އާއިލީ ފިލްމުތައް ހަދަން ކުޅަދާނަ ބޮލީވުޑްގެ މަޝްހޫރު ޑައިރެކްޓަރު ސޫރަޖް ބަރްޖަތިއާގެ ދެވަނަ ފިރިހެން ދަރިފުޅު އަވްނީޝް ބަރްޖަތިއާ ޑައިރެކްޝަނަށް ނުކުންނަ ފިލްމުގެ ބަތަލުގެ ރޯލް ކާތިކް އާރިޔަން އަށް ހުށަހަޅައިފި އެވެ.
ޕިންކްވިލާ އިން ބުނިގޮތުގައި އަވްނިޝް، 26، ގެ އަލަތު ފިލްމާ ގުޅޭ ގޮތުން އޭނާ އާއި ބައްޕަ ސޫރަޖް ދާދި ފަހުން ކާތިކާ ބައްދަލުކޮށް، ފިލްމު ކާތިކަށް ނެރޭޓްކޮށް ދީފައިވެ އެވެ. އަދި ކޮންސެޕްޓް ޒުވާން އެކްޓަރު ގަޔާވިލެއް ބޮޑުކަމުން ވަގުތުން ފިލްމަށް އެއްބަސްވެފައިވާ ކަމަށް ބުންޏެވެ.
އަނެއްކޮޅުން ސޫރަޖްގެ އާއިލީ ފިލްމު ކުންފުނި ރާޖްޝްރީ ޕްރޮޑަކްޝަނަކީ މިހާތަނަށް ވަރަށް ކާމިޔާބު ރީތި ފިލްމުތަކެއް ގެނެސްދީފައިވާ ޕްރޮޑަކްޝަން ހައުސްއަކަށްވާތީ، އެ ތަނުގެ ފިލްމެއްގައި މަސައްކަތް ކުރުމަކީ ބޮލީވުޑްގެ ހުރިހާ ތަރިންގެ ވެސް ހުވަފެނެކެވެ.
"މޭނޭ ޕިޔާރު ކިޔާ" އާއި "ހަމް އާޕް ކޭ ހޭ ކޯން" އަދި "ހަމް ސާތު ސާތު ހޭ" ފަދަ ފިލްމުތައް ގެނެސްދިން ރާޖްޝްރީން އެންމެ ފަހުން ގެނެސްދިން ފިލްމަކީ މި އަހަރުގެ ކުރީކޮޅު ރިލީޒްކުރި "ހަމް ޗާރް" އެވެ.
ސަލްމާން ޚާނާ އެކު އާންމުކޮށް ފިލްމުތައް ހަދާ ސޫރަޖް ޑައިރެކްޓްކޮށް އެންމެ ފަހުން ގެނެސްދިނީ 2015 ގެ "ޕްރޭމް ރަތަން ދަން ޕާޔޯ" އެވެ. އޭނާ ދެން ހަދާ ފިލްމު ވެސް ކުޅޭނީ ސަލްމާނެވެ.
ސޫރަޖްގެ ދަރިފުޅު އަވްނިޝް ޑައިރެކްޝަނަށް ނުކުންނަ ފިލްމަކީ ޒުވާނުންނާ ވަރަށް ގުޅޭ ގޮތަށް ގެނެސްދޭނެ ފިލްމެއް ކަމަށާއި އެއީ 2011 ގައި ރަންބީރު ކަޕޫރާ އެކު ޑައިރެކްޓަރު އަޔާން މުކަރްޖީ ގެނެސްދިން "ވޭކަޕް ސިދް" ކަހަލަ ފިލްމަކަށް ވާނެ ކަމަށް ޕިންކްވިލާ އިން ބުންޏެވެ.
އެ ނޫހުން ބުނިގޮތުގައި އަންނަ އަހަރުގެ ކުރީކޮޅު ފިލްމު އިއުލާންކޮށް، އޭގެ މަސައްކަތް ފަށާނެ އެވެ.