މިދިޔަ އަހަރު އެން މޮޅު ފިލްމުގެ އޮސްކާ އެވޯޑް ހޯދި ޑައިރެކްޓަރު ގްލިމޯ ޑެލް ޓޯރޯގެ ފިލްމު "ދަ ޝޭޕް އޮފް ވޯޓާ" ގެ ފޮލޯއަޕެއްގެ ގޮތުގައި ހަދާ "ނައިޓްމެއާ އެލީ" ލިއޮނާޑޯ ޑި ކެޕްރިއޯ އަށް ހުށަހަޅާފައި ވަނިކޮށް، ފިލްމުގެ ބަތަލުގެ ރޯލް މަޝްހޫރު އެކްޓަރު ބްރެޑްލީ ކޫޕާ އަށް ވެސް ހުށަހަޅައިފި އެވެ.
ވެރައިޓީން ބުނި ގޮތުގައި މިދިޔަ އަހަރު "އަ ސްޓާ އިޒް ބޯން" ޑައިރެކްޓްކޮށް، އޭގެ ބަތަލުގެ ރޯލް ކުޅުނު ކޫޕާ އަށް ގްލިމޯގެ ފިލްމު ހުށަހެޅީ ލިއޮނާޑޯގެ ފަރާތުން މިހާތަނަށް ފިލްމަށް އެއްބަސް ވާނެ ކަމުގެ އިޝާރާތެއް ނުލިބުމުންނެވެ. "ޓައިޓޭނިކް" ގެ ބަތަލަށް ފިލްމު ހުށަހެޅީ މިދިޔަ އެޕްރީލް މަހުގެ ތެރޭގަ އެވެ. އޭނާ ދެން އެންމެ އަވަހަށް ސްކްރީނުން ފެންނާނީ އަންނަ މަހުގެ 26 ގައި ރިލީޒްކުރާ ކްއެންޓިން ޓެރެންޓީނޯގެ "ވަންސް އަޕޮން އަ ޓައިމް އިން ހޮލީވުޑް" އިންނެވެ.
ވެރައިޓީން ބުނީ ކޫޕާއާ އެކު "ނައިޓްމެއާ އެލީ" ގެ ޓީމުން މަޝްވަރާ ކުރަމުން އަންނަ ކަމަށާއި ފިލްމަށް އޭނާ ސޮއި ކުރާނެ ކަމުގެ އުންމީދު ވެސް ބޮޑު ކަމަށެވެ.
ލިޔުންތެރިޔާ ވިލިއަމް ލިންޒީ ގްރެޝަމް 1946 ގައި ގެނެސް ދިން ވާހަކަ "ނައިޓްމެއާ އެލީ" އަށް ބިނާކޮށް ހަދާ ފިލްމުގެ ސްކްރީންޕްލޭ ލިޔަނީ "ދަ ޝޭޕް އޮފް ވޯޓާ" ގެ ސްކްރީންޕްލޭ ވެސް ލިޔުނު ޑައިރެކްޓަރު ގްލިމޯ އާއި ކިމް މޯގަން ގުޅިގެންނެވެ.
ފިލްމުގެ ޝޫޓިން އަންނަ އޮގަސްޓް ނުވަތަ ސެޕްޓެމްބަރުގައި ފަށަން ވަނީ ތާވަލުކޮށްފަ އެވެ.
ކޫޕާ އެންމެ ފަހުން ފެނިފައި ވަނީ ކްލިންޓް އީސްޓްވުޑް މިދިޔަ ޑިސެމްބަރު މަހު ގެނެސް ދިން "ދަ މިއުލް" އިންނެވެ. އޭނާ މިހާރު އަންނަނީ "ބާންސްޓެއިން" ގެ ނަމުގައި ބައޮގްރަފިކަލް ޑްރާމާއެއް ޑައިރެކްޓްކޮށް، ކުޅެން ތައްޔާރުވަމުންނެވެ.