ރިޝީ ކަޕޫރްގެ ހާލު ގޯސްވެގެން އެޑްމިޓްކޮށް، ފަރުވާދެނީ

އަހަރެއްހާ ދުވަސްވަންދެން އެމެރިކާގައި ކެންސަރަށް ފަރުވާ ހޯދި ބޮލީވުޑްގެ އެކްޓަރު ރިޝީ ކަޕޫރްގެ ހާލު ކުއްލިއަކަށް ސީރިއަސްވެގެން ހޮސްޕިޓަލްގައި އެޑްމިޓްކޮށްގެން ފަރުވާ ދޭން ފަށައިފި އެވެ.

އިންޑިއާގެ މީޑިއާތަކުން ބުނިގޮތުގައި 67 އަހަރުގެ އެކްޓަރު އެޑްމިޓްކުރީ އާއިލާ ބައެއްގެ ހަފުލާއަކަށް ވެރިރަށް ދިއްލީ އަށް ގޮސް އުޅެނިކޮށް ހާލު ގޯސްވުމުންނެވެ. ދިއްލީ އަށް ރިޝީ ދިޔައީ އަންހެނުން ނީޓޫ ސިންގް އެކީގަ އެވެ. އަދި ރިޝީގެ ހާލަތު ގޯސްވި ޚަބަރު ލިބުމާ އެކު ފިރިހެން ދަރިފުޅު އަދި އެކްޓަރު ރަންބީރު ކަޕޫރާއި ލޯބިވެރިޔާ އަދި ބަތަލާ އާލިއާ ބަޓް ވެސް ވަނީ ދިއްލީ އަށް ގޮސްފައި ކަމަށް މީޑިއާތަކުން ބުނެ އެވެ.

ރިޝީގެ އަންހެން ދަރިފުުޅު ރިދިމާ ކަޕޫރަކީ ދިއްލީ ވިޔަފާވެރިއަކާ ކައިވެނިކޮށްގެން އެތަނުގައި ދިރިއުޅޭ މީހެކެވެ.

ދެހާސް އަށާރައިގެ ސެޕްޓެމްބަރު މަހުގެ ފަހުކޮޅު ކެންސަރުގެ ފަރުވާ އަށް އެމެރިކާގެ ނިއު ޔޯކަށް ގޮސް، ފަރުވާ ފުރިހަމަކުރުމަށް ފަހު ރިޝީ އެނބުރި އިންޑިއާ އަށް ދިޔައީ މިދިޔަ އަހަރުގެ ސެޕްޓެމްބަރު މަހުގެ ކުރީކޮޅު އެވެ.

މުމްބާއީ އަށް ގޮސް ރިޝީ ވަނީ ފިލްމީ މަސައްކަތްތައް ވެސް އަލުން ފަށައިފަ އެވެ. އޭނާ އެންމެ ފަހުން ފެނިފައި ވަނީ ޑިސެމްބަރު މަހު ރިލީޒްކުރި "ދަ ބޮޑީ" އިންނެވެ.

ރިޝީ ސޮއިކޮށްފައިވާ ފިލްމުތަކުގެ ތެރޭގައި ޖޫހީ ޗާވްލާއާ އެކު ކުޅޭ ފިލްމަކާއި ދީޕިކާ ޕަދްކޯންއާ އެކު ކުޅޭ ހޮލީވުޑްގެ ފިލްމު "ދި އިންޓާން" ގެ ހިންދީ ރިމެކް ހިމެނެ އެވެ.