ޖޭމްސް ބޮންޑްގެ ރޯލް ބަތަލާއަކު ނުކުޅޭނެ: ޕްރޮޑިއުސަރު

މި އަހަރު ގެނެސްދޭ ޖޭމްސް ބޮންޑް ސީރީޒްގެ 25 ވަނަ ފިލްމު "ނޯ ޓައިމް ޓު ޑައި" އަށް ފަހު، މި ސީރީޒްގެ ކުރިއަށް އޮތް ބައިގައި ޓައިޓްލް ރޯލް ކުޅޭނީ ބަތަލާއަކު ކަމަށް ބުނާ ވާހަކަތައް ޕްރޮޑިއުސަރު ބާބަރާ ބްރޮކޮލީ ދޮގުކޮށްފި އެވެ.

މީޑިއާތަކުން ކުރިން ރިޕޯޓްކުރަމުން ދިޔަ ގޮތުގައި ފަސް ފިލްމެއްގައި ބޮންޑްގެ ރޯލް ކުޅުމަށް ފަހު، ޑެނިއަލް ކްރެއިގް އެ ކެރެކްޓާ ދޫކޮށްލާތީ، ބޮންޑް ސީރީޒްގެ 26 ވަނަ ފިލްމުގައި މައި ކެރެކްޓާ ކުޅޭނީ "ނޯ ޓައިމް ޓު ޑައި" ގައި ވެސް މުހިއްމު ރޯލެއް އަދާކޮށްފައިވާ ބަތަލާ ލަޝާނާ ލީންޗެވެ.

ނަމަވެސް އެކަން ދޮގުކުރަމުން ބާބަރާ ވެރައިޓީ އަށް ބުނީ އަބަދު ވެސް ބޮންޑްގެ ރޯލް ކުޅޭނީ އެކްޓަރެއް ކަމަށެވެ.

"އަދި ކުރިއަށް އޮތް ތަނުގައި އެ ކެރެކްޓާ ވަކި ކުލައެއްގެ އެކްޓަރަކަށް ހާއްސައެއް ވެސް ނުވާނެ." މިހާތަނަށް ބޮންޑްގެ ރޯލް ކުޅެފައި ވަނީ ދޮން އެކްޓަރުންނަށްވާތީ އެކަމަށް އިޝާރާތްކޮށް އޭނާ ބުންޏެވެ.

ބާބަރާ ބުނިގޮތުގައި ފިރިހެން ކެރެކްޓާއެއް، އަންހެނަކަށް ފައްތައިގެން ގެނެސްދިނުމަކީ އޭނާ ޝައުގުވެރި ވެސް ވާ ވެސް ނޫނެވެ. އޭގެ ބަދަލުގައި ބޭނުން ވަނީ ބޮންޑްގެ ފިލްމުތަކުގައި އަންހެން ވަރުގަދަ ކެރެކްޓާތަކެއް ހިމަނަން ކަމަށް ބުންޏެވެ.

"އެއީ ކަންނޭނގޭ ކުރަންވީ ކަމަކީ. ވަރުގަދަ އަންހެން ކެރެކްޓާތައް ބަތަލާއިންނަށް ފައްކާކުރަންވީ. އެކަން އަހަރެން ކުރާނަން،" ބާބަރާ ބުންޏެވެ.

ބޮންޑްގެ ރޯލުން ބަތަލާ އެކު ފެނުމާ ބެހޭ ވާހަކަތައް ޝައުގުވެރި ބަހުސެއްގެ ގޮތުގައި އޮތް އޮތުމަށް ޕްރޮޑިއުސަރު ނިމުމެއް ގެނެސްދިން އިރު، ބޮންޑްގެ ރޯލުން ބަތަލާ އަކު ފެންނަން ބޭނުންވާ ކަމަށް އެ ރޯލް ކުޅުނު ބައެއް އެކްޓަރުން ވެސް ބުނެފައިވެ އެވެ. އޭގެ ތެރޭގައި ބޮންޑްގެ ރޯލް ހަތަރު ފިލްމެއްގައި ކުޅުނު ޕިއާސް ބްރޮޒްނަން ހިމެނެ އެވެ.

ބޮންޑްގެ ރޯލުން ކްރެއިގް ފެންނާނެ ފަހު ފިލްމު "ނޯ ޓައިމް ޓު ޑައި" ރަސްމީކޮށް ސިނަމާތަކަށް އަންނާނީ އެޕްރީލް މަހުގެ 10 ގަ އެވެ.