ޗައިނާގެ ސިނަމާތައް އަލުން ހުޅުވަން ތައްޔާރު ވަނީ

ކޮރޯނާވައިރަހުގެ ބަލިމަޑުކަން އެންމެ ފުރަތަމަ ފެތުރުނު ޗައިނާ އާންމު ހާލަތަކަށް ބަދަލުވާތީ ވިޔަފާރިތައް ވެސް ހުޅުވަމުން އަންނަ އިރު، އެ ގައުމުގެ ސިނަމާތައް ވެސް އަލުން ހުޅުވަން ތައްޔާރީތައް ވާން ފަށައިފި އެވެ.

ކޮވިޑް-19އާ ހެދި ޗައިނާގެ ދެ ސިނަމާއެއްގައި ހާއްސަ ފިޔަވަޅުތަކެއް އަޅައިގެން ހިދުމަތް ދިން ނަމަވެސް އެހެން ހުރިހާ ހުރިހާ ސިނަމާތަކެއް ބަންދުކޮށްފައިވާތާ ގާތްގަނޑަކަށް ދެ މަހެއްހާ ދުވަސް ފަހުން އަލުން ސިނަމާތައް ހުޅުވަން އާންމުންގެ ހިޔާލު ހޯދަން ވެސް ސާވޭއެއް ވަނީ ފަށައިފަ އެވެ.

އެގޮތުން އެ ގައުމުގެ 54 ޕަސަންޓަށް ވުރެ ގިނަ މީހުން ވަނީ ސިނަމާތަކަށް ގޮސް ފިލްމުތައް ބަލަން މިހާރު އެ މީހުން ތައްޔާރަށް ތިބި ކަމަށް ބުނެފަ އެވެ. ނަމަވެސް ކުރިއެކޭ އެއްގޮތަށް ސިނަމާތައް އަލުން ހުޅުވާނެ ސީދާ ތާރީހެއް އަދި އިއުލާނެއްނުކުރެ އެވެ. ރިޕޯޓްތައް ބުނާގޮތުން ފަހަރުގައި އަންނަ މަހުގެ ކުރީކޮޅު ނުވަތަ މެއި މަހު ޗައިނާގެ ހުރިހާ ސިނަމާތަކެއް ހުޅުވާނެ އެވެ.

އެ ގައުމުގެ ބެއިޖިން މުނިސިޕަލް ފިލްމު ބިއުރޯއިން މިހާރު ވަނީ ސިނަމާތައް ބަންދުކުރަން ޖެހުމުން ލިބުނު ގެއްލުންތަކަށް މާލީ އެހީދޭން ނިންމައި، އޭގެ ފުރަތަމަ ފިޔަވަހީގެ ދަށުން ދޫކުރާ އެހީ އަށް އެދި ހުށަހެޅުމުގެ ފުރުސަތު ވެސް މި މަހުގެ 27 އާ ހަމަ އަށް ހުޅުވާލައިފަ އެވެ.

އެގޮތުން "ސްޕެޝަލައިޒްޑް ފިލްމު އިންޑަސްޓްރީ ޑިވެލޮޕްމަންޓް ފަންޑިން" ގެ ނަމުގައި ތިން ކެޓަގަރީއަކުން ސިނަމާތައް ހިންގާ މީހުންނަށް ފައިސާ ދޫކުރާނެ އެވެ. އޭގެ ތެރޭގައި ހިމެނޭ ފުރަތަމަ ކެޓަގަރީ އަކީ ކޮރޯނޯވައިރަސް މިދިޔަ އަހަރުގެ ފަހުކޮޅު ފެތެރުން ފެށުމާ އެކު ފިލްމީ ވިޔަފާރި އަށް އަސަރުކޮށް ޓިކެޓްތައް ނުވިކި ލިބުނު ގެއްލުންތަކަށް ދޭ އެހީ އެވެ.

ދެވަނަ ބަޔަކީ 2016-2018 އާ ދެމެދު ހިދުމަތަށް ނުކުތް ސިނަމާތައް އަލުން ކޮޅަށް ޖެހުމަށް ދޭ އެހީ އެވެ.

ތިން ވަނަ ބަޔަކީ ޗައިނާގައި އުފައްދައި، ދުނިޔޭގެ މާކެޓްތަކުގައި ވެސް ދައްކައިގެން އެ ފިލްމުތަކަށް ކުރި ހަރަދުގެ 40 ޕަސަންޓަށް ވުރެ މަތީ އާމްދަނީއެއް ހޯދި ފިލްމުތަކަށް ދޭ އެހީ އެވެ. މީގެ ބޭނުމަކީ ޗައިނާގައި އުފައްދާ ފިލްމުތައް އިތުރުކޮށް، ފިލްމީ ސިނާއަތުގައި ޗައިނާގެ ފިލްމުތަކުގެ ވާދަވެރިކަން ބޮޑުކުރުމެވެ.

ކޮރޯނާވައިރަހުން އަރައިގަތުމަށް ޗައިނާ މުޅި ދުނިޔެ އަށް ދެއްކި ނަމޫނާއާ އެކު، އެ ގައުމު މިހާރު ވަނީ އާންމު ހާލަތަށް ރުޖޫއަވާން ފަށައި، އިގުތިސާދު ވެސް ހިނގައިގަންނަން ފަށައިފަ އެވެ. އެގޮތުން ޗައިނާގައި ހިންގާ ބޭރުގެ ގިނަ ވިޔަފާރިތައް ވެސް ވަނީ އަލުން ހުޅުވައިފަ އެވެ. އޭގެ ތެރޭގައި އެޕަލް ކުންފުނީގެ ތަންތަނާއި ޑިޒްނީން ހިންގާ ޝަންހާއީ ޑިޒްނީ ރިސޯޓް ފަދަ ތަންތަން ފާހަގަކޮށްލެވެ އެވެ.