ ފިލްމެއްގައި މަސައްކަތް ކުރާނެ އެވެ.

އުމުރުން 43 އަހަރުގެ މަހޭޝްއަކީ "ޕުކާރު" އާއި "ވާސްތާވް" އަދި "ދިލް ވިލް ޕިޔާރް ވިޔާރު" ފަދަ ބޮލީވުޑްގެ ފިލްމުތައް ކުޅެފައިވާ ކުރީގެ ބަތަލާ ނަމްރަތާ ޝިރޯދުކަރުގެ ފިރިމީހާ އެވެ. އެ ދެ މީހުންގެ މިހާރު ދެ ކުދިން ވެސް އެބަ ތިއްބެވެ.

ޑެކަން ކްރޮނިކަލްސް އިން ރިޕޯޓްކޮށްފައިވާ ގޮތުގައި މަހޭޝް ކުޅޭ ފުރަތަމަ ހިންދީ ފިލްމަކަށް ވާނީ "ބާހްބަލީ" ގެނެސް ދިން އެސްއެސް ރާޖަމޯލީ ޑައިރެކްޓް ކުރާ ފިލްމެކެވެ. އަދި އެ ފިލްމުގެ މަސައްކަތް ފަށާނީ ރާޖަމޯލީ މިހާރު މަސައްކަތް ފަށާފައިވާ އާ ފިލްމުގެ މަސައްކަތް ނިމުމުން ކަމަށް ބުންޏެވެ.

ނަން އިއުލާންކޮށްފައި ނުވާ އަދި 2020 ގައި ރިލީޒް ކުރާ އޭނާގެ އާ ފިލްމުގެ ތަރިންނަކީ ރާމް ޗަރަން އާއި ޖޫނިއާ އެންޓީއާރް އެވެ.

ޑެކަން ކްރޮނިކަލްސް އިން ބުނީ މަހޭޝްއާ އެކު، ރާޖަމޯލީ ހަދާ ހިންދީ ފިލްމުވެގެން ދާނީ ތަންކޮޅެއް ތަފާތު ކޮންސެޕްޓަކަށް ހަދާ ފިލްމަކަށެވެ. އަދި އެ ފިލްމު ގެނެސް ދޭނީ ހިންދީ ބަހުގެ އިތުރުން ތެލެގޫ ބަހުންނެވެ.

އާމިރު ހާންގެ "ގަޖިނީ" ޑައިރެކްޓް ކުރި އޭއާރް މުރުގަދޯސް މިދިޔަ އަހަރު ގެނެސް ދިން "ސްޕައިޑާ" ގެ ބަތަލު މިހާރު އަންނަނީ "މަހާރްޝީ" ކިޔާ ފިލްމެއްގެ މަސައްކަތް އެމެރިކާގައި ކުރަމުންނެވެ.

އަންނަ އަހަރުގެ އެޕްރީލްގައި ރިލީޒް ކުރާ އެ ފިލްމުގެ ޑައިރެކްޓަރަކީ ވަމްޝީ ޕެއިޑިޕައްލީ އެވެ. "މަހާރްޝީ" ގައި މަހޭޝްއާ އެޖު ބަތަލާގެ ރޯލުން ފެނިގެން ދާނީ ރިތިކް ރޯޝަނާ އެކު "މޮހެންޖޮ ދާރޯ" ކުޅުނު ޕޫޖާ ހެގްޅޭ އެވެ.

މަހޭޝްގެ އެންމެ ފަހުގެ ފިލްމަކީ މި އަހަރު ރިލީޒް ކުރި ޕޮލިޓިކަލް ތުރިލާ "ބާރަތު އަނޭ ނެނޫ" އެވެ.