ކާތިކް ބޭނުންވީ "ދޯސްތާނާ 2" އިން ޖާންވީ ވަކިކުރުވަން!

ޝޫޓިންގެ ބޮޑު ނިމިފައި ވަނިކޮށް ޖެހުނު މައްސަލަތަކެއްގައި ފިލްމު އެއް ލީޑް އެކްޓަރު ކަމަށްވާ ކާތިކް އާރިޔަން ފިލްމު ވަކިކުރަން މަޖުބޫރުވީ އޭގެ ބަތަލާ ޖާންވީ ކަޕޫރާއި އޭނާއާ ދެމެދު ޖެހުނު ކުނީގެ ސަބަބުން ޖާންވީއާ އެކު ކާތިކް މަސައްކަތްކުރަން ބޭނުން ނުވެވެގެ، ޒުވާން ބަތަލާ ފިލްމުން ވަކިކުރަން ޑިމާންޑްކުރުމުން ބައެއް ރިޕޯޓްތައް ބުނެފި އެވެ.

ކަރަން ޖޯހަރްގެ ދަރުމާ އިން ހަދާ ފިލްމުން ކާތިކް ވަކިކުރި ފަހުން، އެތައް ވާހަކައެއް ދަނީ ދެކެވެމުންނެވެ. ސަބަބަކީ އޭނާ ވަކިކުރި ސަބަބާ ބެހޭ އެއްވެސް ވާހަކައެއް ރަސްމީކޮށް ހިއްސާކޮށްފައި ނުވާތީ އެވެ.

ކުރިން މީޑިއާތަކުން ބުނީ އަރަމުން އަންނަ ޒުވާން އެކްޓަރު "ދޯސްތާނާ 2" އިން ވަކިކުރަން މަޖުބޫރުވީ އޭނާގެ ފަރާތުން ޕްރޮފެޝަނަލްކަން ކުޑަ ކަންތައްތަކެއް ފެންނަމުން ދިއުމާ ގުޅިގެންނެވެ. އޭގެ ތެރޭގައި ފިލްމުގެ ބާކީ ހުރި މަންޒަރުތައް ޝޫޓްކުރަން ވަގުތު ނުދިނުން ހިމެނެ އެވެ.

ކާތިކް ފިލްމުން ވަކިކުރި އިރު 2019 ގައި ޝޫޓިން ފެށި ފިލްމުގެ 60 ޕަސަންޓް ޝޫޓޮން އޮތީ ނިމިފައި ކަމަށް މީޑިއާތަކުން ބުންޏެވެ. އަދި އޭނާ ފިލްމުން ވަކިކުރަން ޖެހުމަކީ ދަރުމާ އަށް ލިބުނު 20 ކްރޯޑް ރުޕީސްގެ ގެއްލުމެކެވެ. ސަބަބަކީ ފިލްމު އަލުން ޝޫޓް ވެސް ކުރަން ޖެހުމެވެ.

ކާތިކް ފިލްމުން ވަކިކުރި ކަމަށް ބުނާ ސަބަބުތަކުގެ ތެރޭގައި އޭނާ ކުރިން ފިލްމަށް އެއްބަސްވި އަގަށް ވުރެ ބޮޑު އަގެއް ފަހުން ޑިމާންޑްކުރަން ފެށުން ވެސް ހިމެނޭ ކަމަށްވެ އެވެ. ބައެއް ނޫސްތަކުން ބުނި ގޮތުގައި އޭނާ "ދޯސްތާނާ 2" އަށް ސޮއިކުރީ ގާތްގަނޑަކަށް 2-3 ކްރޯޑް ރުޕީސްއަށެވެ. އެކަމަކު މިދިޔަ އަހަރު ފިލްމު ކުޅޭ އަގު 7 ކްރޯޑް ރުޕީސް އަށް ބޮޑުކުރުމަށް ފަހު، ފިލްމުން އެ އަދަދާ ގާތްކުރާ ވަރުގެ އަދަދެއް ހޯދަން ޑިމާންޑްކޮށްފައިވެ އެވެ. އަދި އެކަންވީ ކަރަން އާއި ދަރުމާ އަށް އެއްބަސްވެވެން ނެތް ކަމަކަށްވުމުން ކޯޅުން ބޮޑުވުމުން ކާތިކް ފިލްމުން ވަކިކުރީ އެވެ.

