މަންޗިނީ ބުނަނީ ވޭލްސް އާއި ސްޓޯކް ސިޓީ އެއްގޮތޭ

ރޯމް (ޖޫން 20) - އިންގްލެންޑްގެ ސްޓޯކް ސިޓީ އާއި ވޭލްސްއާ އެއްގޮތް ކަމަށް އިޓަލީގެ ކޯޗް ރޮބާޓޯ މަންޗިނީ ބުނެފި އެވެ.

ޔޫރޯގެ ގުރޫޕް އޭ ގެ ފަހު މެޗުގައި މިރޭ އިޓަލީން ނުކުންނާނީ ވޭލްސް އާ ދެކޮޅަށެވެ. މެންޗެސްޓާ ސިޓީއަށް ޕްރިމިއާ ލީގު ހޯދައިދިން މަންޗިނީ ބުނީ ވޭލްސްގެ ކުޅުންތެރިންގެ މަސައްކަތާއި ސްޓޯކް ސިޓީއާ އެއްގޮތް ކަމަށެވެ.

"ސްޓޯކްގައި ވެސް އޮންނާނެ ވަރަށް ވަރުގަދައަށް ކުޅުމުގެ ސްޓައިލެއް. އެ ޓީމަކީ ބަލިކުރަން އުނދަގޫ ޓީމެއް،" ޕްރިމިއާ ލީގުގައި ސްޓޯކް ސިޓީއާ ދެކޮޅަށް އަށް ފަހަރު ނުކުތް މަންޗިނީ ބުންޏެވެ.

"ވޭލްސް އާ ދެކޮޅަށް ކުޅޭ މެޗު ވެގެންދާނީ ވަރުގަދަ މެޗަކަށް. ހާއްސަކޮށް ފިޒިކަލީ ވަރުގަދަ މެޗަކަށް. ސަބަބަކީ ވޭލްސްއަކީ ވެސް ސްޓޯކް ސިޓީ ކަހަލަ ވަރުގަދަ ޓީމެއް. އަދި ހަމަ ޓެކްޓިކަލީ ވެސް ވަރުގަދަ ވާނެ."

މަންޗިނީގެ ވާހަކަތަކާ ގުޅިގެން، ވޭލްސްގެ ކެޕްޓަން ގެރެތު ބޭލް ބުނީ، ސްޓޯކް ސިޓީއަކީ އެހާ ވަރުގަދަ ޓީމެއްކަން އޭނާއަށް ނޭނގޭ ކަމަށެވެ.

އިޓަލީ ވަނީ ކުޅުނު ދެ މެޗުން ވެސް މޮޅުވެ، ދެ ވަނަ ބުރުގެ ޖާގަ ޔަގީންކޮށްފަ އެވެ. މެޗު އެއްވަރުކޮށްލައިގެން ވޭލްސްއަށް ދެ ވަނަ ބުރަށް ދެވެން އެބައޮތެވެ. މި ގުރޫޕްގެ އަނެއް މެޗުގައި ވާދަ ކުރާނީ ތުރުކީ އާއި ސްވިޒަލެންޑެވެ. ދެ މެޗު ވެސް ފަށާނީ ރާއްޖޭ ގަޑިން މިރޭ ނުވައެއް ޖަހާއިރު އެވެ.