ރޭޕްގެ ތުހުމަތު ކުރުމުން ކަންގަނާގެ މައްސަލަ ޕޮލިހަށް

ކަންގަނާ ރަނާވަތު ރޭޕްކުރި ކަމުގެ ތުހުމަތު އަދިތިޔާ ޕަންޗޯލީ އަށް ކޮށް އެކަމާ ގުޅިގެން ދައުވާކުރާނެ ކަމުގެ އިންޒާރު ދީފައިވާ ކަމަށް ބުނެ ފުލުހުންނާއި ކޯޓަށް ހުށަހަޅައިފި އެވެ.

ހިންދުސްތާން ޓައިމްސް އަށް އަދިތިޔާ ބުނީ ކަންގަނާގެ ވަކީލު ރިޒްވާން ސިއްދީގީ އިންޒާރު ދިނީ މިދިޔަ ޖެނުއަރީ މަހުގެ ކަމަށެވެ.

އެއްވެސް އިރެއްގައި ކަންގަނާ ރޭޕްކޮށްފައި ނުވަތަ ރޭޕް ކުރަން މަސައްކަތް ވެސް ކޮށްފައި ވެސް ނުވާނެ ކަމަށް އަދިތިޔާ ބުންޏެވެ. އޭނާ ބުނީ ކޯޓާއި ފުލުހުންނަށް މައްސަލަ ހުށަހެޅީ ވީޑިއޯ ހެއްކާ ވެސް އެކީގައި ކަމަށެވެ.

"ރޭޕްގެ ތުހުމަތު އެޅުވުމަކީ ވަރަށް ބޮޑު މައްސަލައެއް. އަދި ހަމައެއާ އެކު ރޭޕަކީ އަންހެނަކަށް ކުރިމަތިވާނެ އެންމެ ހިތްދަތި އެއް ކަންތައް. އަހަންނަކީ ދުވަހަކު ވެސް އެކަހަލަ ކަމެއް ކުރި މީހެއް ނޫން،" އަދިތިޔާ ބުންޏެވެ.

މިކަމާ ބެހޭ ގޮތުން މުމްބާއީގެ ވާސޯވާ ޕޮލިސް ސްޓޭޝަންގެ ސީނިއާ އޮފިސަރަކު މީޑިއާތަކަށް ވިދާޅުވީ މައްސަލަ ހުށަހަޅާފައިވާތީ ބަޔާން ދޭން ކަންގަނާ އާއި އަދިތިޔާ އަށް އަންގާފައި ވާނެ ކަމަށެވެ.

ބަތަލާ ޒަރީނާ ވައްހާބްގެ ފިރިމީހާ އަދި ޒުވާން އެކްޓަރު ސޫރަޖް ޕަންޗޯލީގެ ބައްޕަ ކަންގަނާގެ މައްސަލައެއް ފުލުހުންނާއި ކޯޓަށް ހުށަހަޅާފައި ވަނީ މީގެ 10 އަހަރު ކުރިން އޭނާ، ކަންގަނާ އަށް އެކި ގޯނާތަކާއި ފުރައްސާރަތަކާއި އަނިޔާ ވެސް ކޮށްފައިވާ ކަމަށް ބުނެ، ކަންގަނާގެ ދައްތަ ރަންގޯލީ ޗަންދެލް މިދިޔަ މަހުގެ ތެރޭގައި ފުލުހުންނަށް މައްސަލަ ހުށަހަޅާފައި ވަނިކޮށެވެ.

ބޮލީވުޑަށް ނުކުންނަން ކުރި މަސައްކަތުގެ ތެރޭގައި ކަންގަނާ، 32، ވަނީ އަދިތިޔާ، 54، އާ އެކު ދުވަސްތަކެއް ވަންދެން ލޯބީގެ ގުޅުމެއް ބާއްވައިފަ އެވެ.

އެ ގުޅުން ނިމުމަކަށް އައުމުން ކަންގަނާ ވަނީ އެތައް އިންޓަވިއުއެއްގައި އަދިތިޔާ އޭނާ އަށް ޖިންސީ ގޯނާކޮށް، އަނިޔާ ވެސްކޮށްފައިވާ ކަމަށް ތުހުމަތުކޮށްފަ އެވެ. އަދި ގެއެއްގެ ތެރެގައި ބަންދުކޮށްގެން ގެންގުޅުނު ކަމަށާއި ގޭގެ ކުޑަކުދޮރުން ފުންމާލައިގެން ސަލާމަތް ވާން އެތައް ފަހަރަކު މަސައްކަތްކޮށްފައި ވާނެ ކަމަށް ވެސް ބުނެފައިވެ އެވެ.