އިޓަލީ އަށް އެއް ވަނަ، ބަލިވިޔަސް ވޭލްސް ދެވަނަ ބުރަށް

ރޯމް (ޖޫން 20) - ޔޫރޯ މުބާރާތުގައި މިރޭ ވޭލްސްގެ މައްޗަށް 1-0 ގެ ނަތީޖާއަކުން ކާމިޔާބު ހޯދައި ގުރޫޕް އޭ ގެ އެއް ވަނަ އިޓަލީ ހޯދިއިރު، މެޗުން ބަލިވިޔަސް ގުރޫޕްގެ ދެ ވަނަ މަގާމުގައި ވޭލްސް ދެ ވަނަ ބުރަށް ދަތުރު ކޮށްފި އެވެ.

މެޗަށް ނުކުތް އިރުވެސް އިޓަލީ އޮތީ، ދެ ވަނަ ބުރުން ޖާގަ ކަށަވަރުކޮށްފަ އެވެ. ކޮންމެ ގުރޫޕަކުންވެސް ދެ ވަނަ ބުރަށް ސީދާ ދަތުރު ކުރާނީ ގަދަ ދެ ޓީމެވެ. ގްރޫޕް އޭ އިން ދެ ވަނަ ޖާގައަށް ވާދަ ކުރީ ވޭލްސް އާއި ސްވިޒަލެންޑެވެ. ކުރިން ކުޅުނު ދެ މެޗުން ތުރުކީ ބަލިވެފައި ވުމުން، މެޗަށް ނުކުތް އިރުވެސް އެ ޓީމު ގަތްގަނޑަކަށް އޮތީ މުބާރާތުން ކަޓައިފަ އެވެ.

ސްވިޒަލޭންޑް ވަނީ މިރޭ ތުރުކީއާ ދެކޮޅަށް ކުޅުނު މެޗުން 3-1 އިން މޮޅުވެފަ އެވެ. މެޗުން ސްވިޒަލެންޑް މޮޅުވެ އެ ޓީމުން ގުރޫޕް ސްޓޭޖު ނިންމާލީ ހަތަރު ޕޮއިންޓާއެކު އެވެ. މިއަދުގެ މެޗުތަކުގެ ކުރިންވެސް ވޭލްސް އޮތީ ހަތަރު ޕޮއިންޓް ހަމަކޮށްފަ އެވެ. ވޭލްސް އާއި ސްވިޒަލެންޑް ކުޅުނު މެޗު އެއްވަރުވެފައި އޮތުމުން، ވޭލްސް އަށް ދެވަނަ ލިބުނީގެ ލަނޑުގެ ތަފާތުންނެވެ.

ވޭލްސް އަށް ފައިދާ އެއް ގޯލް އެބައޮތެވެ. ސްވިޒަލެންޑަށް ފައިދާ ގޯލެއް ނެތެވެ. އެ ޓީމަށް އޮތީ ގެއްލުން އެއް ގޯލެވެ. އެހެންވެ ގުރޫޕްގެ ދެ ވަނަ ޖާގައިގައި ދެ ވަނަ ބުރަށް ދަތުރު ކުރީ ވޭލްސް އެވެ. ސްވިޒަލެންޑް ޖެހޭނީ ގުރޫޕް ސްޓޭޖް ނިމެންދެން އެ ޓީމަށް ވާގޮތް ބަލަން މަޑު ކުރާށެވެ. ހަ ގުރޫޕްގެ ތިން ވަނަ ހޯދާ ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދާ ހަތަރު ޓީމު ދެ ވަނަ ބުރަށް ދަތުރު ކުރާނެ އެވެ.

މިރޭ ވޭލްސް އާ ދެކޮޅަށް ކުޅުނު އިޓަލީގެ ޓީމަށް ކޯޗް ރޮބާޓާ މަންޗިނީ ގެނެސްފައިވާ އެންމެ ބޮޑު ބަދަލަކީ، ފުރަތަމަ ދެ މެޗުގައި ނުކުޅެވުނު، ޓީމުގެ މިޑްފީލްޑާ މާކޯ ވެރާޓީއަށް ފުރަތަމަ 11 އިން ފުރުސަތު ދިނުމެވެ. ގުރޫޕްގެ ފުރަތަމަ ދެ މެޗަށް ނެރުނު ފުރަތަމަ 11 އަށް، މަންޗީނީ ވަނީ މިރޭގެ މެޗުގައި ގިނަ ބަދަލުތަކެއް ގެނެސްފަ އެވެ.

މިރޭގެ މެޗުގައި އިޓަލީ އަށް 39 ވަނަ މިނެޓުގައި ލަނޑު ޖަހައިދިނީ މަޓޭއޯ ޕެސީނާ އެވެ.

ދެ ވަނަ ބުރުގައި އިޓަލީ ކުޅެން ޖެހޭނީ ގްރޫޕް ސީގެ ދެ ވަނަ ޓީމާ ދެކޮޅަށެވެ. އެ ގްރޫޕްގެ ދެ ވަނަ މަގާމުގައި މިވަގުތު އޮތީ ޔޫކްރޭން އެވެ. ވޭލްސް ވާދަ ކުރާނީ ގްރޫޕް ޑީ ގެ ދެ ވަނަ ޓީމާ ދެކޮޅަށެވެ. އެ ގްރޫޕްގެ ދެ ވަނައިގައި މި ވަގުތު އޮތީ އިންގްލެންޑެވެ. އެ ދެ މެޗު އޮންނާނީ އަންނަ ހޮނިހިރު ދުވަހު އެވެ.