ކާތިކް އާރިޔަނަށް އެކްޝަން ފިލްމެއް

ބޮލީވުޑްގައި މިހާރު ފިޔަޖަހަމުން އަންނަ ޒުވާން އެކްޓަރު ކާތިކް އާރިޔަން އެކްޝަން ފިލްމަކަށް ސޮއިކޮށްފައިވާ ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި މިހާތަނަށް ކުޅުނު ހުރިހާ ފިލްމުތަކެއްގައިހެން ލަވަ ބޯއިއެއްގެ ކެރެކްޓާ ކުޅުނު ކާތިކަށް އެކްޝަން ފިލްމަކުން ފުރުސަތު ދިނީ އޯމް ރައުތެވެ. އޭނާ އަކީ މި މަހުގެ 10 ގައި ރިލީޒްކޮށް، ބޮޑު ކާމިޔާބީއެއް ހޯދަމުން އަންނަ އަޖޭ ދޭވްގަންގެ ތާރީހީ ހަނގުރާމަ ފިލްމު "ތާނަޖީ: ދި އަންސަންގް ވޮރިއާ" ގެ ޑައިރެކްޓަރެވެ.

ބޮލީވުޑް ހަންގާމާ އިން ބުނިގޮތުގައި އޯމް ކާތިކަށް ހުށަހެޅި ފިލްމުގެ ނަން ވެސް މިހާރު ފައިނަލްކޮށްފައިވާ އިރު، ވަރަށް އަވަހަށް އެ ފިލްމު އިއުލާންކުރާނެ އެވެ. އަދި އެއަށް މިހާރު ބަތަލާ އަކު ހޯދަމުން އަންނަ ކަމަށް ބުންޏެވެ.

"ސޯނޫ ކޭ ޓިޓޫ ކީ ސްވީޓީ" އާއި "ލުކާ ޗުއްޕީ" އަދި "ޕަތީ ޕަތުނީ އޯރް ވޯ" ފަދަ ފިލްމުތައް ކުޅެފައިވާ ކާތިކް، 29، ގެ ކުރިއަށް އޮތް ފިލްމަކީ މި މަހުގެ 14 ގައި ރިލީޒްކުރާ ލޯބީގެ ފިލްމު "ލަވް އާޖް ކަލް" އެވެ.

އޭނާގެ ކުރިއަށް ހުރި ފިލްމުތަކުގެ ތެރޭގައި "ދޯސްތާނާ 2" އާއި "ބޫލް ބުލައްޔާ 2" ހިމެނެ އެވެ.