ލުކާކޫ ނުކުމެ ބާރުގަދަ ރަޝިއާގެ މައްޗަށް ކުރި ހޯދައިފި

ޕީޓާސްބާގް، ރަޝިއާ (ޖޫން 13) - ރޮމެލޫ ލުކާކޫގެ ދެ ލަނޑާ އެކު، ރަޝިއާގެ އަމިއްލަ ދަނޑުގައި އެ ގައުމުގެ މައްޗަށް 3-0 އިން ކުރި ހޯދައިފި އެވެ.

އެންމެ ފަހުގެ ވޯލްޑް ކަޕްގައި އަމިއްލަ ގައުމުގައި ކުޅުނު، ރަޝިއާ ވީ އެހެން ޓީމުތަކަށް ބަލިކުރަން އުނދަގޫ ޓީމަކަށެވެ. އެ ރޫހުގައި ނުކުމެ ކްއާޓާ ފައިނަލަށް ދަތުރު ކުރި ޓީމަށް، ބެލްޖިަމްގެ ކުރިމަތީގައި މިރޭ ބާރެއް ނުދެއްކުނެވެ.

ޓީމުގެ މިޑްފީލްޑްގެ އެންމެ މުހިންމު ކުޅުންތެރިޔާ، ކެވިން ޑިބްރައިނާ ނުހިމަނައި މެޗަށް ނުކުތް ބެލްޖިއަމްގެ ތަރިއަކީ، ނިމިދިޔަ ސީޒަނުގައި ތަފާތު ފޯމެއްގައި ހުރި ލުކާކޫ އެވެ. މެޗު ފެށިގެން 10 ވަނަ މިނެޓްގައި، އޭނާ ވަނީ ބެލްޖިއަމްއަށް ލީޑު ނަގަައި ދީފަ އެވެ. ލުކާކޫ އަށް ލިބިެން ދިޔަ ބޯޅަ ހުއްޓުވުމުގެ ގޮތުން ރަޝިއާގެ ކުޅުންތެރިން ވިސްނީ އޮފްސައިޑް މަޅީގައި ލުކާކޫ ޖެއްސުމަށެވެ. އެހެންނަމަވެސް އޭނާ ވަނީ އޮފްސައިޑުން ސަލާމަތްވެ ރަޝިއާ ކޮޅަށް ލަނޑު ޖަހައިފަ އެވެ.

ލުކާކޫ ލަނޑު ޖެހުމަށް ފަހު އުފާފާޅުކުރުމުގައި ލަނޑު ހާއްސަކުރީ އޭނާއާ އެކު އިންޓަ މިލާނަށް ކުޅޭ ޑެންމާކްގެ މިޑްފީލްޑަރު ކްރިސްޓިއަން އެރިކްސަނަށެވެ. މިރޭ ޑެންމާކް އާއި ފިންލެންޑް ކުޅުނު މެޗުގެ ފުރަތަމަ ހާފުގައި އެރިކްސަން ކުއްލަިއަކަށް ދަނޑު މައްޗަށް ވެއްޓި ހޭ ނެތުމުން މެޗު މެދުކަނޑާލައި ހޮސްޕިޓަލަށް ގެންގޮސް ފަރުވާ ދޭން ފެށި އެވެ.

ބެލްޖިއަމްގެ ދެ ވަނަ ލަނޑު ކާމިޔާބު ކުރީ، ފުރަތަމަ ހާފުގައި ބަދަލު ކުޅުންތެރިޔެއްގެ ގޮތުގައި ކުޅެން ނުކުތް ތޯމަސް މުނިއާ އެވެ.

ބެލްޖިއަމްގެ ކީޕަރު ކޯޓުއާ ޓެސްޓް ކޮށްލެވޭ ވަރުގެ ނުރައްކާތެރި ގިނަ ފުރުސަތެއް ރަޝިއާއަކަށް ނުއުފެއްދުނެވެ. ލުކާކޫގެ ދެ ވަނަ ލަނޑު އޭނާ ކާމިޔާބުކުރީ މެޗުގެ 88 ވަނަ މިނެޓުގަ އެވެ.