ސިއްހީ ކަންކަމަށް ވަގުތު ދޭން ސެލީނާ ގޯމޭޒް ކުޑަކުޑަ ބްރޭކަކަށް

ސެލީނާ ގޯމޭޒް: އޭނާ ބުނީ އަމިއްލަ ސިއްހަތަށް ވަގުތު ދޭން ބޭނުންވާ ކަމަށް.

އަހުމަދު އަދްޝަން، މިހާރު

02 ސެޕްޓެމްބަރ 2016 - 06:56

ފާއިތުވި ދުވަސްތަކުގައި މާ ބުރަކޮށް އުޅެން ޖެހުމުން އަމިއްލަ ސިއްހަތާ ދޭތެރޭ އެހާ ބޮޑު ސަމާލު ކަމެއް ދެވިފައި ނުވާތީ އެކަމަށް ވަގުތު ދިނުމަށްޓަކައި އެމެރިކާގެ މަޝްހޫރު ޒުވާން އަންހެން ލަވަ ކިޔުންތެރިޔާ ސެލީނާ ގޯމޭޒް ނިންމައިފި އެވެ.

އުމުރުން 24 އަހަރުގެ ލަވަ ކިޔުންތެރިޔާ ބުނީ ސިއްހީ ގޮތުން ދިމާވެފައި ހުރި ކަންކަމާ ދޭތެރޭ ވާހަކަ ދައްކަން އޭނާ ކަންބޮޑު ނުވާ ކަމަށެވެ.

ލަވަ ކިއުންތެރިޔާ ޖަސްޓިން ބީބާ އާ ކުރިން ރައްޓެހިވެގެން އުޅުނު ސެލީނާ ބުނީ ޑިޕްރެޝަނާއި ލުޕަސް ފަދަ ސިއްހީ މައްސަލަތަކަށް ސަމާލުކަން ދޭން މިހާރު ބޭނުންވާ ކަމަށެވެ. އޭނާ އަދި ބުނީ އަމިއްލަ ސިއްހަތާ ދޭތެރޭ ފަރުވާ ކުޑަ ކުރަން ބޭނުން ނުވާ ކަމަށެވެ. އެހެންވެ މަސައްކަތްތަކާ ދުވަސްކޮޅަކަށް ދުރުވެލައި، ސިކުނޑި ވެސް ތާޒާކޮށްލަން ބޭނުންވާ ކަމަށް ސެލީނާ ބުންޏެވެ.

"އަހަރެން ބޭނުން ހަށިގަނޑާއި ސިކުނޑި ތާޒާކޮށްލަން. އެހެންވެ މިކަން ކުރެވެން އޮތް ގޮތަކީ ބްރޭކެއް ނެގުން ކަމަށްވާތީ މަސައްކަތްތަކާ ދުރުވެލައި އަމިއްލަ ސިއްހަތާ ދޭތެރޭ ފޯކަސް ކުރަން މި ދަނޑިވަޅުގައި ވަރަށް ބޭނުން،" ހިޓް ލަވަތަކެއް އާންމުންނަށް ގެނެސް ދީފައިވާ ސެލީނާ ބުންޏެވެ.

ސެލީނާ ބުނިގޮތުގައި އޭނާގެ ފޭނުންނަކީ ވަރަށް މުހިއްމު ބައެކެވެ. އެހެންވެ އެ މީހުންގެ ހިތްތައް އުފާކޮށް ދިނުމުގައި ދެމިހުންނަށް އަބަދުވެސް ބޭނުންވެ އެވެ. އެ ސަބަބާ ހެދި ލަސްތަކެއް ނުވެ އެނބުރި އަންނާނެ ކަމަށް ސެލީނާ ބުންޏެވެ.

ބައެއް ފިލްމުތަކުން ވެސް ފެންނަ ސެލީނާ ވަނީ މިހާތަނަށް ސޯލޯ ދެ އަލްބަމެއް ވެސް ނެރެފަ އެވެ. އެއީ މިދިޔަ އަހަރު ނެރުނު "ސްޓާސް ޑާންސް އާއި 2013 ގައި ނެރުނު "ރިވައިވަލް" އެވެ.