މިހާރު ޚަބަރުތައް ބުނާ ގޮތުން އޭނާ ފިލްމުން ވަކިކުރަން ޖެހުނު މައިގަނޑު ސަބަބަކީ ޖާންވީ ލައިގެން ފިލްމު ކުރިއަށް ގެންދާ ނަމަ އޭގެ މަސައްކަތްނުކުރާނެ ކަމަށް ބުނެ ކާތިކް ބޮޑާހޭކުމެވެ. އަދި އެ ޝަކުވާ ކާތިކް އެންމެ ބޮޑަށް ކުރި ކަމަށް ވަނީ "ދޯސްތާނާ 2" ގެ ޑައިރެކްޓަރު ކޮލިން ޑި ކަންހާއާ އެވެ. އެކަމަކު އޭނާ މަސައްކަތްކުރަނީ ކަރަންގެ ލަފާގެ ދަށުން ކަމަށްވާތީ ޖާންވީ ވަކިކުރަން ބޭނުން ނުވީ އެވެ.

އަނެއްކޮޅުން އޭނާ ފިލްމުން ވަކިކޮށްފި ނަމަ އަނެއްކާ ވެސް އަލުން ޝޫޓްކުރަން ޖެހި ބޮޑު ހޭދައެއްކުރަން ޖެހޭނީ އެކަމަށް އެއްބަސްވުމަކަށް އާދެވޭ ގޮތް ނުވުމުން ކަރަން އާއި ކާތިކާ ދެމެދު މައްސަލަ ޖެހި، އެންމެ ފަހުން އޭނާ ފިލްމުން ވަކިކުރީ އެވެ. ކާތިކާއި ޖާންވީ ރައްޓެހިވެގެން އުޅުނުކަމުގެ އަޑުތަކެއް ވެސް ވަރަށް ފަހުން އެރި އެެ. އެކަމަކު އޭގެ ހަގީގަތެއް ސާފެއް ނުވެ އެވެ. ބައެއް މީޑިއާތަކުން ބުނީ މި އަހަރުގެ ޖެނުއަރީން ފެށިގެން ކާތިކާ އޮތް ހުރިހާ ގުޅުމެއް ޖާންވީ ކަނޑާލާފައިވާ ކަމަށެވެ.

ކުރީގެ ބަތަލާ ސްރީދޭވީގެ ދަރިފުޅު ޖާންވީ އަކީ ކަރަން ޕްރޮޑިއުސްކުރި ފިލްމަކުން ބޮލީވުޑަށް ނެރުނު ބަތަލާއެކެވެ. އެއީ 2018 ގެ "ދަޅަކް" އެވެ. އަނެއްކޮޅުން ޖާންވީގެ އާއިލާ އަކީ ކަރަންއާ އަބަދު ވެސް ވަރަށް ގާތް ބަޔަކަށްވުމުން ކާތިކްގެ އެދުމަކަށް ޖާންވީ ދޫކޮށްލުމަކީ ކަރަން ކުރާނެ ކަމެއް ނޫނެވެ.

ބޮލީވުޑްގެ އެންމެ ކާމިޔާބު ފިލްމު ކުންފުނިތަކުގެ ތެރޭގައި ހިމެނޭ ދަރުމާ އިން ލިބުނު ފުރަތަމަ ފުރުސަތު ކާތިކަށް ގެއްލުނު އިރު، އޭނާއާ އެކު ދެން ދުވަހަކު ވެސް އެ ސްޓޫޑިއޯ އިން މަސައްކަތް ނުކުރަން ނިންމާފައިވާ ކަމަށް ވެސް ރިިޕޯޓްތައް ބުނެފި އެވެ.

"ދޯސްތާނާ 2" އަކީ ކާތިކާއި ޖާންވީގެ އިތުރުން އަލަށް ތައާރަފުކުރާ ލަކްޝް ހިމަނައިގެން ހަދަން ފެށި ފިލްމެކެވެ. ކާތިކް ފިލްމުން ވަކިކޮށް އެ ރޯލު ދެން ކުޅޭނެ އެކްޓަރަކު އަދި އިއުލާނެއް ނުކުރެ އެވެ.