އަރުޖުން ކަޕޫރާއި މަލައިކާ އަރޯރާގެ ގުޅުމަށް އާއިލާ ގަބޫލު

އަރުޖުން ކަޕޫރާއި މަލައިކާ އަރޯރާގެ ގުޅުމަށް އާއިލާ އިން ވަރަށް ރުހޭކަން ދޭހަވާ ކަހަލަ ގޮތަކަށް އަރުޖުންގެ ބޮޑުބޭބެ އަނިލް ކަޕޫރް ވާހަކަ ދައްކައިފި އެވެ.

އަރުޖުންގެ ބައްޕަ ބޯނީ ކަޕޫރާ އެއްބަނޑު އެއްބަފާ އަނިލް ބުނި ގޮތުގައި އަރުޖުން އުފާވާ ކޮންމެ ކަމަކުން އޭނާ ވެސް އުފާވާނެ އެވެ.

"އަރުޖުން އުފާވާ ކޮންމެ ކަމަކުން އަހަރެން ވެސް އުފާވާނެ. އެކަމަކު އެހެން މީހެއްގެ ޒާތީ ކަންކަމާ ބެހޭ ގޮތުން ބޭނުމެއް ނޫން ކޮމެންޓެއް ކުރާކަށް،" ދާދި ފަހު ނިންމައިލި ބަތަލާ ނޭހާ ދޫޕިއާގެ ޕޮޑްކާސްޓް ޝޯ "ނޯ ފިލްޓާ ނޭހާ" ގައި އަރުޖުން އާއި މަލައިކާގެ ގުޅުމާ ބެހޭ ގޮތުން ސުވާލު ކުރުމުން އަނިލް ބުންޏެވެ.

އޭނާ ބުނި ގޮތުގައި އަރުޖުންއަކީ އާއިލާގެ އެންމެންނާ ވެސް ވަރަށް ގާތް ގުޅުމެއް ބާއްވާ މީހަކަށްވާތީ އޭނާ ކުރަން ބޭނުންވާ ކަންކަމަށް އާއިލާ އިން އަބަދު ވެސް ތާއީދު ކުރާނެ އެވެ.

"އެންމެ މުހިއްމު އެއްޗަކީ އުފާ. އާއިލާގެ ކޮންމެ މީހަކަށް ވެސް އުފަލެއް ލިބޭ ކަހަލަ ކަމެއް ވިއްޔާ މުޅި އާއިލާ އެކަމާ އުފާ ކުރާނެ،" އަނިލް ބުންޏެވެ.

މަލައިކާ އާއި އަރުޖުންގެ ގުޅުމަށް އެ ދެ ތަރިން ރަސްމީކޮށް އެއްބަސް ނުވިޔަސް، އެއީ މިހާރު ސިއްރު ގުޅުމެއް ނޫނެވެ. އަނެއްކޮޅުން އަރުޖުންގެ އާއިލާގެ ވަރަށް ގިނަ މީހުންނާ މަލަކައިކާ ގުޅުން ވަރަށް ބަދަހި އެވެ.

އެގޮތުން ބޯނީގެ ހަގު ކޮއްކޮ އަދި އެކްޓަރު ސަންޖޭ ކަޕޫރާއި އޭނާގެ އަންހެނުން މަހީޕް ކަޕޫރާއި މަލައިކާގެ ގުޅުން ވަރަށް ބަދަހި އެވެ. އެ މީހުންނަކީ ވަރަށް އާންމުކޮށް އެކީގައި ކެއުންތަކަށާއި ކޮފީތަކަށް ވެސް އަރާ މީހުންނެވެ. ނަމަވެސް ހަމައެކަނި ފިރިހެން ދަރިފުޅު އަރުޖުން އާއި މަލަކައިކާ ގުޅުމާ ދޭތެރޭ ބޯނީ އެހާ ގަޔާނުވާ ކަމަށް ބައެއް މީޑިއާތަކުން ބުންޏެވެ.

އާ އަހަރު ފާހަގަ ކުރަން އަރުޖުންގެ އާއިލާ އިން ބޭއްވި ޕާޓީގައި ވެސް މަލައިކާ ބައިވެރިވެ މަޖާ ނަގާފައިވެ އެވެ. އެ ޕާޓީގެ ތެރެއިން ނަގާފައިވާ ފޮޓޯއެއް އިންސްޓަގްރާމްގައި ސަންޖޭ ހިއްސާ ކުރީ ކެޕްޝަނަކަށް "ފެމިލީ" ޖަހައިފަ އެވެ. ފޮޓޯ އިން ފެންނަނީ މަލައިކާ އާއި އަރުޖުން އާއި ސަންޖޭގެ ދެމަފިރިންނާއި އަރުޖުން އާއި މަލައިކާގެ އެންމެ ބޮޑެތި ސިއްރުތައް ވެސް އެނގޭ ޑައިރެކްޓަރު ކަރަން ޖޯހަރެވެ.

ރިޕޯޓްތައް ބުނާ ގޮތުން އަރުޖުން، 33، އާއި މަލައިކާ، 45، މި އަހަރުގެ ކުރީކޮޅު ކައިވެނި ކުރާނެ އެވެ. އަދި އެ ދެ މީހުން ކައިވެންޏަށް ފަހު ދިރިއުޅޭނެ އެޕާޓްމަންޓެއް ވެސް ދާދި ފަހުން ވަނީ ގަނެފަ އެވެ.

މަލައިކާއަކީ ސަލްމާންގެ ހާއްކޮ އަރްބާޒް ހާންގެ ކުރީގެ އަންހެނުންނެވެ. ދެހާސް ސޯޅަ ވަނަ އަހަރު އެ ކައިވެނި ރަސްމީކޮށް ރޫޅައިލި އިރު، އެ ދެ މީހުންނަށް ފިރިހެން ދަރިއަކު ވެސް ލިބިފައިވެ އެވެ. އެއީ މި އަހަރު 16 އަހަރު ފުރޭ އަރްހާން ހާނެވެ.