އަނިލް ކަޕޫރާއި ފިރިހެން ދަރިފުޅު ހާޝްވަރުދަންގެ ފިލްމުގެ މަަސައްކަތް ހުއްޓައެއް ނުލާ

އަނިލް އާއި ދަރިފުޅު ހާޝް.

އަހުމަދު އަދްޝަން، މިހާރު

06 ޖުލައި 2019 - 08:00

އަނިލް ކަޕޫރާއި އޭނާގެ ފިރިހެން ދަރިފުޅު ހާޝްވަރުދަން ކަޕޫރް އެކީގައި ކުޅޭ ފިލްމު އިއުލާން ކުރިތާ މިހާރު ދެ އަހަރެއްހާ ދުވަސްވެއްޖެ އެވެ. އެކަމަކު އެ ފިލްމުގެ މަސައްކަތް މިހާތަނަށް ފެށިފައި ނުވާ އިރު، ބައެއް މީޑިއާތަކުން ވަނީ ފިލްމު ނަހަދައި، ހުއްޓައިލި ކަމަށް ވެސް މިދިޔަ ހަފުތާގައި ރިޕޯޓްކޮށްފަ އެވެ.

އެއާ އެކު އަނިލް ކުރި ޓްވީޓެއްގައި ވަނީ ފިލްމުގެ މަސައްކަތް ހުއްޓާނުލާކަން ކަށަވަރުކޮށް ދިނުމަށް ފަހު، މާ ލަހެއް ނުވެ އޭގެ މަސައްކަތް ފަށާނެ ކަމަށް ބުނެފަ އެވެ. މި ފިލްމަކީ އޮލިމްޕިކް ގޭމްސްގެ ރަން މެޑެލް ހޯދާފައިވާ އިންޑިއާގެ ކުރީގެ ޝޫޓަރު އަދި މިހާރު ވިޔަފާރިވެރިޔާ އަބިނާވް ބިންދުރާގެ ވާހަކަ ކިޔައިދޭ ފިލްމެކެވެ.

އޭގައި އަބިނާވްގެ ރޯލް ހާޝް ކުޅެން ހަމަޖެހިފައިވާ އިރު، އަނިލް ކުޅޭނީ އޭނާގެ ބައްޕަ އަޕްޖީތު ބިންދުރާގެ ރޯލެވެ.

Great stories take time to be told! The world will see the inspirational life story of @Abhinav_Bindra on the big screen soon! So incredibly excited for this! @apjitbindra @HarshKapoor_ pic.twitter.com/0OtUkq2LJ4
— Anil Kapoor (@AnilKapoor) July 3, 2019

އަބިނާވް އާއި އޭނާގެ ބައްޕައާ އެކު ނަގާފައިވާ ދެ ފޮޓޯއަކާ އެކު އަނިލް ކުރި ޓްވީޓްގައި ބުނީ އަބިނާވްގެ ޝައުގުވެރި ވާހަކަ ބޮޑު ސްކްރީނުގައި ކިޔައި ދޭނެ ކަމަށާއި އެ ފިލްމާ ދޭތެރޭ ވަރަށް އުފަލުން ހުރި ނަމަވެސް އިތުރު އެއްވެސް ތަފުސީލެއް ހިއްސާއެއް ނުކުރެ އެވެ.

I am stoked to have been chosen to play #AbhinavBindra and hopefully will do justice to the man, the legend!https://t.co/5o3S7SMzHN pic.twitter.com/WUgptpJPvA
— Harsh Varrdhan Kapoor (@HarshKapoor_) September 5, 2017

ހާޝްއަކީ 2016 ވަނަ އަހަރު ފިލްމު "މިރުޒިޔާ" އިން ތައާރަފުވި އެކްޓަރެކެވެ. އޭގެ ފަހުން އޭނާ ފެނިފައި ވަނީ މިދިޔަ އަހަރު ރިލީޒް ކުރި "ބަވޭޝް ޖޯޝީ" އިންނެވެ. މި ދެ ފިލްމަކީ ވެސް ބަލާނެ ބަޔަކު ނުވެގެން ފްލޮޕް ބޯޑް އަޅުވަން ޖެހުނު ދެ ފިލްމެވެ.

އަނެއްކޮޅުން ހާޝް، 28، އަށް އަކީ އޭނާގެ އަޑު މަޑު ވިދުމެއް ނެތް އެކްޓަރެކެވެ. މިހާތަނަށް އޭނާއަކަށް މާ ރަނގަޅު ފުރުސަތުތަކެއް ވެސް ލިބިފައެއް ނެތެވެ. އެހެންވެ ބެލުންތެރިން ވެސް ހަގީގަތުގައި އޭނާގެ މަތިން ހަނދާނެއް ނުހުރެ އެވެ.

ފިރިހެން ދަރިފުޅާ އެކު ފިލްމެއް ކުޅެން ލިބުނު އިރު، އަނިލް ވަނީ އަންހެން ދަރިފުޅު ސޯނަމް ކަޕޫރާ އެކީ ވެސް ފިލްމެއް ކުޅެފަ އެވެ. އެއީ މި އަހަރުގެ ފެބްރުއަރީގައި ރިލީޒް ކުރި "އެކް ލަޅްކީ ކޮ ދޭކާ ތޮ އޭސާ ލަގާ" އެވެ.

އުމުރުން ދުވަސް ވިޔަސް އަނިލްއަކީ އަދިވެސް ގިނަ ފުރުސަތުތައް ލިބޭ އެކްޓަރެކެވެ. އޭނާގެ ކުރިއަށް ހުރި ފިލްމުތަކުގެ ތެރޭގައި "ޕާގަލްޕަންތީ"، "މަލަންގް" އަދި "ތަހުތު" ފާހަގަކޮށްލެވެ އެވެ.