"އާޝިގީ 3" އަށް އާލިއާ އާއި ސިދާތު ހަމަޖައްސައިފި

"އާޝިގީ 3" ގެ ތަރިންނަކީ ކޮބައިކަން ނޭނގިގެން އެތައް ބަޔަކު އުޅެނިކޮށް، އެ ފިލްމުގެ ލީޑް ރޯލުން ފެނިގެން ދާނީ ޒުވާން ދެ ތަރިން ކަމަށްވާ އާލިއާ ބަޓާއި ސިދާތު މަލްއުތުރާކަން އެ ފިލްމް އުފައްދާ ބަޓް ކޭމްޕުން ކަށަވަރުކޮށް ދީފި އެވެ.

ޓީ ސީރީޒާ ގުޅިގެން އުފައްދާ މި ފިލްމުގެ އެއް ޕްރޮޑިއުސަރު މުކޭޝް ބަޓް ބުނީ "އާޝިގީ 3" ގެ ސްކްރިޕްޓް އެކުލަވާލައި މިހާރު ނިމިފައިވާ އިރު، އޭގެ ލީޑް ރޯލަށް އެންމެ ފިޓް ވަނީ އާލިއާ އާއި ސިދާތު ކަމަށެވެ.

އެހެންވެ އެ ދެ ތަރިންނަށް ފިލްމަށް ވަގުތު ހުސް ކުރެވޭނެ ދުވަހަކާ ބެހޭ ގޮތުން މިހާރު ވާހަކަ ދައްކަމުން އަންނަ ކަމަށް އޭނާ ބުންޏެވެ.

ސިދާތު ވެސް ވަނީ ކުރިން "އާޝިގީ 3" އަށް ސޮއި ކުރިކަން ކަށަވަރުކޮށް ދީފަ އެވެ.

"އަހެރެން އުންމީދު ކުރަން ފޭނުންނަށް އާޝިގީ ތިނަކުން އަހަންނާއި އާލިއާގެ ކެމިސްޓްރީ ވެސް ކަމުދާނެ ކަމަށް،" ކަރަން ޖޯހަރްގެ "ސްޓޫޑަންޓް އޮފް ދި އިޔާ" އިން 2012 ވަނަ އަހަރު އާލިއާ އާ އެކު ބޮލީވުޑަށް ތައާރަފުވި ސިދާތު ބުންޏެވެ.

މުކޭޝް ބުނީ "އާޝިގީ 3" ވެސް ޑައިރެކްޓް ކުރާނީ، ބޮކްސް އޮފީހުގައި ބޮޑު ކާމިޔާބީއެއް ހޯދި އަދި ހިތްގައިމު ލަވަތަކެއް ހިމެނޭ "އާޝިގީ 2" ގެ ޑައިރެކްޓް ކުރި މޯހިތު ސޫރީ ކަމަށެވެ.

އެހެން ނަމަވެސް އެ ފިލްމުގެ މަސައްކަތް ފަށަން ހަމަޖެހިފައި ވަނީ މޯހިތު މިހާރު ޑައިރެކްޓް ކުރަން ތައްޔާރުވަމުން އަންނަ "ހާފް ގާލްފްރެންޑް" ގެ މަސައްކަތް ނިންމައިލުމަށް ފަހު އެވެ.

"އާޝިގީ 3" ވެގެން ދާނީ ސިދާތާއި އާލިއާ އެކުގައި ކުޅޭ ތިން ވަނަ ފިލްމަށެވެ. އެ ދެ މީހުން އެކުގައި އެންމެ ފަހުން ފެނިގެން ދިޔައީ "ކަޕޫރް އެންޑް ސަންސް" އިންނެވެ.

ހަމަ މިއާ އެކު "އާޝިގީ 3" އަކީ އާލިއާ އަށް ވަރަށް ހާއްސަ ފިލްމެކެވެ. ސަބަބަކީ މިއީ އޭނާގެ އާއިލީ ފިލްމް ކުންފުނީގެ ފިލްމަކުން އޭނާ ފެންނަ ފުރަތަމަ ފަހަރެވެ.

ބަޓް ކޭމްޕްގެ އެންމެ ކާމިޔާބު ފްރެންޗައިޒްތަކުގެ ތެރޭގައި ހިމެނޭ "އާޝިގީ" އަކީ އާލިއާގެ ބައްޕަ މަހޭޝް ބަޓް 1990 ވަނަ އަހަރު ޑައިރެކްޓް ކުރި ފިލްމެކެވެ. އެ ފިލްމުގައި ލީޑް ރޯލް ކުޅުނީ ރާހުލް ރޯއި އާއި އަނޫ އަގަރްވާލެވެ.

އެ ފިލްމަށް ފަހު މުޅިން ތަފާތު ކާސްޓަކާ އެކު "އާޝިގީ 2" ރިލީޒް ކުރީ 2013 ގަ އެވެ. އެ ފިލްމުގައި ލީޑް ރޯލް ކުޅުނީ ޝްރަދާ ކަޕޫރާއި އަދިތިޔާ ރޯއި ކަޕޫރެވެ.